Bu başlıq xüsusilə seçilib. Əslində bəhs edəcəyimiz mövzu hələ də mübahisəli və spekulyasiyalara açıqdır. Amma yenə də gözardı edilməyəcək qədər maraqlıdır…
Eramızdan əvvəl 2040-1640-cı illər aralığı, Misirdəki Hator məbədinə aid olan Dendera məbəd kompleksi…Bu arxeoloji əsəri xüsusi edən isə məbədin divarlarını bəzəyən rəsmlərdir.
Dendera məbədi, Orta Padşahlıq dövründə inşa edilsə də, bu günə kimi gəlib çatan nümunələr Ptolomeylər sülaləsi dövründən qalmadır. Ptolomeylər sülaləsinin hakimiyyəti dönəmində Misir sənətində böyük yeniliklərin yaşandığı bilinməkdədir. Bəhs edilən qabartmalar konkret olaraq, e.ə.30-cu illərə, dolayısı ilə firon XII Ptolomeyin dövrünə aiddir.
Aralarında Erix fon Deniken, Peter Krassa, Raynhard Habek və Erdoğan Ercivanın da olduğu bir çox araşdırmaçı yazarlar təsvir edilən bu rəsmlərin lampa olduğunu iddia edirlər. “Antik Astronavtlar Nəzəriyyəsi”ni müdafiə edən bu yazarların iddiasına görə lampa antik çağlarda insanlara məlum idi və istifadə edilirdi. Bu nəzəriyyəyə görə başqa Yerdənkənar sivilizasiyalardan gələn varlıqlar misirlilərə bir çox texnoloji yenilikləri öyrətmişdilər və onlar qədim misirlilər tərəfindən Tanrı olaraq qəbul edilirdilər.
Misirşünaslara görə, Dendera qabartmaları alleqorik olaraq gündoğumunu simvolizə edir. Bu qabartmaların yanında çizilmiş heroqliflər günəşin doğuşu ilə bağlı dini təsvirləri əks etdirir. Təsvirlərdə Harsomtus adlı qədim Misir tanrısı ilan şəklində bir buludun içərisində göstərilir. Bu bulud isə yer altından ayrılaraq, göy tanrısı Nuitin rəhmi şəklində yüksəlir.
Misir sənətində nadir hallarda rast gəlinən bu səhnələri müşayiət edən heroqliflər 1991-ci ildə Volfqanq Vaytkus tərəfindən deşifrə edilib.
