Son dövrlər mediada, film sənayesində UNO (uçan naməlum obyektlər) ilə bağlı məlumatlara çox tez-tez rast gəlir, tezliklə bizim sivilizasiyanın yerdənkənar sivilizasiyalar tərəfindən məhv ediləcəyinıə dair fikirlərlə qarşılaşırıq. Bu barədə saysız-hesabsız məqalələr, kitablar, filmlər mövcuddur.
Bu mövzuya bir də son dövrlər zombi qiyaməti mövzusu qoşulmaqdadır. Naməlum virus sayəsində insanlar zombiləşir və onların xətər yetirdikləri hər kəsdə bu simptomlara rast gəlinir. Bütün dünya ölkələri bu bəlanın aradan qaldırılması işində səfərbər olur. “The Walking Dead” serialını güman ki, çoxunuz izləyibsiz…
Hər nə qədər fantastik görünsə də, bu gün ABŞ-da zombi qiyamətinə hazırlıq məqsədi ilə hazırlanmış bir plan mövcuddur.
30 aprel 2011-ci ildə hazırlanmış bu plan CONOP 8888 (CDRUSSTRATCOM CONPLAN 8888-11 Counter-Zombie Dominance Operations) adlanır və böhranlı vəziyyətlərdə fövqəladə hallar planıdır. CONOP 8888 ABŞ hərbçiləri üçün mülki şəxsləri və hakimiyyət orqanlarını zombilərdən, zombi təhlükəsinin aradan qaldırılmasından, diri ölülərin tamamilə məhv edilməsinə qədər qorunmaq üçün hərtərəfli fövqəladə təlimatları ehtiva edir. Sənəddə planın aşağıdakı məqsədləri var:
- “ bəşəriyyətin zombilərdən qorunması üçün insanlar arasında maarifləndirmə işləri aparmaq və insanlarla dövlətin əlaqələrini güclü saxlamaq;
- zəruri hallarda zombilərdən insan həyatı üçün yarana biləcək təhlükəni aradan qaldıran əməliyyatlar həyata keçirmək;
- zombi hücumu zamanı və ondan sonra asayişin qorunmasında və əsas xidmətlərin bərpasında mülki hakimiyyət orqanlarına kömək etmək” və s.
Sənədin müəllifləri “aydınlaşdırma qeydi” seqmentində qeyd edirlər ki, hazırlanmış plan zarafat deyil.
Lakin ABŞ donanmasının kapitanı Pamela Kunze “Sızdırılan sənəd təlim məqsədi ilə orduda istifadə edilir. Sənədin məqsədi tələbələrə ordudakı sadə fəndləri və uydurulmuş təlim ssenarilərini öyrətməkdir.” deyir. ABŞ Strateji Komandanlığının bir sözçüsü də CNN-ə verdiyi müsahibədə bunun yalnız təlim xarakterli olduğunu qeyd edirdi. Guya orta məktəblərdə şagirdlərə xüsusi təlimlər keçirilir, mümkün zombi istilası zamanı onlarla mübarizə yolları öyrədilir. Bu zaman xüsusi atəş təlimlərinə önəm verilir, yalnız zombilərin başına atəş açılmasının önəmi vurğulanır.
Bu mövzu uzun müddətdir ki, təkcə hərbi-siyasi mühitdə maraq doğurmur. Məsələn, Amerika yazıçısı Maks Bruks tərəfindən zombilər arasında sağ qalmaq təlimatları haqqında yazılmış kitabı 2003-cü ildə nəşr olundu. Kitab həm də zombi virusu zamanı sağ qalmaq üçün bələdçidir.
CONOP 8888 planına görə zombilər bir neçə cür olur: vegetarian zombilər, toyuq zombilər, yadplanetli zombilər, yoluxdurucu zombilər, radiasiyaya duyarsız zombilər, silahlı zombilər və pis cadu ilə məşğul olan zombilər. Sənədə görə, toyuq zombilər yalnız Kaliforniyada mövcuddur.
Bu plan hər nə qədər fantastik və qeyri-real görünsə də, mümkünlük payı da az deyil. Xüsusilə, bəzi konspiroloqlar bunun əslində ABŞ-nın öz ssenari planı olduğunu qeyd edir.