Bu günlərdə bütün futbol azarkeşlərinin nəzərləri Qətərə yönəlib. Noyabrın 20-dən etibarən futbol üzrə Dünya çempionatı start götürüb və artıq qrup oyunları yekunlaşıb. Bu mundial da bir çox sürpriz və sensassiyalarla yadda qalmaqdadır. Lakin biz bu gün başqa bir məsələ haqqında danışacağıq. Yaşlı nəsildən fərqli olaraq bizlər hər mundialın qrup mərhələsinin son oyunlarının eyni saatda keçirilməsinə şahidlik edirik. Bu ənənə 1982-ci ildən bəri davam edir. Tarixi isə heç də fəxr ediləsi deyil.
Hər şey 1982-ci ildə İspaniyada keçirilən Dünya çempionatının Qərbi Almaniya və Avstriya milliləri arasında keçirilən oyunla başladı. Matça qədər qrupda vəziyyət belə idi: Qərbi Almaniya, Avstriya, Əlcəzair və Çilidən ibarət 2-ci qrupda Əlcəzair ilk oyununda Almaniyanı 2-1 məğlub edərək kubokda bir Avropa komandasını məğlub edən ilk Afrika komandası oldu. Əlcəzair Çili ilə oyunu bir gün əvvəl qalibiyyətlə başa vurmuşdu. Qrupdakı son oyun Qərbi Almaniya ilə Avstriya arasında oynanılacaqdı. Qərbi Almaniyanın Avstriyanı 1-0, ya da 2-0 məğlub etməsi halında, Qərbi Almaniya və Avstriya top fərqi ilə Əlcəzairi üstələyəcəkdi. Qərbi Almaniyanın 3, ya da daha çox fərqlə qazanması halında Avstriya, oyunun heç-heçə, ya da Avstriyanın qalibiyyəti ilə bitməsi halında isə Qərbi Almaniya qrupda qalaraq kubokdan kənarlaşacaqdı.
Komanda | O | Q | B | M | Q+ | Q- | T-F | X |
---|---|---|---|---|---|---|---|---|
Avstriya | 2 | 2 | 0 | 0 | 3 | 0 | +3 | 4 |
Əlcəzair | 3 | 2 | 0 | 1 | 5 | 5 | 0 | 4 |
Qərbi Almaniya | 2 | 1 | 0 | 1 | 5 | 3 | +2 | 2 |
Çili | 3 | 0 | 0 | 3 | 3 | 8 | −5 | 0 |
25 iyun 1982-ci il, Xixon şəhəri, “El Molinon” stadionu.
Oyunda Qərbi Almaniya 10-cu dəqiqədə Hörst Hröbeskin qolu ilə 1-0 önə keçdi və oyunun qalan hissəsində hər iki komandanın oyunçuları matçın bu hesabla bitməsi üçün əllərindən gələni əsirgəmədilər. Qoldan sonra hər iki komanda oyunçularının topa məqsədsizcə toxunduqları görünürdü. Topun hakimiyyətini əlində saxlayan komanda meydanın öz hissəsində paslaşır, rəqib oyunçu yaxınlaşdıqda isə topu qapıçısına atırdı. O dövrdə geri pas qaydası yox idi və qapıçı komanda yoldaşlarından gələn topu dərhal əlinə götürə bilirdi. Bununla yanaşı, oyun heç kəsin olmadığı boş bölgələrə atılan uzun paslarla keçdi və başqa bir ciddi qol epizodu olmadı. Oyunda səy göstərən yeganə oyunçu avstriyalı Valter Şkakner oldu.
ARD telekanalının spikeri Eberhard Stanjek, oyunun bir hissəsindən sonra şərh etməyi dayandırdı. Avstriyalı spiker Robert Ziger, izləyicilərdən televizorlarını söndürmələrini istədi.
Xixonda oynanılan bu oyunda ispan azarkeşlər də boş dayanmayaraq “fuera, fuera” (çölə, çölə) deyə qışqırmağa başladılar. Əsəbi əlcəzairli tərəfdarlar, oyunçulara kağız pul atdılar. Oyun, gözlənildiyi kimi 1-0 Qərbi Almaniyanın qalibiyyəti ilə bitdi və Əlcəzair qrupda qaldı.
Oyunun sonunda eyni xala sahib olan komandalardan Qərbi Almaniya ilə Avstriya qrupdan çıxarkən eyni xala sahip Əlcəzair isə qrupda qalaraq turnir ilə vidalaşdı.
Komanda | O | Q | B | M | Q+ | Q- | T-F | X |
---|---|---|---|---|---|---|---|---|
Qərbi Almaniya | 3 | 2 | 0 | 1 | 6 | 3 | +3 | 4 |
Avstriya | 3 | 2 | 0 | 1 | 3 | 1 | +2 | 4 |
Əlcəzair | 3 | 2 | 0 | 1 | 5 | 5 | 0 | 4 |
Çili | 3 | 0 | 0 | 3 | 3 | 8 | −5 | 0 |
Matçın ardından FİFA, baş verən bu hadisənin təsiri ilə bu kimi halların bir daha baş verməsinin qarşısını almaq məqsədi ilə qaydalarda dəyişikliklər etdi və Dünya kuboku qruplarındakı son oyunların hamısının eyni saatda oynanmasına qərar verildi.
Qrupdan çıxan komandalardan Avstriya 2-ci turda məğlub oldu, yoluna davam edən Qərbi Almaniya 1982 FİFA Dünya kubokunun finalında İtaliyaya 3-1 hesabı ilə məğlub oldu və turnirin gümüş medalına sahib oldu.
Bu oyun Alman futbol tarixinə “Nichtangriffspakt von Gijón” (Xixon aqressiyasızlıq müqaviləsi) və “Schande von Gijón” (Xixon rəzaləti) olaraq keçib.