Petrosyan və Korçnoy əvvəllər yaxın dost idilər. Amma 1970-ci illərin əvvəllərindən münasibətlərində soyuqlaşma başladı. Qəti qırılmaları isə 1974-cü ilin aprelində Odessada baş verdi.
Onlar dünya çempionluğu uğrunda iddiaçılar turnirinin yarımfinalında qarşılaşdılar. Reqlamentə görə, matçda qalib gəlmək üçün 4 qələbə qazanmaq lazım idi. Ya da ki, 20 partiyadan sonra hesabda irəlidə olan qalib gələcəkdi.
Keçmiş dünya çempionu Petrosyan bu dövrdə karyerasının artıq enişini yaşayırdı. Onunla eyni nəslə mənsub olan (2 yaş kiçik) Korçnoy isə əksinə, getdikcə daha güclü oyun nümayiş etdirirdi.
Dörd oyundan sonra hesab 2,5-1,5 (+2-1=1) Korçnoyun xeyrinə idi. Beşinci oyunda Petrosyan çətin vəziyyətə düşür. Deyilənlərə görə, belə hallarda keçmiş dünya çempionu qeyri-ixtiyari ayaqlarını tərpətməyə başlayırmış. Başqa yerlərdə bunun fəsadı olmurdu, amma Odessadakı zalın döşəməsi elastik olduğundan şahmat taxtası da tərpənirdi.
Korçnoy əvvəlcə Petrosyana ayaqlarını tərpətməməsini söyləyir, sonra hakimə şikayət edir. Onda belə təəssürat yaranır ki, Petrosyan artıq bunu qəsdən edir. Sonrakı hadisə haqqında iki versiya var. Birinə görə, Petrosyan yenə ayağını tərpədəndə Korçnoy stolun altından ona bir təpik vurur. Digərinə görə, təpikləşmə daha əvvəl olduğundan stolun altına arakəsmə qoyulmuşdu, indi isə Korçnoy “bu, sənin axırıncı ümidindir?” soruşur və Petrosyan əsəbləşir. Beşinci oyun da Korçnoyun qələbəsi ilə yekunlaşır.
Qələbə şansının olmadığını anlayan Petrosyan şahmat federasiyasına, Kommunist partiyasının Mərkəzi Komitəsinə şikayətlər yazır, Korçnoyu qeyri-idman davranışında ittiham edir. Turnirin təşkilatçıları şikayəti müzakirə edərkən Korçnoy “Petrosyan SSRİ-də hara gedirsə, onu xeyli sayda ermənilər müşayiət edir. Mənə maraqlıdır, bu toplantıların təşkilində Petrosyan özü hansı rol oynayır?”. Bu zaman Korçnoy “сборище” sözünü işlədir ki, bu da “toplantı”dan daha çox “mərəkə” sözünə yaxındır.
Cavabında Petrosyan şüvən qaldırır: “O, məni təhqir etdi, mənim xalqımı təhqir etdi. Mən daha oynamıram…” Amma xeyri olmur. Petrosyan oynamaqdan imtina etdiyi üçün qələbə Koçnoya verilir. Mətbuatda isə Petrosyanın səhhəti üzündən oyunu davam etdirə bilmədiyi barədə informasiya verilir.
Sonralar Korçnoy SSRİ-dən qaçıb Qərbdə siyasi sığınacaq alanda onun kölgəsini ən həvəslə, ən cani-dildən qılınclayan Petrosyan idi. Amma həm 1978-ci ilin, həm də 1981-ci il dünya çempionatının iddiaçılar turnirində zalım püşk Petrosyanı elə ilk mərhələdə Korçnoya ürcah etdi və hər dəfə Korçnoy onun yazdıqlarının əvəzini şahmat taxtası arxasında çıxaraq qalib gəldi.
