Digər səmavi dinlər kimi islamın da müqəddəs kitabı var və bu, “Qurani-Kərim”dir. Bu haqda xüsusi və ətrafı yazmağa ehtiyac yoxdur. Bu dəfəki yazı “Quran”ın tam başqa və çoxumuz tərəfindən bilinməyən nüsxəsi haqqındadır – “Qanlı Quran” haqqında…
“Qanlı Quran” İraqın keçmiş lideri Səddam Hüseynin qanı ilə yazılıb. Belə ki, keçmiş diktator 1997-ci ildə özünün 60 illik yubileyi münasibətilə öz qanı ilə 6 min ayəlik, 336 min sözlük “Quran” yazılmasını sifariş etmiş və bu məqsədlə, 24-27 litr qan bağışlamışdı.
“Həyatım çoxlu qan itirməli olduğum təhlükələrlə dolu idi… azacıq da olsa, birindən Allah sözlərini qanımla şükür yazmasını istədim”
“Qanlı Quran” əvvəldən həm dini, həm də siyasi mübahisələr fırtınasına səbəb oldu. İslam şəriət qanunlarına görə, insan qanı ayin baxımından murdar sayılır. Buna görə də Allahın müqəddəs sözünü murdar qanla yazmaq qəti qadağandır. Bununla belə, müqəddəs mətnin təhrif edilməsi və ya məhv edilməsi də qadağandır.
“Möhtəşəm əsər” 2000-ci ilin sentyabrında mərasimlə Səddama təhvil verildikdən sonra Bağdaddakı Umm əl-Məarik (Bütün Döyüşlərin Anası) məscidinə qoyuldu. Onun qanla boyanmış səhifələri məscid kompleksinin daxilindəki süni gölün üzərində qurulmuş altıbucaqlı mərmər binada nümayiş etdirilirdi və ona yalnız dəvət olunmuş ziyarətçilər baxa bilirdi.
Səddamın “Qanlı Quran”ı 2000-ci ildə Birləşmiş Ərəb Əmirlikləri və Səudiyyə Ərəbistanının dini qurumları tərəfindən pislənilmiş və 2003-cü ildə onun hakimiyyətdən düşməsindən sonra ictimaiyyətin nümayişindən çıxarılmışdır. Məscidin gözətçiləri “Qanlı Quran”ı din xadimləri və siyasətçilər bu problemli yadigarla nə edəcəklərinə qərar verənə qədər saxlamaq üçün anbara qoyublar.