Sezariya Evora 27 avqust 1941-ci ildə Kabo Verdenin Mindel şəhərində musiqiçi Jüstino da Kruz Evora və aşbaz Dona Coanın ailəsində dünyaya gəlib. Atası musiqiçi olsa da, ailə vəziyyətləri yaxşı deyildi. 1948-ci ildə Sezariya 7 yaşında olanda atası dünyasını dəyişir. Ailədə ondan başqa daha beş uşaq olduğuna görə, anası onları saxlaya bilmir və buna görə də Sezariyanı yetimxanaya göndərir. O, burada 16 yaşınadək qalır.
17 yaşına çatanda evə qayıdır və anasına köməklik etmək qərarına gəlir. Bu məqsədlə, Sezariya musiqiçi kimi Mindeldəki barlarda çalışmağa başlayır. O, “morna” (Yaşıl Burun adasının ənənəvi musiqi janrı) və “fadu”janrlarında mahnılar ifa edir.
İlk albomunu 43 yaşında ikən Lissabonda çıxarır. Onun prodüsseri digər məşhur müğənni Tito Paris olur. Sezariya Lissabonda kabo verdelilərin yığışdığı “Enclave” restoranında mahnı oxuyarkən, Kabo Verde əsilli fransız Joze da Silva adlı biri onun ifasını bəyənir və bundan sonra onun şöhrət qazanmasına yardımçı olur. O, 47 yaşlı xanım müğənnini Parisə göndərir. Burada “Lusafrica” ilə əməkdaşlıq başlayır. 80-ci illərdə onun şöhrəti bütün dünyaya yayılır. 1992-ci ildə “Miss Perfumadu” adlı dördüncü albomu işıq üzü görür.
2010-cu ilin mayında ürəyindəki problemlərdən dolayı konsertini təxirə salır. 2011-ci ilin sentyabrında isə karyerasını bitirdiyini elan edir. Elə həmin ilin 17 dekabrında, 70 yaşında ürək çatışmamazlığından dünyasını dəyişir.
Sezariya Evora gündəlik həyatda və səhnədə həmişə ayaqyalın gəzdiyindən “Ayaqyalın Diva” təxəllüsünü almışdı. Ayaqyalın gəzməyinə səbəb kimi ölkəsinin 50% əhalisinin yoxsulluq içərisində yaşadığını göstərirdi.
O, Kabo Verdedə bir çox təhsil və səhiyyə ocaqlarının maliyyələşdirilməsini həyata keçirib. 2009-cu ildə Fransanın Fəxri Legion ordeninin cəngavər dərəcəsi ilə, habelə “Cənub xaçı” ordeninin (Braziliya) və “Böyük Xaç” ordeninin (Portuqaliya) cəngavər dərəcələri ilə təltif olunub.
Bu gün onun adı iki canlıya verilib. Onlardan biri, Yaşıl Burun adasında olan Chilades evorae kəpənəyinə, digəri isə San-Antau adasında olan Aegires evorae molyuskasıdır.
