“Yaradılış”
19:24 – Rəbb Sodom və Qamorranın üzərinə göydən odlu kükürd yağdırdı;
19:25 – Bu şəhərləri, bütün ovalığı, burdakı insanların hamısını və bütün bitkiləri yox etdi;
19:26 – Ancaq Lutun arxasınca gələn həyat yoldaşı dönüb arxasına baxınca dondu;
19:27 – İbrahim sabah erkən oyanıb, öncəki gün Tanrının hüzuruna getdiyi yerə getdi;
19:28 – Sodom və Qamorraya və bütün ovalığa baxdı. Yerdən oddan yüksələn kimi tüstü qalxırdı;
19:29 – Tanrı ovadakı şəhərləri yox edərkən İbrahimi düşünməmiş və Lutun yaşadığı şəhərləri məhv edərkən onu bu təhlükədən uzaqlaşdırmışdı…
İncilə, eyni zamanda Tövrat və Qurana görə, Sodom və Qamorra qədimlərdə Tanrının qəzəbinə tuş gələrək yox edilən iki şəhərdir. İsraildə, Lut gölünün cənub-şərqində əl-Lisan yarımadasının cənubunda daşqın suları altında qaldıqları təxmin edilir. Admah, Zeboim və Zoar ilə birlikdə “Kitabi Müqəddəs”də adı çəkilən beş şəhərdən ikisidir. Sodom şəhərinin adı, Ölü dənizin cənub-qərbində yerləşən Sodom dağının adından gəlir.
“Tekvin”də “işlədikləri günahlara görə göydən yağan odlu daşlarla yox edildiyi” bəhs edilən (19:24) bu iki şəhərin, daha öncələr İsraildəki Şeria çayından Şərqi Afrikada Zambezi çayınadək uzanan Böyük Rif Vadisində e.ə.1900-cü ildə meydana gələn zəlzələdə yox olduğu güman edilirdi. Ancaq 2000-ci illərdə həyata keçirilən araşdırmaların nəticəsində məlum olub ki, böyük asteroid parçalarının Lut gölünə və Sodom şəhərinə düşməsi nəticəsində bu arealda olan bütün canlı aləm məhv olub. Bu təbiət hadisəsi nəticəsində Lut gölünə düşən asteroidin göldən ətrafa saçdığı duz təbəqəsinin 700 il ərzində ərazini yararsız və qeyri-məhsuldar bir yerə çevirməsinə dair arxeoloji sübutlar tapılıb.
Bir digər, eyni zamanda ağlasığmaz versiyalardan biri də, bu şəhərlərin Yerdənkənar sivilizasiya nümayəndələri (annunakilər) tərəfindən, onlara qarşı insanların (Homo Sapiens) qaldırdıqları üsyan səbəbindən yox edilməsi ilə bağlıdır.
Sodom və Qamorra şəhərlərinin lokalizasiyasına dair də fərqli fikirlər mövcuddur. Bəzi tarixçilər bu şəhərlərin Bab edh-Dhra və Numeira şəhərləri olduğu qənaətindədir. Qeyd edək ki, bu ərazilər Erkən Tunc dövrünə aid insan məskənləridir.
Gələk, Sodom və Qamorra şəhərlərinin məhv olma hekayəsinə…
İlk öncə onu qeyd edək ki, hekayə haqqında ətraflı məlumat “Bibliya”nın “Yaradılış” və “Takvin” bölümlərində yer alır. “Kitabi Müqəddəs”ə görə, İbrahim peyğəmbər və qardaşı oğlu Lut Misirdən döndükdən sonra sürülərin otlaq yerləri üstündə çobanları arasında tez-tez düşən mübahisə və münaqişələrdən dolayı ayrılmaq qərarına gəlirlər (“Takvin” 13/7-8). Beləliklə, Lut Sodom şəhərinə yaxın bir ərazidə məskunlaşır. Lakin bu şəhərlərin əhalisi yolunu azmış və əxlaq cəhətdən pozulmuşdu. Kişi sakinlər arasında homoseksualizm geniş yayılmışdı. Bu sırada, Tanrı bu şəhərlərin sakinlərini cəzalandırmaq üçün Lutun yanına iki mələk göndərir (amma əvvəlcə bu mələkləri İbrahimin yanına göndərmişdi) və bu mələklər tezliklə bu şəhərlərin Tanrı tərəfindən cəzalandırılacağını xəbər verirlər. Mələklər Lut və ailəsini alıb şəhərdən çıxan zaman Tanrı tərəfindən bu şəhərlər od yağışına məruz qalırlar. Lutun həyat yoldaşı olub-keçənləri görmək üçün dönüb arxaya baxan zaman buza dönür. Lut və iki qızı isə bir dağda yerləşən mağaraya sığınırlar.
Göründüyü kimi, bu hekayə daha çox dini kitablardan gələn bir mövzudur, lakin gerçəklikdə baş verməsi də mümkündür. Tarixdən buna oxşar müqayisələr az da deyil. Məsələn, Pompey şəhərinin məhvi kimi…