1997-ci ildə Çexiya ərazisində eramızdan 26900 il əvvələ aid çətənə lifi aşkar edilir. Bu, marixuana ilə əlaqəsi olan ən qədim tapıntı hesab olunur. O vaxtdan bəri min illərdir ki, marixuana həm tibbi, həm ruhi, həm də ticari anlamda bəşəriyyət üçün önəmli rol oynamağa başalmışdır.
Bu günlərdə BBC-nin verdiyi məlumata görə, Kanadada marixuanadan istifadənin leqallaşdırılması haqda qərar qəbul olunmuşdur. Bu addım Uruqvaydan sonra (2013) ikinci belə addımdır.
Kannabisin yetişdirilməsinin 12 min il yaşı var. Əsasən, Mərkəzi Asiya, Monqolustan və Sibirin cənub bölgələrində becərilirdi. Kannabisin ilk mədəni bitki kimi becərilməsinə dair sübut Neolit dövrünə aid Qədim Çində (Yanqşao) aşkar edilib. Eramızdan əvvəl 5000-3000-ci illərdə Yanqşaonun təsərrüfatı, əsasən kannabis əsaslı idi.
Tibbi məqsədlərlə marixuanadan istifadəyə aid ilk dəlil eramızdan əvvəl 2737-ci ildə Çin imperatoru Şen Nunqa aiddir. Belə ki, onun əmri ilə marixuana revmatizm və podaqranın müalicəsi üçün dərman bitkisi kimi qəbul olunmuşdu. Çində kannabisdən həm dərman, həm toxuculuq, həm də kağız kimi istifadə olunurdu.
Çində ilk tibbi jurnallar çətənə liflərindən, daha sonra isə papirusdan hazırlanırdı.
Eramızdan əvvəl 2000-ci illərdə marixuana Çindən Koreyaya aparılmağa başlandı. Hindistana isə e.ə.2000-1000-ci illər civarında gəlib çıxdı. Hindistanda “Dörd Vedalar”da qedy edilirdi ki, marixuanadan bəzi dini rituallarda geniş istifadə olunurdu.
Eramızdan əvvəl 2000-ci illərə doğru Qədim Misirdə də kannabislə tanış oldular. İlk dəfə bu barədə Kemetdə (Qədim Misir) belə məlumat verilir ki, iltihablı, sızanaq çıxan gözlərin və kataraktın müalicəsində marixuanadan istifadə olunur. Siciliyalı tarixçi Diodorus Sikulus qeyd edir ki, qadınlar kannabisdən kədərli və ya əhvalılları pis olan zaman istifadə edirdilər.Eramızdan əvvəl 1213-cü ildə firon II Ramzesin mumiyasında kannabis tozcuğu aşkar edilib.
Yaxın Şərqdə isə marixuana ilə eramızdan əvvəl 2000-1400-cü illərdə ilk dəfə Skiflər tanış olublar.
Zərdüşt tərəfindən yazılmış Venidadda, marixuananın tibbi məqsədlər üçün istifadəsinə dair eramızdan əvvəl 700-cü ilə aid məlumat yer alır.
Skiflər kannabisi Altaylardan Almaniyaya 2800 il əvvəl aparıblar. Qədim yunanlar isə ondan qulaq ağrısının, edem və iltihabların müalicəsində geniş istifadə ediblər. Britaniya adasına isə marixuana V əsrdə ayaq basıb.
İspanlar bu bitkini 1500-cü illərin ortalarında Amerikaya aparıblar. İngilislər isə ilk dəfə onunla 1611-ci ildə Ceymstaunda tütün məmulatı kimi tanış olublar. 1779-cu ildə Napaleon bu btikini Misirdən Fransaya gətirir.
Nəhayət, ABŞ-da bu bitki ilə tanışlıq XX əsrə Meksika vasitəsilə baş tutur.
