Soyuq 25 fevral axşamında Neymar oyun zamanı ayağını yerə tərs basdı. İlk əvvəl özü və komanda yoldaşları bu zədəni hiss etmədilər. Lakin az sonra acılar içində yerə sərildi Neymar. PSJ camiəsi ilə yanaşı, bütün Braziliya da yasa batdı…
Tibbi müayinələrdən sonra nəticələr ürəkaçan deyildi, Neymar qarşıdan gələn dünya çempionatından kənarda qala bilərdi. Lakin 12 may tarixində bütün jurnalistlər, idman müxbirləri onun komanda ilə birlikdə ilk dəfə məşqə çıxmasını gözləyirdi. Məlum oldu ki, o, qarşıdan gələn mötəbər idman turnirində iştirak edə biləcək.
Nəhayət, Braziliyanın həsrətlə gözlədiyi gün gəldi. Belindəki “10” nömrə ilə meydana çıxan Neymar diz çöküb Allaha yalvarırdı, dua edirdi. İlk oyun günü idi. Lakin topla edilən lazımsız və artıq hərəkətlər azarkeşləri qəzəbləndirirdi. İsveçrə ilə keçirilən ilk qrup matçı 1-1 hesabı ilə yekunşaldı. Oyun sonrası Neymarın göstərdiyi “performans” heç kimin xoşuna gəlməmişdi.
Kosta-Rika ilə oyunda da lazımsız hərəkətləini davam etdirən Neymar cərimə meydançası içərisində özünü yerə atsa da və hakim 11 metrlik nöqtəni göstərsə də, kosta-rikalıların etirazı üzərinə penalti verilmədi. Çünki VAR sistemi vardı… “Yalançı çoban”ın yalanı bu dəfə alınmadı…
Onun özünü dəqiqədə bir yerə atma məqamları Serbiya ilə oyunda da bol oldu.
Meksika ilə oynanan 1/8 final matçı hər kəsdə fərqli düşüncələr yaratmışdı. Kimi Almaniyanı məhv edən Meksikanın Braziliyanı keçəcəyini yazırdı, deyirdi, kimi isə Neymarı bu matça fərqli formada çıxacağını söyləyirdi. Lakin braziliyalılar sürprizə imkan vermədi.
1/4 final matçı isə Neymarın özünü əfv etdirməsi baxımından növbəti şans ola bilərdi. Lakin meydanda çox nadir hallarda görünən Neymar, bir də matçın sonlarına yaxın diqqət mərkəzinə düşdü. Belə ki, 90-cı dəqiqədə vurduğu möhtəşəm zərbəni belçikalı qolkiper Kurtua (Courtuois) eyni gözəlliklə dəf etməyi bacardı. Beləliklə, bütün braziliyalıların və dünyanın bu dünya çempionatında əsas favorit hesab etdiyi Braziliya Belçikaya 1-2 hesabı ilə yenildi.
Messinin də, Ronaldonun da deyəcək sözləri vardı. Çünki bu ulduz oyunçular öz komandalarının yetərsiz gücündən dolayı şikayətlənirdilər, amma Neymarın belə bəhanəsi yox idi. Çünki meydanın bütün nöqtələrində öz işini ən yaxşı səviyyədə görə biləcək komanda yoldaşları vardı. Neymar da öz gücü ilə komandanı irəli daşıyacaq bir lider idi.
Lakin bu çempionat bir daha onu göstərdi ki,o, Braziliyanın “ignes fatui”sidir. Yəni ona olan gözləntiləri verə bilməyən biridir….
