“Roma” klubunun qapıçısı Alison Beker “Liverpul”a keçib. Transferin qiyməti 62,5 milyon avro təşkil edir. Gələcəkdə transferin məbləği müxtəlif bonusların hesabına 10 milyon avro arta bilər. Beləliklə, Alison Beker futbol tarixinin ən bahalı qapıçısı olub.
25 yaşlı Alison Beker 2016-cı ildə Braziliyanın “İnternasional” klubundan “Roma”ya keçib. Transferin qiyməti 8 milyon avro təşkil edib.
Alison Beker Rusiya keçirilən dünya çempionatında Braziliya yığmasının əsas qapıçısı olub.
Qeyd edək ki, Alison Ramzes Beker (Alisson Ramses Becker) 2 oktyabr 1992-ci ildə Braziliyanın Yeni Amburq şəhərində (əhalisinin əksəriyyəti alman əsillidir) dünyaya göz açıb.
