Fransa millisinin ilk dünya çempionatında oynadığı matçda komandasını meydana kapitan kimi çıxaran, amma bundan 14 il sonra vətənə xəyanət etməkdə günahlandırılaraq güllələnən futbolçunun həyat hekayəsi…
1905-ci ildə Əlcəzairdə anadan olan Villaplan Fransa yığmasında çıxış edən ilk Şimali Afrika mənşəli futbolçu olub. 16 yaşında Fransanın cənub şərqində yaşayan əmisinin yanına köçərək bu bölgənin “Sete” klubunda forma geyinməyə başlayır. Komandanın şotlandiyalı oynayan-məşqçisi Viktor Gibson onun istedadını görür və əsas komandaya cəlb edir. Ancaq həmin illərdə peşəkar müqaviləyə hələ icazə verilmirdi və komandalar futbolçulara maddi vədlərin əvəzinə başqa köməklik edirdilər. “Nim” klubu onu şəhərdə yaxşı pul qazana biləcəyi bir iş qarşılığında heyətinə cəlb edir. Onu bütün Fransaya tanıdan və ən yaxşı oyun sərgilədiyi komanda da məhz “Nim” olur. Oynadığı dövrdə hava mübarizələrində daha yaxşı çıxış edən Villaplan 1926-cı ildə, hələ 21 yaşındaykən Belçikaya qarşı ilk dəfə millinin heyətində meydana çıxır. Bundan 3 il sonra isə Fransanın ən güclü klublarından olan “Paris”ə keçir. O dövrdə hələ də ölkədə maddi gəlir gətirən peşəkar müqaviləyə icazə verilməsə də, yarımmüdafiəçi ölkənin ən gəlirli futbolçusu olmuşdu. O, bir çox matçlarda oyun alqı-satqısına da qarışmışdı.
Villaplane 25 yaşında DÇ-1930-da Fransa yığmasının kapitanı olur. Mundialın ilk oyununda “üçrənglilər” Meksikanı üstələsə də (4:1), Çili (1:3) və Argentina (0:1) ilə görüşlərdəki məğlubiyyətin fransızların qrupda qalmasına səbəb olur.
1932-ci ildə Fransada peşəkar müqavilə bağlamaq qanuniləşdirilir və bundan faydalanmaq istəyən “Antibes” onu heyətinə cəlb edir. Həmin illərdə Fransa çempionatı şimal və cənub çempionatı olmaqla 2 region üzrə keçirilirdi. “Antibes” cənub regionunun qalibi kimi finalda “Lill”li üstələyir və ölkə çempionu olur. Amma çempionluqdan sonra finalda oyun alqı-satqısı olduğu məlum olur. Qalmaqalda isə Villaplan və “Sete”də onunla komanda yoldaşı olmuş daha iki futbolçunun adı hallanır. Hər üçü komandadan uzaqlaşdırılır. Fürsətdən yararlanan “Nitsa” isə qəhrəmanımızı heyətinə cəlb edir. Amma onlar sonradan bu keçidə görə peşman olurlar. Çünki futbolçu xeyli məşq buraxır və vaxtının çoxunu hipodromda keçirir. Yekunda “Nitsa” 28 yaşlı futbolçunu komandadan kənarlaşdırır. Bundan sonra 2 il də onu futbola gətirən Viktor Gibsonun rəhbərlik etdiyi 2-ci liqa komandası olan “Hispano-Bastidien”də forma geyinir. Amma burada da intizamsız davranışlarına görə komandada qovulur və 30 yaşında futboldan gedir. Onun adı bundan sonra bir də Paris və Kot de Azurdakı at yarışlarındakı yarışların nəticəsini əvvəldən müəyyənləşdirdiyinə görə hallanır. Daha sonra isə İkinci Dünya Müharibəsi başlayır…
1940-cı ildə Paris Almaniya tərəfindən işğal edilir. Nasistlər Parisi tamamilə əldə etmək üçün qara bazardan tutmuş, ikinci əl satıcılara, mafiyaya kimi hər yerə bir neçə adam salıb fransızlarla əlbir olurlar. Parisin ən tanınmış mafya liderlərindən Anri Lafont bu mənada onlara köməkçi olur. Almanlar ilk vaxtlarda onu aradan götürmək istəsə də, o, həyatını xilas etmək üçün SS-ə belçikalı bir azadlıq qrupunun rəhbərini özü şəxsən təslim edir və etibar qazanır. Məhz, bundan sonra Parisi əl altından idarə edilməsi ona tapşırılır. O da həmin vaxt həbsdə olan və ona kömək edə biləcək bütün cinayətkarları azadlığa buraxdırır. Məsələn, əvvələr Parisin polis rəhbəri olan, amma adı qalmaqallara qarışdığına görə tutulan Pyer Bonnini azadlığa çıxarıb əsas adamı edir. Qızıl bazarını idarə etmək üçün isə bir müddət əvvəl sözügedən bazarda qanunsuz işlər gördüyünə görə həbs edilən yaşıl meydanların sabiq ulduzu Villaplanı azad edir. Lafont onu dəstəsinə götürür və Parisi uzun illər istismar edən, “93 rue Lauriston” olaraq Fransa tarixinə düşən, bu gün də unudulmayan adresdə məskunlaşır və Fransa Gestaposu kimi qəbul edilir. Adolf Hitlerin ən çox güvəndiyi Henrix Himmlerin idarə etdiyi Alman Gizli Polisi Gestaponun Fransa şöbəsində artıq Villaplan da yer alır.
1944-cü ildə Anri Lafont alman siyasi düşüncəsini afrikalı xalqlara və Parisdə yaşayan ərəblərə tanıtmaq və onları kommunizmdən uzaq tutmaq üçün başqa bir təşkilat yaratmağı təklif edir və razılıq alır. “North African Brigade” adı ilə qurulan təşkilat Villaplan kimi bir çox Şimali Afrika mənşəlilərin yer aldığı bir qrup olur və nasistlərlə iş birliyinə girib sərvətlərini daha da artırır. Villaplan təşkilatda leytenant rütbəsi ilə xidmət edir. Bir çox yəhudi, kommunist, homoseksual, hətta əqli və fiziki qüsurlu insan təşkilatın işkəncələrindən sonra Lauriston məhəlləsi 93 ünvanında qətlə yetirilir. Hətta Villaplanın rəhbərlik etdiyi bir basqında 17-26 yaş aralığında 11 nəfər üsyana cəhd etməkdə günahlandırılır və güllələnir. Özü də gəncləri güllələyənlər arasında yer alır. Onun şöhrəti Parisdə artıq meydandakı çıxışı ilə yox, zalımlığı və qəddarlığı ilə yayılır. O, bir dəfə yəhudini gizlətdikləri ittihamı ilə Jeneviev Leonard adlı bir fransızın evinə basqın edir. Villaplan Leonardın 59 yaşlı anasına yəhudinin yerini deməsi üçün işkəncələrə məruz qoyur. Daha sonra isə 2 kəndliyə təcavüz elətdirib, onları güllələtdirir. Antonyo Bahmann adlı yəhudi ələ keçirilir. Villaplan bu səbəbdən onu gizlətdiyinə görə Leonarddan 2000000 frank tələb edir.
Vaxt keçdikcə Almaniyanın müharibəni uda bilməyəcəyi bəlli olur. Villaplan da bunu hiss edir və təşkilatdakı bir çox adamı müharibədən sonra həbs ediləcəyini təxmin edərək onların ölkədən qaçmasına kömək edir. Bu yolla bir tərəfdən də nasistlərlə işləmə səbəbinin vətəndaşlarını xilas etmək məqsədi olduğunu göstərməyə çalışır. O, beləcə dələduzluq, xəyanət və zalımlıqdan əlavə ikiüzlülük də edir. Ona bu xüsusiyyətlərinə görə “SS Mohammed” ləqəbi də verilir.
1944-cü ilin avqustunda Paris əsarətdən xilas olur. Az qala yarısını afrikalıların təşkil etdiyi azadlıq tərəfdarlarının mübarizəsindən sonra şəhər azad edilir. 4 il davam edən alman faşizminin ardından xalq bu xəyanətkarları mühakimə etməyə başlayır “North African Brigade” təşkilatı, Lafont və Villaplannın da aralarında yer aldığı nasistlərlə əlbir olan hamıya cinayət işi açılır. Məhkəmə qeydlərində şahidlərin Villaplan və dəstəsinin insanları yağmaladıqlarını, təcavüz və işkəncə etdiklərini, qətlə yetirdikdən bir neçə saniyə sonra qurbanlarının qanlı bədənlərindən zinət əşyalarını çıxardıqlarını qeyd ediblər. Onlar Villaplanın və dəstəsinin bunları edərkən sevincli, vecsiz və sakit olduğunu bildiriblər. Dəstə üzvləri isə onun anadangəlmə dələduz olduğunu, məqsədinə çatmaq üçün şantaj, şiddət də daxil olmaqla hər yola əl atdığını deyiblər. İfadələrə görə Villaplan bir dəfə alman hərbi formasında bir fransız kəndinə girib və “bu almanlar bizə öz formalarını geyindirməyə başladılar, amma narahat olmayın, belə bir vəziyyətdə belə insanları qorumağa çalışıram, indiyə kimi əllərindən 54 nəfəri xilas etmişəm, 55-ci üçün 400 000 franka ehtiyacım var” deyərək bu pulu ona verməyənləri üstüörtülü şəkildə ölümlə təhdid edib.
Villaplan və bütün dəstə üzvləri ölüm cəzasına məruz qalır. 1944-cü ilin 26 dekabrında Aleks Villaplan, Anri Lafont, Pyer Bonni və 5 dəstə üzvü Parisin Fort de Montrouge bölgəsində şəhər kənarına aparılır və güllələnir. Cəmi 14 il əvvəl ölkənin qüruru olan adam 39 yaşında vətən xaini kimi yaşıllıq bir sahədə öldürülür. Cəsədinə belə yaxın duran tapılmır…