“Bilik gücdür, çox çalış, nəzakətli ol!“
Bu şüar Britaniyanın ən nizam-intizamlı məktəbi olan Mikaela İcma Məktəbinə (MCS) məxsusdur.
Məktəbin tarixi elə də uzaqlara getmir. 2014-cü ilin sentyabrında Londonda Ketrin Birbalsinq və Suella Breyverman tərəfindən əsası qoyulub. İlk əvvəl məktəbdə 7 yaşında 120 şagird təhsil alırdısa, 2020-ci ildə bu rəqəmin 840 nəfər olması planlaşdırılır. Şagirdlərin təxminən 50%-i (ölkə üzrə səviyyədən – 22% – təxminən iki dəfə çoxdur) yeddinci, 25%-i doqquzuncu (ölkə üzrə səviyyə 4.5%) səviyyədə təhsil alır.
Məktəb öz adını Birbalsinqin müəllim yoldaşı olmuş Mikaela Emanusun adından götürüb. (M.Emanus 2011-ci ildə xərçəngdən dünyasını dəyişib) Burada təhsil tam pulsuzdur.
Məktəbdə çox ciddi qaydalar hökm sürür. Dərsə gecikməyə, hətta qələmi evdə unutmağa, tapşırığı hazırlamamağa və ya səliqəsiz yazıya, dəftər-kitabı pis saxlamağa görə çox ciddi cəzalar verilir. Dərs zamanı siniflərdə sanki ölüm səssizliyi olur. Tənəffüs zamanı dəhlizdə şagirdlər nizamlı şəkildə, bir cərgə ilə hərəkət edir. Sinifdə hətta şagird gözlərini oynadarsa belə, müəllim tərəfindən ciddi cəzalandırılır.
Uşaqlar məktəbdə səhər yeməyi və nahar edirlər. Bir şagird üçün günlük yemək 2.50 funt-sterlinq dəyərində olur. Valideynlər də övladları ilə burada nahar edə bilərlər. Lakin evdən yemək, qəlyanaltı, hətta saqqız gətirilməsinə icazə yoxdur.
Məktəbin bir özəlliyi də odur ki, ayaqyolunda güzgü yoxdur. Bu da orada bəzi şagirdlərin vaxt keçirmələrinin qarşısının alınmasına hesablanıb.
Ağır disiplin məktəbin uğurlarının açarıdır. Belə ki, hər il demək olar ki, bütün şagirdlər ölkənin nüfuzlu ali məktəblərinə qəbul olunurlar.
