Avstraliyanın Yeni Cənubi Uels Universitetinin mütəxəsisləri bir çox qadınların sosial şəbəkələrdə niyə açıq-saçıq şəkillər paylaşmasının əsl səbəblərini araşdırıblar. Bunun üçün onlar 113 ölkədən on minlərlə qadının sosial şəbəkə hesablarını müşahidə ediblər.
Bir məsələ aydındır ki, patriaxal cəmiyyətdə qadınların zahiri gözəlliyi onların digər keyfiyyətlərindən daha üstün hesab edilir. Buna görə də qadınlar daha yaxşı görünməyə çalışır və hər vəchlə kənardakıların diqqətini cəlb etməyə cəhd edir. Lakin sosial şəbəkələrdə bir çox xanımlar seksual fotolar paylaşmaqla, daha çox diqqəti cəlb edir. Bəs bunun səbəbi nədir?
Kandiss Bleyk (Khandis Blake) iddia edir ki, iqtisadi qeyri-bərabərliyin, kişilərin hakim olduğu və gender bərabərsizliyinin güclü olduğu cəmiyyətlərdə qadınlar internetdə seksual fotolar paylaşmaq üçün daha çox güc və vaxt sərf edirlər. Yəni bu iqtisadi bərabərsizlik, hər bir qadını daha gözəl görünməyə vadar edir, onlar şoppinqə və gözəllik salonlarına daha çox vaxt ayırır. K.Bleyk əlavə edərək deyir ki, “əgər bir gənc xanım bikinidə seksual fotolar paylaşırsa, bu, onun yüngül əxlaqlı olmasına dəlalət etmir. Siz ona ağır sosial oyunun strateji oyunçusu kimi baxın. O, sadəcə həyatda hamıdan daha çox şeyə nail olmağa çalışır…”