Kolorektal (yoğun bağırsaq-düz bağırsaq) xərçəngi ABŞ-da qadın və kişilərdə rast gəlmə tezliyinə görə 3-cü ən çox aşkarlanan xərçəng sayılır. Pəhriz və qidalanma xərçəngin əmələ gəlməsində rol oynayır, xüsusilə də kolorektal xərçəngin yaranmasında. Düzgün həyat tərzi, meyvə və tərəvəzlərlə zəngin qida, qidada qırmızı ətin və ətdən alınan yarımfabrikatların azaldılması bu xərçəngin əmələ gəlmə riskini xeyli azalda bilər. Yüksək fiziki aktivlik, spirtli içkilərin qəbulunun azaldılması, tütünçəkmədən uzaq durma, bədən çəkisinin norma daxilində stabil saxlanılması da sizləri kanser xəstəlitinə qarşı qoruya bilir. Qida rasionunuza anti-kanser məhsulların daxil edilməsi, kanser hüceyrələrini yaradan qidalardan uzaq olmaniz da çox vacibdir.
Kalsiumla zəngin qidalar kolorektal xərçəngin əmələ gəlməsini önləyir. Kalsium ilə zəngin qidalar süd və süd məhsullarıdır. Çoxlu süd, qatıq, pendir, tvoroq, yağ hətta dondurma yeyin.
Bütöv dənli bitkilər bizim gündəlik rasionumuzda çox azdır. Qarabaşaq, yulaf, darı, buğda, qəhvəyi düyü və s. kimi dənli bitkilərin tərkibində orqanizmə lazım olan minerallar, mikroelementlər və ən əsası liflər vardır. Bu liflər bağırsaqda olan toksiki maddələri özü ilə orqanizmdən kənarlaşdırır. Tədqiqatlara görə ABŞ-da hər adamın gündəlik rasionunda bu xeyirli liflərin miqdarı 16 q-dır. Halbuki 25-30 q olması daha sağlıqlı sayılır. Lifli qidaların çoxluğu insan orqanizminə heç bir zərəri yoxdur, əksinə daha da xeyirlidir, hətta artıq çəkidən qurtarmağa da yardım edir. Paxlakimilərin da rasionumuzda artırılması vacibdir. Bir tərəfdən zəngin və asan mənimsənilən proteinlər, digər tərəfdən də müxtəlif vitaminlər, mikroelementlərlə zəngin olan paxlalılar çox xeyirli məhsullardır. Qidamızda parlaq, rəngarəng meyvə və tərəvəzlər tükətməliyik. Sübut olunmuşdur ki, onların tərkibindəki fitokimyəvi birləşmələr, vitaminlər, antioksidantlar orqanizmi xərçəng hüceyrələrindən, iltihabi proseslərdən, xroniki xəstəliklərin əmələ gəlməsindən qoruyur, orqanizmin immunitetini , yaşam keyfiyyətini artırır.
Yumurta, bol qırmızı ət, ağ çörək, un və un məmulatlarının həddən artıq tükətilməsi isə şəkər, xərçəng, ürək-damar xəstəliklərinin rast gəlmə tezliyini artırır, insanları kök, piyli edir, onları müxtəlif xroniki xəstəliklərlə üz-üzə qoyur.
Maləsəf Azərbaycanda hələ də müxtəlif cür şirniyyatların hazırlanması və tükətilməsi qida mədəniyyətinin bir hissəsi olaraq qalır. Evlərdə süfrələrin üstündə cürbəcür konfetlər, şirniyyatlar saxlanılır, uşaqlar bu qidalarla böyüdülür.
Vərdişlərinizi dəyişin, stolun üstündə vazalarda konfet, şirniyyat yerinə təmizlənmiş yerkökü, alma, qoz-fındıq, qurudulmuş, şəkərlənməmiş meyvələr qoyun. Sezonunda aşırı miqdarda mer-meyvə və tərəvəzdən hazırlanmış yeməkər yeyin, parklarda gəzin, yayda dənizdə üzün- bir sözlə daima fiziki aktiv olun. Orqanizminizə qayğı ilə yanaşın və siz qarşılığını alacaqsınız.