Diktatorun insan əti yeməsi barədə fransız qəzetləri gen-bol yazılar yazırdı. Hətta otağında insan əti ilə dolu soyuducunun şəkilləri də yayılmışdı.
Mərkəzi Afrikanın dəhşət saçan diktatoru: Bokassa
Jan Badel Bokassa (Jean Badel Bokassa) və ya Səlahəddin Əhməd Bokassa və ya I Bokassa…
Qara qitənin başına bəla olan digər diktatorlar kimi Bokassa da hərbçi idi. Missioner məktəbində oxuduqdan sonra fransız ordusunda xidmətə gedir, II Dünya Müharibəsində almanlarla, ardınca da Hind-Çində kommunistlərlə döyüşür…Bu xidmətlərinə görə, Fransanın bir çox ali orden və medalları ilə mükafatlandırılır. Mərkəzi Afrika Respublikası müstəqillik əldə etdikdən sonra ölkənin başına öz əmisi oğlunun keçməsi, onun yolunda yaşıl işıq olur. Baş Qərargah rəisi təyin olunur. Bir müddət sonra isə araları dəyir bunların.1966-cı ildə öz əmisi oğlunu devirərək, hakimiyyəti ələ alır.
Özünü imperator elan edir Bokassa…
Digər Afrika dövlətlərində olduğu kimi Mərkəzi Afrika Respublikasında da səfalət, işsizlik, xəstəlik tüğyan edir. Özü isə bolluq içərisində hökmranlıq edir.
1976-cı ildə ölkənin monarxiya və ölkənin adının Mərkəzi Afrika İmperatorluğu olduğunu elan edir. 22 milyon dollarlıq tac qoyuma mərasimi keçirir, halbuki ölkə büdcəsinin 1/4-i qədər idi bu məbləğ…
Ölkədə işkəncə, zülm gündəlik həyat tərzinə çevrilir. Müxalifətçiləri bağında saxladığı aslan və timsahlara yedirtmişdi. Özünün də insan əti yeməkdə günahlandırırdılar. Hərçənd ki, sonralar bu iddianı rədd edəcəkdi, lakin maddi sübutlar vardı…
Səbr kasasını daşdıran addımı isə 100 tələbəni öldürməsi oldu. Belə ki, 1979-cu ildə onun qoyduğu uniforma qanununa görə, hər kəs bu formada gəzməli idi. 100 nəfər tələbə isə bundan imtina etdikdə, onları edam etdirir. Bu, dünya ictimaiyyəti tərəfindən də qəzəblə qarşılanır, hətta Fransa da onu müdafiə etməkdən boyun qaçırır. Beləliklə, onu hakimiyyətdən devirirlər və keçmiş ölkə başçısı yenidən hakimiyyətə gətirilir.
Bokassa Parisə qaçır. Onu burda sevməsələr də, vaxtilə ona verilən orden-medallar fransızları çarəsiz edir. Bir müddət sonra isə onu aldadıb ölkəsinə geri qaytarırlar və həmən həbs olunur. əvvəlcə, edam cəzasına, daha sonra isə ömürlük həbs cəzasına layiq görülür. Lakin 7 il həbsdə yatdıqdan sonra keçmiş cangüdəni və hazırki dövlət başçısı tərəfindən 1993-cü ildə azad olunur. 3 noyabr 1996-cı ildə isə ürək çatışmamzlığından vəfat edir.
Bokassa, o dövr bütün afrikalı liderlərin fikir babası olan Qəddafi ilə yaxın münasibətdə idi. Bir dəfə onunla görüşdə müsəlman olduğunu söyləmiş, lakin bir neçə ay sonra yenidən katolik bir dövlət başçısı kimi xalqı salamlamışdı. Güman ki, Qəddafidən kredit almaq üçün atmışdı bu addımı…