Yaxın gəlin… Dünya kuboku sırasında bütün dünya ictimaiyyətinin simpatiyasını qazanan xorvat lider Kolinda Qrabar-Kitaroviç’in, “digər üzünü” anlatmağa çalışaq…
Xorvatiya milli komandası, dünya ikincisi olduğu Rusiyada keçirilən Dünya kubokundan qayıdarkən, Zaqrebdəki Ban Jelaçiç Meydanında 4.2 milyonluq ölkə əhalisinin təxminən 500 min nəfəri tərəfindən coşğu ilə qarşılandı. Yığmanın oyunçuları və texniki heyətin dövlət təltifi ilə mükafatlandırılacağı deyilir.
Xorvatiyanın çempionatda qazandığı simpatiya ilə yanaşı, ölkənin prezidenti Kolinda Qrabar-Kitaroviçin turnir boyu milli forma ilə sərgilədiyi görüntülərdən tutmuş, bədən dilinədək göstərdiyi performans hər kəsin ürəyini fəth etdi. Lakin bu gözəl xanımın çoxları tərəfindən bilinməyən “siyasi üzü” də var…
O, Yuqoslaviyanın dağılmasında ən çox əməyi keçmiş serb lider Slobodan Miloşeviçin bir növ xorvat “sinonimidir”. Kitaroviç Xorvatiyanın mərkəz sağ lideri olan Franjo Tudjman’ın partiyasından (HDZ) çıxmış bir dövlət rəhbəridir.
Bu gün Miloşeviçin davamçısı olan Aleksandr Vuçiç, Bosniya savaşında “öldürülən hər serb üçün 100 müsəlman boşnak öldürəcəksiniz” demişdi və Kitaroviç də mahiyyətcə bu zehniyyətə çox yaxın birisidir.
Kolinda Qrabar-Kitaroviç, Xorvatiyada 2014-cü ilin dekabrında keçirilən seçimlərdə 37.2% səs yığmışdı. Rəqibi İvo Josipoviç isə 38.5% səs toplamışdı. 50%-lik baryeri keçə bilmədikləri üçün ikinci tur seçimləri keçirilmiş və Kitaroviç 50.7% səs yığaraq, ölkə rəhbəri adını qazanmışdı.
Onun hakimiyyətə gəlməsindən sonra Xorvatiyada millətçilik ideyaları üstünlük qazanmağa başladı.
Milli komandanın Zaqrebdəki qalibiyyət yürüşü zamanı avtobusa alınan xorvat millətçisi, metal musiqi qrupu “Thompson” (Marko Perkoviç), “Herceg Bosno srce ponosno” – “Herseqovina Bosniya ürəkdən qürur duyur” mahnısını söylədi. Bəs bu mahnı nə anlama gəlirdi?
1991-ci ilin noyabrında Mate Boban liderliyində bosniyalı xorvatlar Tudjman’ın dəstəyi ilə Orta Bosniya və Qərbi Herseqovinada Bosniya-Herseqovina Xorvat Respublikası (xəritədə ağ ərazidə göstərilən mavi hissə) yaratdılar. Bu mahnı da “Böyük Xorvatiya” xəyalına həsr olunmuşdu ki, burada da müsəlman boşnaklar hesaba alınmır.
Bəs “Ustaşelik” (Ustašelik) nədir? Ustaşelik, II Dünya müharibəsində Yuqoslaviya torpaqlarında fəaliyyət göstərmiş xorvat faşist hərəkatıdır. Broz Tito’nun partizanlarına qarşı döyüşmüş, Nasistlər və bəzi boşnaklarla əlbir olub dinc serbləri qətlə yetirmişdilər.
Faşist xorvat Ustaşelərin emblemində yazlmış “Za dom spremni!” cümləsi, “Xorvatların nasist salamlaması” olaraq bilinir. Anlamı, “Ana vətən üçün, hazır!” deməkdir.
