Xalq artisti, xanəndə Arif Babayev 1990-cu ildə musiqi tariximizdə ilk dəfə olaraq, muğam professoru adını alıb. O, həm Azərbaycan Milli Konservatoriyasında, həm də Azərbaycan Dövlət Mədəniyyət və İncəsənət Universitetində pedaqoq kimi fəaliyyət göstərir.
Xalq artisti Mələkxanım Əyyubova 2011-ci ildə “Muğam sənətinin inkişafında dövlət qayğısı” adlı mövzunu müdafiə edib və hal-hazırda Azərbaycan Dövlət Mədəniyyət və İncəsənət Universitetinin professorudur.
Xalq artisti Azər Zeynallı da Azərbaycan Dövlət Mədəniyyət və İncəsənət Universitetinin professorudur. Ona 2009-cu ildə Azərbaycan Respublikasının Prezidenti yanında Ali Attestasiya Komissiyası tərəfindən vokal kafedrası üzrə “dosent”, 2013-cü ildə isə “professor” elmi adı verilmişdir.
Əməkdar artist Gülyanaq Məmmədova “Azərbaycanda xalq və bəstəkar mahnılarının problemlərinin həlli” mövzusunda elmi işi müdafiə edərək, fəlsəfə doktoru elmi adı alıb.
Əməkdar artist Ədalət Şükürov isə 2007-ci ildən iqtisad elmləri namizədidir. O, Baltik Biznes və Turizm Akademiyasında aspirantura üzrə təhsil alıb, elmi işini isə Sankt-Peterburqda müdafiə edib.
Azərbaycan Dillər Universitetinin müəllimi Elxan Şirinov isə dosentdir.
Tanınmış müğənni, əməkdar artist Nüşabə Ələsgərli sənətşünaslıq üzrə fəlsəfə doktorudur. O, Şəfiqə Axundovanın yaradıcılığı ilə bağlı elmi iş yazaraq, 2016-cı ildə müdafiə etmişdir.
Lalə Məmmədova 2016-cıl ildə filologiya üzrə fəlsəfə doktoru adı almışdır.
Aşıq Samirə Əliyeva 2005-ci ildən Azərbaycan Dövlət Mədəniyyət və İncəsənət Universitetində aşıq sənəti ilə bağlı dərs deyir. O, sənətşünaslıq üzrə fəlsəfə doktorudur.
Azərbaycan Milli Konservatoriyasının müəllimi, əməkdar artist, opera müğənnisi, muğam ifaçısı Gülüstan Əliyeva da 2017-ci ildə dosent adı alıb.
Nəhayət,bir-iki gün əvvəl xalq artisti Nazpəri Dostəliyeva da “Azərbaycan şərq və qərb aşıq məktəblərinin xüsusiyyətləri və ifaçılıq ənənələrinin müqayisəli təhlili” mövzusunda dissertasiya işi müdafiə edərək, fəlsəfə doktoru elmi adı alıb.
