Amerikalı alimlər arxeoloji qazıntılar nəticəsində əldə etdikləri tapıntılara əsasən, qədim Misirdə, konkret olaraq Kleopatra dönəmində istifadə olunan ətirləri bərpa edə biliblər.
Manoada Havay Universitetinin alimləri bu məsələ üzərində çoxdan baş sındırırdılar. Hətta onlar 2012-ci ildə Misirdə Tmuit şəhərində qazıntılar nəticəsində ətir satıcısının mağazası ehtimal edilən bir obyekt aşkarlayıblar. Burada onlar qatı maye şəklində izlərə rast gəliblər. Düzdür, bu tapıntının hər hansı iyi yox idi, lakin müəyyən kimyəvi analizlər nəticəsində bu qatqının inqredientlərini aşkar etmək mümkün olub.
Alimlərin qənaətinə görə, o dövrün ətirləri, əsasən, mirradan (Burzer ailəsinə mənsub Afrika və ərəb ağaclarından alınan kitrəli qatran), habelə, hil, darçın və zeytun yağından hazırlanırdı.
Alimlər onu da qeyd edir ki, o dövrün ətirləri indikilərdən daha qatı və yapışqan olub.
