İntellektual və bədii oyanış dövründə dünyaya gələn Con Di (John Dee) Yelizaveta İngiltərəsində çox tez bir müddətdə yüksəliş yaşamış riyaziyyatçı, geoqraf, astroloq, filosof, okkultist, əlkimyaçı və naviqator olub.
O, 13 iyul 1527-ci ildə London yaxınlığında Tauer Uard qəsəbəsində, parça taciri Roland Dinin ailəsində anadan olub. Onlar mənşəcə uelsli idilər.
1535-ci ildə Çelmsfordda məktəbə daxil olur, 1524-cü ildə Kembric Sent-Con Kollecində təhsilini davam etdirir. Burada latın dili, qədim yunan dili, fəlsəfə, həndəsə, arifmetika və astronomiya dərsləri alır. Müasirlərinin sözlərinə görə, o, sutkanın 18 saatını dərslə məşğul olur, 4 saat yatır və 2 saat yemək yeyirdi. Ən sevdiyi elm riyaziyyat idi. 1546-cı ildə Kembricin ən iri kolleci olan Triniti Kollecinə daxil olur.
Bundan sonra 1548-1551-ci illərdə Avropa ölkələrinə səyahət edir, Belçikaya – Avropanın ən böyük katolik universitetlərindən biri olan Leuvenə gəlir və burada çalışır. Daha sonra Parisə gəlir, burada Evklidin əsaslarından mühazirə deyir. Ona burada qalıb, professor kimi riyaziyyatdan mühazirələr demək təklif olunur, lakin o razı olmur.
Con Di İngiltərəyə qayıdır və 1552-ci ildə 1-ci Pembruk qrafı, daha sonra Nortumberlend hersoqu kimi xidmətə başlayır. Bu zaman qabarmalar haqqında traktat yazır.
1553-cü ildə İngiltərədə hakimiyyətə katolik Mariya Tüdor gəlişindən sonra protestantlara qarşı repressiyalar başlayır. Con Dinin atası həbs olunur, tezliklə azad olunsa da, mal-mülklərinə əl qoyulur. Bir il sonra ona Oksfordda riyaziyyatdan dərs demək təklif olunsa da, o, maddi durumunun ağır olmasına rəğmən, bundan imtina edir.
28 may 1555-ci ildə Con Di həbs olunur. Səbəb, gülməli də olsa riyaziyyatla məşğul olması idi. İddia edilirdi ki, riyazi hesablamalar vasitəsilə o, cadugərliklə məşğul olurdu. Az sonra onu hətta dövlətə xəyanətdə də suçlayırlar. Lakin məhkəmədə bəraət alır.
1558-ci ildə Mariya Tüdor öldükdən sonra hakimiyyətə Yelizaveta keçir. Ölkədə protestantlıq bərqərar olunur. Con Dinin şan-şöhrəti saray daxilində daha da yüksəlir, hətta Yelizavetanın şəxsi astroloqu təyin edilir. Yelizaveta, həmçinin Dinin təyin etdiyi tarixdə öz tacqoyma mərasimini keçirir.
Con Di bu illərdə mistika, magiya və ruhlar aləmindən bəhs edən Monas hieroglyphica adlı kitabını yazır.
Con Di daha sonra Edvard Kelli (Edward Kelley) adlı medium ilə tanış olur. Onlar birlikdə yeni əlifba icad edirlər. Guya bu əlifba onlara mələklər tərəfindən nazil edilib. Onlar birlikdə seanslar keçirir, guya mələklərlə əlaqəyə girirdilər. Sonradan bu əlifbaya “Enox əlifbası” adını verirlər.
Con Di 26 mart 1609-cu ildə 81 yaşında Mortleykdə dünyasını dəyişir.
O, üç dəfə evlənib və 8 uşağı olub. Böyük oğlu Artur Di də həmçinin kimyagərlik və hermetik fəlsəfə ilə məşğul olub.
