Paul Cozef Göbbels (Paul Joseph Goebbels) 29 oktyabr 1897-ci ildə Prussiyada, Reyn vilayətinin Raydt qəsəbəsində dünyaya gəlmiş, Hitlerin ən yaxın dostu, Nasist Almaniyasının Təbliğat naziri olmuşdur.
1917-ci ildə kolleci bitirmiş, lakin fiziki qüsurlu (sağ ayağı sol ayağından 3.5 sm qısa olub) olduğuna görə, hərbi xidmətə aparılmamışdır. 1925-ci ildə Nasist partiyası ilə tanışlığı, onu Hitler ilə yaxınlaşdırmış və 1933-cü ildən Təbliğat naziri vəzifəsində çalışmışdır.
Xarizmatik aktiv zəkası ilə “Böyük Yalan” adı verilən təbliğat taktikasından çox məharətlə istifadə etməyi bacarmışdır. “Xristianlığın bu qədər təsirli din olmasının səbəbi, 2000 ildir eyni şeyi təkrar-təkrar deməsidir” ifadəsi Göbbelsin sevimli ifadəsi idi.
Onun fəlsəfəsinin əsasını “elə bir yalan de ki, hər kəs inansın” ifadəsi tuturdu. O, medianı pul vasitəsilə ələ almağı və onu istədiyi məcraya yönləndirməyi bacaran bir şəxsiyyət idi.
1945-ci ildə Hitler intihar etdikdən sonra bir günlük hökumətə rəhbərlik etmiş, lakin sonra uşaqlarını zəhərləyib öldürmüş, daha sonra həyat yoldaşını və özünü öldürmüşdü. Vəsiyyəti üzərinə onun və həyat yoldaşının cəsədləri yandırılmışdır.
