Kinematoqrafiya professoru Natan Abrams (Nathan Abrams) Uelsin Banqor Universitetində Stenli Kubrikin indiyədək məlum olmayan ssenarisini aşkar edib.
1956-cı ildə hələ də az tanınan rejissor Stenli Kubrik Ştefan Şveyqin “Acı sirr” povesti əsasında ssenari yazmağa başladı. Uzun illər hesab olunurdu ki, o, bu ssenari üzərində işi yekunlaşdıra bilməyib. Amma indi yüz səhifəlik ssenari aşkar edilib. Üzərində Metro-Goldwyn-Mayer (MGM) kinostudiyasının möhürü və “24 oktyabr 1956-cı il” tarixi olan ssenari gün işığına çıxarılıb.
Kinostudiyanın hansı səbəbdən bu ssenaridən imtina etməsinin səbəbləri aydın deyil. Bir versiyaya görə, ssenaridə anası ilə əlaqə qurmaq üçün bir kişinin 10 yaşlı uşaqla dostluq etməsindən söhbət açılır ki, bu da kinoindustriya sahiblərini o qədər də cəlb etməyib. Digər versiyaya görə isə, Kubrik şirkətlə olan müqavilənin şərtlərini pozubmuş.
1957-ci ildə ekranlara Kubrikin növbəti filmi – “Şöhrətin yolu” (“Paths of Glory”) çıxır, hansı ki, bu da əvvəl MGM tərəfindən rədd edilmişdi.
