Orta və yaşlı nəsil nümayəndələri arasında Toto Kutunyonu tanımayan demək olar ki, yoxdur. Milyonlarla qadın, qalın qaşların altında ciddi və bir qədər də qəmgin görünüşlü, boynunda zərif şərf olan bu yaraşıqlı kişinin pərəstişkarı idi. Onun xırıltılı, sakit səsini eşidilən kimi hər kəs televizor ekranlarının qarşısında donub qalırdı: “Lasciatemi Cantare…”
Toto özü müsahibəsində etiraf etmişdi ki, onun həyatında çoxlu qadın olsa da, qəlbi həmişə yalnız bir nəfərə məxsus olub. Onun şəxsi həyatı uzun illər sirlə əhatə olunmuşdu və pərəstişkarları Totonun ailə həyatındakı incə sirdən xəbərsiz idi.
Valideynlər oğluna Salvatore adını verdilər, lakin sonradan bu ad qısaldıldı və “Toto” oldu. Gələcək müğənninin atası dənizçi idi və boş vaxtlarında musiqi ifa etməyi sevirdi. Salvatore bir az böyüyəndə onu musiqi məktəbinə göndərdilər. Bu istedadlı gənc tezliklə təkcə truba deyil, həm də gitara və akkordeon çalmağı öyrəndi, həmçinin nağara çubuqlarını məharətlə idarə edirdi. Yeddi yaşında Toto artıq atasının yaratdığı həvəskar qrupda nağara çalırdı.
Uşaq ikən Toto bir ailə faciəsinin şahidi oldu; bacısı nahar zamanı təsadüfən boğularaq həyatını itirdi. Şən və qayğısız oğlan bundan sonra çox dəyişdi. O, həmişə xatırlayırdı ki, bəla və ölüm həmişə yaxındır və bir an hər şeyi dönməz şəkildə dəyişə bilər. O vaxtdan onun gözlərinə bir kədər qondu və ömrünün sonuna qədər onunla birlikdə yaşadı.
Kutunyonun valideynləri musiqini sevsələr də, oğullarının ciddi bir peşəyə, məsələn, mühasib peşəsinə yiyələcəyini xəyal edirdilər. Amma onun ruhu artıq mahnılara hopmuşdu. O, insanların qəlbini dərhal fəth edən inanılmaz romantik melodiyalar bəstələdi. Düzdür, əvvəlcə onları özü ifa etməyə utanırdı – Mirey Matye, Co Dassin, Adriano Çelentano üçün mahnılar yazırdı. Və yalnız o zaman ki, Çelentano nədənsə L’italiano (“The Italian”) adlı yeni sinqlı ifa etməkdən imtina edir, Kutunyo mahnısını özü oxumağa qərar verdi. 1983-cü ildə Sanremo festivalında onun çıxışı sensasiya yaratdı. Tutqun, təbəssümsüz, lakin boğuq səsli, yaraşıqlı və sirli bir oğlan bütün dünyanı fəth etdi.
O vaxta qədər Toto artıq boşanmış bir qızla evlənmişdi. Karla varlı ailədən idi, Toto isə kasıb idi. Ancaq onun üçün fərqi yox idi – o, əsl romantik və istedadlı musiqiçi olan bu oğlana bütün qəlbi ilə aşiq olmuşdu. Yalnız illər keçsə də onların övladları olmadı. Toto isə böyük bir ailə, gurultulu uşaq gülüşləri ilə dolu bir ev arzusunda idi. Amma taleyi yenə onunla oyun oynadı. Gəncliyində Karla əkizlərə hamilə qaldı, lakin həkimlər hamiləliyi dayandırmaqda israr etdilər – səhhətindəki problemlərə görə Karla doğuş zamanı ölə bilərdi. Bundan sonra o, sonsuz qaldı və bu, həm onun, həm də Toto üçün əbədi acıya çevrildi. Yox, o, heç vaxt arvadını buna görə danlamadı, amma o kədərli baxışlara qəm kölgəsi daha da çökmüş oldu.
30 yaşlı Kutunyo ulduz olanda tamam başqa həyat yaşamağa başladı. Turnelər, tamaşalar, pərəstişkarlar… Ehtiraslı, enerji dolu italyan, bəzən bir aşiq pərəstişkarı ilə qısa müddətli romantika həvəsinə düşdü. Ancaq hər dəfə peşman olmadan Karlaya qayıtmaq üçün əyləndiyi qızlardan ayrıldı. Müğənni jurnalistlərə açıqlamasında “Həyatımda çoxlu qadın vardı, amma ürəyim yalnız birinə – həyat yoldaşıma aid idi” demişdi.
Bu, bir gün musiqiçi növbəti turnesinə uçmaq üçün təyyarədə görünənə qədər davam etdi. Gənc, Kristina adlı stüardessa onun diqqətini çox çəkmişdi. Bu münasibət Totonun həyatını tamam dəyişdi; həm acılarla dolu, həm də sevincli və gələcəyə ümidli bir həyata qədəm qoydu.
Müğənninin daha sonra etiraf etdiyi kimi, Kristinanın gözəlliyi onu şoka salmışdı və başını itirmişdi. Əvvəlcə buna ötəri həvəs kimi baxsa da, sonradan Kristinanın uşaq dünyaya gətirməsini istədi. Düzdür, demişdi ki, həyat yoldaşından heç vaxt ayrılmayacaq, amma çox istəyirdi ki, uşaqları olsun. Kristinanın hamiləliyini öyrənən Kutunyo hər şeyi Karlaya danışdı.
Onun üçün çox şeydən keçmiş sadiq həyat yoldaşı üçün bu xəbər amansız bir zərbə oldu. Toto sevgilisinə verdiyi ağrıları başa düşürdü, amma onu aldatmaq istəmədi – axı, məşhur müğənninin qeyri-qanuni övladı ilə bağlı xəbərlər onsuz da mediaya sızacaqdı. Bir müddət sonra Karla ərini bağışlamağa və vəziyyəti qəbul etməyə güc tapdı. Totonun oğlu Niko onların evində tez-tez qonaq olurdu. Karla daxilindəki əazbı heç vaxt camaatla bölüşmədi, ərini danlamadı, küskünlüyünün öhdəsindən gəldi. Kutunyo arvadını məhz, buna görə daha çox sevirdi, çünki Karla onu atalıq sevincindən məhrum etmədi, balaca Nikonu qəbul etdi və həmişə musiqiçinin uşağa köməyini dəstəklədi.
Toto Cutugno oğluna yaxşı bir təhsil verdi, onu bir vaxtlar məhrum olduğu hər şeylə təmin etməyə çalışdı. Niko da musiqiçi oldu, tez-tez atasının mahnılarını ifa etdi, lakin populyarlıq səviyyəsinə çata bilmədi. Amma deyəsən, Niko Kutunyo şəxsi həyatında xoşbəxtdir – o, gözəl yunan qadını ilə evlənib.
Və 2008-ci ildə Toto Kutunyo üçün həyatın yeni, çətin və acı mərhələsi başladı. Həkimlər ona dəhşətli diaqnoz qoydular – xərçəng. Müğənni qətiyyətlə xəstəliklə mübarizəyə başladı. O, demək olar ki, fəaliyyətini dayandırdı, həkimlərin bütün göstərişlərinə əməl edərək müalicə olundu. Əməliyyatdan, kimyaterapiya və reabilitasiya kursundan sonra dəhşətli xəstəlik səngidi. Məşhur italyan tamaşaçıların qarşısına yenidən çıxdı. Onun səhnədən ilk sözləri, bütün bu ağır günlərdə yanında olan həyat yoldaşına sevgi və minnətdarlıq sözləri oldu.
O vaxtdan bəri Toto çıxışlarını minimuma endirdi. Daha çox dincəlməyə çalışdı, çoxlu üzdü və dəniz boyu gəzdi, yalnız arabir konsertlər verdi. Bu həyat tərzi və Karlanın qayğısı əfsanəvi müğənninin ömrünü uzatmağa kömək etdi. Toto Kutunyo 22 avqust 2023-cü ildə 80 yaşında vəfat etdi. Dəfn zamanı onun ən məşhur, onu ulduz edən mahnısı “L’italiano” səsləndirildi. Vida mərasimində həyat yoldaşı Karla, ailəsi, dostları və həmkarları ilə yanaşı, musiqiçinin oğlu Niko Kutunyo da iştirak edirdi. Onun yanında Totoya çoxdan gözlədiyi atalıq sevincini bəxş edən və heç vaxt özünü çox göstərməyən anası Kristina dayanmışdı.
