2018-ci ilin aprelində dünya xəritəsində tamamilə yeni bir ad meydana çıxdı. Cənubi Afrika Respublikası ilə Mozambik arasında yerləşən cırtdan Svazilend Krallığı yerləşir ki, hazırda bu dövlətin adı Esvatini adlanır. Kral III Msvati ölkənin müstəqilliyinin 50 illiyi münasibətilə düzənlənən bayram tədbirində ölkənin adının dəyişdirildiyini elan etdi. Ölkənin devizi çox cəsur səslənir: “Biz – qalayıq!”
Esvatini – dualist monarxiyadır. III Msvati (şəkildə solda tərəfdə) ölkədə bütün hakimiyyəti demək olar ki, öz əlində cəmləşdirib, baxmayaraq ki, formal olaraq guya onun hakimiyyətini konstitusiya (və ya konstitusiya aktları) məhdudlaşdırır. O, ölkəni 1986-cı ildən bəri idarə edir.
Msvati artıq 30 ildən çoxdur ki, bütün banknotların üzərində əks olunur. Hətta geyimlərin və suvenirlərin də üzərində onun şəkillərinə tez-tez rast gəlmək mümkündür.
Ölkədə Milli Məclis və Senatdan ibarət iki palatalı parlament fəaliyyət göstərir. Lakin parlament real qanunvericilik səlahiyyətlərinə malik deyil, sadəcə kralın yanında məsləhətverici orqan xarakteri daşıyır. Ölkədə bütün siyasi partiyalar qadağan edilib.
Ölkədə ən məşhur kütləvi tədbir “Qamış rəqsi” və ya Umxlanqadır. Hər il bu bayram tədbirinə ölkənin müxtəlif yerlərindən 50-70 min nəfər yarıçılpaq qızlar qatılır ki, bunların da arasında kral özünə yeni həyat yoldaşı seçir. Bu minvalla, artıq onun 150-dən çox arvadı vardır.
III Msvati “Forbes”in versiyasına görə, dünyanın 15 ən varlı monarxından biridir. Onun çoxsaylı həyat yoldaşlarından hər biri ayrıca sarayda yaşayır.
Bununla yanaşı, Svazilend dünyanın ən kasıb ölkələrindən biri hesab olunur. Ölkə əhalisinin böyük əksəriyyəti günü yarım dollara yaşayır.
Svazilend immun çatışmamazlığı sindromunun geniş yayıldığı ölkələrdəndir: demək olar ki, gənc nəslin təxminən 1/3-i bu virusun daşıyıcısıdır. Şəhər küçələrində bu mövzuda xeyli maarifləndirici reklamları görmək mümkündür.
Svazilend— fövqəladə şəkildə canlı təbiət gözəlliyi olan diyardır; uca dağlar, yamyaşıl meşələr, seyrək də olsa bir çox çaylar təbiətə gözəllik verir.
Nəhəng məməlilərdən “mavi” kəl, antilop, zebra, begemot və fil ən çox rast gəlinənlərdir.
Ənənəvi yerli memarlığın xarakterik xüsusiyyəti dairəvi evlərdir.
Ölkədə iki rəsmi dil var – ingilis və svazi dili. Bununla yanaşı, ölkə əhalisinin 90%-i svazi dilini bilir.
Svazilend gənc dövlətdir; ölkə əhalisinin demək olar ki, yarısı 14 yaşdan kiçikdir.
Svazilendin məhkəmə sistemi bir çox cinayətlərə görə cismani cəzalara icazə verir. Çox zaman yeniyetmələr üçün cəzalar tətbiq edilir. Rəsmən ölüm cəzasına icazə var, lakin 1983-cü ildən bəri bu cəza tətbiq edilməmişdir.
Svazilenddə riyaziyyata aid ən qədim əsərlərdən biri – babuin sümüyü üzərində çizgilər – elmə məlumdur. Buna hətta Lembobo sümüyü də deyilir. Alimlər qeyd edir ki, bu sümük hansısa hesablamalar üçün istifadə olunub. Tapıntının yaşı 37 min ildən çoxdur.
Svazilendə səfər etmək üçün vizanı sərhəddə problemsiz almaq mümkündür.
Mənbə: Vokrugsveta.ru
