6 iyul 2022-ci il, saat 04:03 radələri..
Amerika Birləşmiş Ştatlarının Corciya ştatında yerləşən, “Amerikan Stounhenci” kimi də tanınan Quaydstons (Guidestones) bələdçi daşı kimliyi bilinməyən şəxslər tərəfindən partladıldı.
Kamera görüntülərinə əsasən, partlayışdan bir müddət öncə həmin civarda bir avtomobil görünür, az sonra isə partlayış meydana gəlir və “Şeytanın daşı”, “Dəccalın abidəsi” adını alan sirli Quaydstons daşı yerlə-yeksan edilir.
Bəs bu abidə niyə bu qədər önəmli idi? Nə zaman, kimlər tərəfindən ucaldılmışdı?
Bunun kimlər tərəfindən və nə niyyətlə ucaldılması bilinməsə də, Qiyamət günündən sonra həyatda qala biləcək insanlara yenidən bir mədəniyyət qurmaları üçün bir dərslik, bələdçi rolunu oynayacağı söylənilməkdədir. Dörd böyük daş plitənin üzərində 8 fərqli dildə – ingilis, ispan, hind, ivrit, ərəb, qədim Çin, rus və svahili (Şərqi Afrikada yayılmış dil) dilində – 10 əmr və ya tezis yazılıb. Şaquli duran plitələrin üzərinə qoyulmuş plitədə isə Qədim Babil mixi yazıları ilə, Qədim Misir heroqlifləri ilə, qədim yunanca və sanskritcə də mətnlər mövcuddur.
Hər biri 20 ton ağırlığında, 5 metr hündürlükdə və bir də 12 ton ağırlığında təpə daşı olan bu abidənin tikintisinə 1979-cu ilin iyul ayından başlanılıb. Belə ki, özünü Robert Kristian (özünün də dediyinə görə, şərti ad idi) adlandıran, orta yaşlı bir nəfər Corciya ştatının Elbert şəhərində yerləşən, dünyanın ən yaxşı qranit daşı işlənilən Elberton Granite Finishing adlı şirkətə gəlir və “Mən kiçik bir qrup adından həm saat, həm təqvim, həm də bələdçi olacaq bir qranit abidə sifariş etmək istəyirəm” deyir. Şirkət rəhbəri işin mürəkkəbliyini görüb, ona üçqat artıq məbləğ söyləyir. Lakin adam tərəddüd etmədən qəbul edir.
Elbert şəhər bələdiyyəsində abidənin tikilməsi üçün R.Kristian adına verilmiş bir icazə sənədi mövcuddur, lakin o şəxsin kimliyi bilinmir. Bəzi sənədlərə əsasən, abidənin Ueyn Mulleniks adlı şəxsin sahibi olduğu torpaq sahəsinin ərazisində tikildiyi məlumdur. Bəzi konspirativ iddialara görə, abidə “Gül və Xaç qardaşlığı” adlı gizli cəmiyyətin üzvləri tərəfindən ucaldılıb. Konspirasiya nəzəriyyəçisi Cey Ueydner buna əsas olaraq da, sifarişçi kimi təqdim olunan Robert Kristianın adının inisiallarının (R.C.) əslində, “Qızıl gül və Xaç”ı (“Red Cross”) və ya bu gizli cəmiyyətin qurucusu olaraq qəbul edilən Kristian Rozenkreysin adını simvolizə etdiyini göstərir. Digəriləri bu abidəni satanistlərlə, “Lusifer cəmiyyəti” ilə, günəş kultuna sitayiş edən topluluqlarla əlaqələndirirlər.
Bələdçi daşın ayaqları günəşi il boyunca şərq-qərb yönündə işarət edəcək şəkildə yerləşdirilib. Təpə plitədə açılmış dəlikdən düşən işıq isə aşağıda təqvim üzərində günü göstərir. Bundan başqa, abidənin altı metr altında bir “zaman kapsulası” basdırılıb və plitə üzərində “22 mart 1980” tarixi və “Bu kapsula bir gün açılacaq” cümləsi qeyd olunub.
Bəs daşın üzərindəki “On əmr”də nələr yazılmışdı?
- Fərqlilikləri və inkişafın sürətini ağıllı şəkildə idarə et;
- Bəşəriyyəti bir dil ətrafında birləşdir;
- İnancı, ehtirası, adətləri və hər şeyi idarə et;
- İnsanları və dövlətləri ədalətli qanunlar və məhkəmələrlə qoru;
- Bütün xarici anlaşılmazlıqları ölkələrdən üstün olan uca məhkəmə ilə həll et;
- Kiçik qanunlardan və istifadəsiz protokollardan qaç;
- Şəxsi hüquqları sosial vəzifələrlə uyğunlaşdır;
- Gerçəyi, gözəlliyi, məhəbbəti sonsuzluqla ahəng qurma arayışını təqdir et;
- Dünyada bir xərçəng xəstəliyi olma, təbiətə yer ver, təbiətə yer ver.
Bura qədər səsləndirilən cümlələrdə hər hansı qeyri-adi fikrin olmadığı görünür. Lakin sonuncu, yəni onuncu əmr qorxuncdur: “İnsanların sayını daim 500 milyon nəfərin altında saxla!”
İndiyədək bir dəfə, 2008-ci ildə bir gecədə abidənin üzərinə graffiti ilə “Yeni dünya düzəninə ölüm!”, “Heç kimsə dünya lideri deyil” kimi yazılar yazıldı, sonra isə təmizləndi. Görünür, abidənin dağıdılmasına bu qorxunc cümlə səbəb olub. Amma niyə 43 il sonra, kimlər tərəfindən, müəmma olaraq qalır…
