1989-cu il…Müqəddəs Valentin günü idi…İranın ali dini lideri Ayətullah Xomeyni hind əsilli yazıçı Salman Rüşdinin ölümünə fətva verir. Fətvanın səbəbi isə yazarın qələmə aldığı “Şeytan ayələri” adlı kitab idi.
Qısaca onu qeyd edək ki, Salman Rüşdi 19 iyun 1947-ci ildə Hindistanın Bombey şəhərində biznesmen ailəsində anadan olub. 1961-ci ildə təhsil almaq üçün İngiltərəyə yollanıb. 1964-cü ildə Böyük Britaniya vətəndaşlığını alıb. Kembric Uniiversitetinin tarix fakültəsini bitirib.
Fətva bütün müsəlman ölkələrinə xitabən verilmişdi. Rüşdinin başına qoyulan pulun məbləği 1 milyon dollar idi, lakin az sonra bu məbləğ daha da qalxacaqdı. Yazıçının həyati təhlükədə olduğunu görən Britaniya xüsusi xidmət orqanları Rüşdini sıx qorumaya alır və yazar demək olar ki, ortalıqdan yoxa çıxır.
Hindistan və digər dörd müsəlman ölkəsində protestlər başlayır. Ən ciddi etirazlar Pakistanda olur. Qəzəbli kütlə hər yerdə onun kitablarını yandırır, kitabxanaları yağmalayır. Hətta yazarın kitabını tərcümə etmiş bir neçə tərcüməçi də ciddi təqiblərə məruz qalır. “The Atlantic” dərgisinin redaktoru Conatan Rauç (Jonathan Rauch) yazırdı: “Britaniyada, Kaliforaniyada, Belçikada, Norveçdə və İtaliyada etirazçılar kitabxanalara hücum edirdilər. Yapon tərcüməçi Hitoşi İqaraşi də daxil, ən az 22 nəfər öldürüldü…” Ondan başqa, norveçli tərcüməçi də saldırıya uğrayır, lakin canını qurtara bilir. Daha sonra bir türk tərcüməçi də terrorla üzləşir. İtalyan tərcüməçi Ettoro Kapriolo da eyni aqibətlə qarşı-qarşıya qalır.
1998-ci ildə İran İslam Respublikasının prezidenti Əl-Xameneyinin göstərişi ilə bu fətva aradan qaldırılır.
