Son yüz ildən bəri araşdırmaçılar dünya nizamının, siyasi proseslərin dövlətlər tərəfindən deyil, gizli cəmiyyətlər tərəfindən idarə olunduğunu iddia edirlər. İlluminati, masonluq, Qızıl gül və Xaç qardaşlığı, Opus Dei və digər gizli cəmiyyətlər barədə yüzlərlə, hətta minlərlə əsərlər yazılıb, filmlər çəkilib. “Buynuzlu konspirasiya” nəzəriyyəçiləri bütün pis hadisələrin kökündə mütləq bir şeytani gücün olduğunu iddia edir və maraq baxımından bu iddialar öz ətrafına bir xeyli dəstəkçilər toplaya bilir.
Belə konspirasiyalar xristian dininin siyasi mərkəzi hesab olunan Vatikan ətrafında da uçuşmaqdadır. Xristian kilsə məclisləri, papalar, Tamplier Ordeni, Opus Dei, Yezuitlər konspiroloqların ən sevdiyi mövzular sırasındadır.
Bir də son illər yeni bir mövzu gündəmi məşğul edir: “Qara Papa”.
Kimdir bu “Qara Papa”? Doğrudanmı, belə bir şəxs var? Doğrudanmı, bu şəxs Vatikanın həqiqi idarəçisidir?
Bu suallara cavab vermək çox çətindir, hətta mümkünsüzdür. Çox vaxt belə mövzular hər hansı araşdırmaçının məsuliyyətsiz açıqlamaları nəticəsində də gündəmdə bomba effekti yarada bilir. Düşünürəm ki, bu da belə qəbildəndir.
Karen Hyuds adlı bir xanım var. Yel Universitetinin məzunudur. ABŞ İxracat-İdxalat Bankında yüksək vəzifələrdə çalışıb. Lakin Dünya Bankı 2007-ci ildən bu adda əməkdaşın orada işləmədiyini qeyd edib. 2011-ci ildə “PLOS One” dərgisində yayınladığı araşdırma ilə Hyuds, “Qara Papa” adlandırılan bir varlığın dünyanı tam nəzarətdə saxladığı iddiaları ilə tanınmağı bacarıb. İşdən qovulduqdan və Dünya Bankının vəzifəlilərindən “pərdə arxasındakı kukla ustaları” haqqında araşdırmanı buraxmasını tələb edən təhdidlər aldıqdan sonra məsələni jurnalistlərə anlatmağa qərar verib.
O qeyd edirdi ki, bu varlıq güman ki, insan deyil, heç yadplanetli də deyil. Ola bilsin ki, texnoloji üstünlük əldə etmiş başqa bir insan irqinə mənsubdur. İQ-su çox yüksəkdir, duyğuları yoxdur,
Məsələnin bu qədər fantastikləşdirilməsinə açığı inanmıram, lakin mümkündür ki, pərdə arxasında hadisələri idarə edən şəxs və ya cəmiyyət mövcud olsun. Əgər söhbət Vatikandan gedirsə, bunun Yezuitlər ordeni olması ehtimalı çox yüksəkdir.
Ümumiyyətlə, “Qara Papa” ünvanını daşıya biləcək potensial şəxsləri araşdırdıqda onun hazırki Yezuit generalı Arturo Sosa Abaskal olduğu qənaətinə gəlinir. O, 2016-cı ildə Yezuit ordeninin 31-ci Ümumi Yığıncağında seçilib.
Arturo Sosa 1948-ci ildə Venesuelanın paytaxtı Karakas şəhərində anadan olub. 1966-cı ildə Yezuitlər ordeninə daxil olub. Politologiya üzrə elmlər doktorudur. Bilinən və qəbul edilən odur ki, “Qara Papa” Arturo Sosa rəsmi papanın (Papa Fransisk) idarəçiliyi altındadır və onun əmrinə tabedir. Lakin konspirasiya nəzəriyyələri hər zamankı kimi öz işini görür…
