Gizli cəmiyyətlərin hekayələri əsrlər boyu mövcuddur və daim insanların marağına səbəb olur. İlluminati, masonluq, Sion Priorluğu, Tamplier Ordeni və s. Bu gizli və sirli cəmiyyətlər barədə hər nə qədər çox məlumatlar mövcud olsa da, bir o qədər də doğru məlumat qıtlığı var.
Belə gizli cəmiyyətlərdən biri də Hindistanda 2 min ildir mövcud olmuş Naməlum Doqquz Adam cəmiyyətidir.
Mauriya sülaləsinin ən qüdrətli hökmdarı hesab olunan Aşoka ən amansız kral kimi tanınırdı. Amma bu da bir həqiqət idi ki, onun dövrü Hindistan tarixində ən parlaq dövr hesab olunur. Onun dövründə imperiyanın hüdudları Hindistan və ondan kənara yayılmışdı.
Lakin zaman keçdikcə Aşoka anlamağa başladı ki, işlər təkcə yeni-yeni torpaqları fəth etməklə, düşmənləri amasızlıqla məhv etməklə yürümür. Xüsusilə, Kalinqa müharibəsində 150 mindən çox insanın həyatını itirməsi, onun dünyagörüşünün dəyişməsində əhəmiyyətli rol oynadı. O anladı ki, müharibə ilə, öldürməklə hər şeyi etmək mümkün deyil, ölkəsinin malik olduğu elmi bilikləri məqsədyönlü şəkildə istifadə etməklə və bu bilikləri daha da genişləndirməklə daha çox imkanlar əldə edə bilər. Həmçinin onu da anladı ki, bu biliklər adi insanların əlinə keçsə daha dəhşətli nəticələr meydana çıxa bilər. Bunun üçün bu biliklərin əldə olunması, inkişaf və tətbiq edilməsi üçün bir qrup formalaşdırmaq ehtiyacı yarandı. Beləliklə, e.ə. 273-cü ildə Naməlum Doqquz Adam cəmiyyətini yaratdı. Bu cəmiyyət haqda məlumatlar bizə 1923-cü ildə Albert Mundi tərəfindən Adventure dərgisində seriya məqalələr dərc olunduqdan sonra məlum oldu. Mundinin özü iki il Hindistanda ingilis ordusunda xidmət etmişdi.
Bu cəmiyyətə daxil olan insanların kimliyi hələ də naməlumdur. Düzdür, onların kimliyi barədə müəyyən mülahizələr irəli sürülür, lakin qeyd edilən şəxslərin hamısı ya Aşokadan bir neçə əsr əvvəl, yaxud sonra yaşayıb. Sadəcə onların elmin müxtəlif sahələlərində çox tanınmış, müdrik şəxs olmaları bu ehtimala əsas verir. Məsələn, bunlardan Çanakya (Kautilya), Çaraka, Patanjali, Susruta, Aryabhata, Varahamihira və s. adlarını qeyd etmək olar. Məlum olan odur ki, onların hərəsi bir istiqamət üzrə fəaliyyət göstərmək, elmi bilikləri toplamaq, genişləndirmək və mühafizə etməklə görəvləndirilmişdilər.
Cəmiyyətin üzvlərinin sayı 9-dan az və ya çox ola bilməzdi. Əgər hər hansı bir üzv xəstəlik, ölüm, təqaüdə çıxma və digər səbəblərdən fəaliyyətini davam etdirə bilməzdisə, yerinə seçilmiş bir şəxs təyin olunurdu.
Yuxarıda qeyd etdiyimiz kimi, üzvlərin hər biri bir istiqamət üzrə fəaliyyət göstərir və bu istiqamət üzrə bilikləri və məlumatları müvafiq kitablarda cəmləşdirirdilər. Məsələn,
- Təbliğat kitabı – Birinci kitab təbliğat və psixoloji müharibə, həmçinin kütlələrin rəyini manipulyasiya etmək üsullarından bəhs edirdi.
- Fiziologiya kitabı – İkinci kitab canlının anatomiyasından bəhs edirdi. Kitabda orqanizmə sadəcə toxunuşla ölümə səbəb ola biləcək vacib məqamlar təsvir edilirdi, “Ölüm Toxunuşu” texnikalarının cüdo idman növünün meydana çıxmasında xüsusi rol oynadığı barədə fikirlər mövcuddur.
- Mikrobiologiya kitabı – Üçüncü kitab mikrobiologiya və biotexnologiyaya aid idi. Burada vəbaya qarşı peyvəndin reseptinin olduğu biotexnologiyadan bəhs edilirdi.
- Əlkimya kitabı – Dördüncü kitabda qurğuşunu qızıla çevirməyin sirləri yer alırdı. Başqa bir rəvayətə görə, dəhşətli quraqlıq dövründə məbədlər və dini yardım təşkilatları “gizli mənbədən” külli miqdarda qızıl almışdılar.
- Ünsiyyət kitabı – Beşinci kitabda yerüstü və yerdənkənar bütün rabitə vasitələrinin tədqiqi yer alırdı. İnanılır ki, Doqquz Naməlum yadplanetlilərdən və xarici dünyadan xəbərdar idi.
- Cazibə (Qravitasiya) kitabı – Altıncı kitabda cazibə qüvvəsinin əksinə uça bilən maşın – “Vimana” ( Vaiminika Şastra) yaratmaq üsullarının yazıldığı iddia edilir.Qədim hind eposları Ramayana və Mahabharatada təsvir olunduğu kimi, hindlilərin kosmosda uça bilən təyyarələrə malik olduğuna dair bir çox fərziyyələr yayılmışdı. Bu iddiaları rədd edən çoxlu nəzəriyyələr olsa da, Lhasada kəşf edilmiş və ulduzlararası gəmilərin inşası üçün təlimatları özündə əks etdirən sanskrit mətni, eləcə də, Əfqanıstanda Vimananın təsvirinə bənzəyən qədim hind yazıları göstərir ki, Doqquz Naməlum Adam cazibə qüvvəsi, aerodinamika və kosmik səyahət haqqında bilikləri qoruyub saxlamışdılar.
- Kosmoqoniya kitabı – Yeddinci kitabda kosmoqoniya və kainat məsələləri yer alırdı.
- İşıq və Optika kitabı – Səkkizinci kitab işıqdan, o cümlədən sürətdən və ondan silah kimi istifadə etməkdən bəhs edirdi.
- Sosiologiya kitabı – Doqquzuncu və sonuncu kitabda sosiologiya məsələləri yer alırdı. O, cəmiyyətlərin təkamülü üçün qaydaları və onların tənəzzülünü qabaqcadan xəbər verən vasitələri ehtiva edirdi.
Bəzən Cazibə (Qravitasiya) ilə Kosmoqoniya (Kosmologiya) eyni kitab kimi qeyd edilir, əlavə olaraq, Silahqayırma Kitabının olduğu yazılır.
Mundinin kitabında yer alan məlumatlar insanlar tərəfindən o qədər də inandırıcı qəbul edilməsə də, 37 il sonra Luis Pauels və Jak Bergiyenin yazdığı “Sehrbazların şəhəri” kitabı Mundinin iddialarına inanmaq üçün əsas verdi. Onların kitabında gizli cəmiyyətin Papa II Silvester ilə şəxsən görüşdüyü yazılıb. İddia edilirdi ki, papa Hindistandan qayıdarkən özü ilə bəzi qəribə alətlər, o cümlədən suallara “bəli” və ya “yox” cavabını verə bilən kompüterləşdirilmiş bürünc başlıq da aparmışdı – bu, texnologiya baxımından dövrünü xeyli qabaqlamışdı. Lakin o, bu cihazları ictimaiyyətə nümayiş etdirməyə çalışanda müəmmalı şəkildə öldü.
Fransız həkim və vəkil Jakolliot, Doqquz Naməlum Adamın radiasiya ilə sterilizasiya texnologiyasının yeni elm hesab edilməmişdən çox əvvəl icad etdiyi fərziyyəsini irəli sürüb. O,Qanq çayının yatağında radiasiya yaradan və suyu təmiz saxlayan gizli məbədin olduğunu iddia edirdi.
Doqquz Naməlum Adamın cazibə, istilik, işıq, elektromaqnit sahələri, rəng, günəş şüalarının komponentlərinin müəyyən edilməsi, günəş enerjisini tutmaq üçün maşınların yaradılmasına dair göstərişlər və yadplanetlilərlə əlaqəyə dair təlimatların hamısının xurma və palma yarpaqlarının üzərinə yazıldığı düşünülür. Hindistanın cənubundakı Karnataka kəndində aşkar edilən və palma yarpaqları üzərində yazılmış bu yazılar Amsu Bodhini kimi tanınır.
Yekunda Doqquz Naməlum Adamın gerçəklik və ya mif olduğu barədə onu deyə bilərik ki, ilk baxışdan nağıl kimi görünsə də, bəzi detallar, hansılar ki, aşkar edilib, deməyə əsas verir ki, çox böyük ehtimalla bu cəmiyyət mövcud olub. Onun mövcud olmasını fantaksika hesab etmək də düzgün deyil. Çünki bir çox xalqların və dövlətlərin tarixində buna oxşar qurum və təşkilatlar mövcud olub.
