Əvvəlki yazılarımızdan birində “Meksika qarşıdurması” (“Mexican standoff”) ifadəsi barədə məlumat vermişdik. Ümumiyyətlə, bir çox xalqların leksikonunda bu cür ifadələr mövcuddur. Belə ifadələrdən biri də “Polşa parlamenti” ifadəsidir.
“Polşa parlamenti” (“Sejm walny”, “Polsk riksdag” və ya “Polnischer reichstag”) ifadəsi, əsasən, xaosu, qarışıqlığı, müzakirələr zamanı qərarların qəbulunun mümkün olmadığını təsvir etmək üçün istifadə olunur.
XVII-XVIII əsrlərdə Polşa parlamentində hər bir deputatın mütləq veto hüququ (“liberum veto”) vardı. Bu səbəbdən bütün qanunlar yekdilliklə qəbul olunmalı idi. Əvvəlcə bu prosedur texniki, nizam-intizam məsələləri üçün istifadə edilsə də, sonradan bu hüquqdan sui-istifadə edilməyə başlandı. Ona görə də, müzakirələr zamanı qarışıqlıq, ortaq məxrəcə gəlməmə halları çoxalırdı.
