“Nottingem Forest” İngiltərənin ən qədim futbol klublarından biridir. Onun əsası 1865-ci ildə qoyulub. Klub İngiltərə futbol liqasında ilk dəfə 1892/93 mövsümündən çıxış etməyə başlayıb və 16 iştirakçı arasında 10-cu yeri tutub. XIX əsrdə yeganə nailiyyəti 1898-ci ildə ölkə kubokunu qazanması oldu.
XX əsrin birinci yarısı isə ümumiyyətlə uğursuz oldu. Komanda bu illərin çoxunu ikinci divizionda, iki ili isə (1949-1951) hətta üçüncü divizionda keçirdi. Nəhayət, 1957-ci ildə, 22 illik fasilədən sonra diviziona qayıtdı. Bu illər ərzində “Nottingem Forest”in çempionatlarda ən yüksək nəticəsi 1900/01 mövsümündə tutduğu 4-cü yer oldu.
Ən güclülər sırasına qayıdan klub 1959-cu ildə özünün 60 il öncəki nailiyyətini təkrar etdi və ölkə kubokunu qazandı. Çempionatda ən yaxşı nəticələrini isə 1960-ci illərin ortalarında göstərdi. 1964/65 mövsümündə beşinci olan “Forest” iki il sonra ikinci yeri tutaraq tarixində ilk dəfə çempionatın mükafatçısı oldu. Komanda çempion “Mançester Yunayted”dən dörd xal geri qaldı.
Yarmarkalar kubokuna (sonralar UEFA kuboku, indi Avropa Liqası) vəsiqə qazanan “qırmızılar” ilk turda Almaniyanın “Ayntraxt” komandasını inamla (1:0 və 4:0) keçsələr də, ikinci turda “Sürix”ə evdə buraxdıqları qola görə məğlub oldular – 2:1 və 0:1.
Ölkə çempionatlarında isə komanda öz uğurunu təkrarlaya bilmədi və sonrakı illərdə əsasən ikinci onluqda yer tutdu. Nəhayət, 1971/72 mövsümünün yekunlarına görə 21-ci yeri tutaraq yenidən ikinci diviziona yollandı. Burada onun işləri heç də yaxşı getmədi. Birinci mövsüm 14-cü, ikinci mövsüm isə 7-ci oldu.
“Nottingem Forest” 1974/75 mövsümünə də uğursuz başladı. Komanda 25 oyundan sonra 24 xal (İngiltərədə 1981-ci ilə qədər qələbəyə görə 2 xal verilirdi) toplamışdı. Amma Milad tətili günlərində klubun tarixində iz qoyacaq bir hadisə baş verdi. Yanvarın 6-da baş məşqçi postuna Brayan Klaf təyin olundu.
1935-ci il doğumlu Brayan Klaf 20 yaşında “Midlsbro”da hücumçu mövqeyində oynamağa başladı. O, cəmi 6 il ərzində 204 qol vurdu və bu göstəriciyə görə komandanın tarixində üçüncü yeri tutur. Daha sonra “Sanderlend”də oynayan Klaf ağır diz zədəsi səbəbindən oyunçu karyerasını 27 yaşında bitirməli oldu (iki il sonra qayıtmağa cəhd etdi, amma cəmi 3 oyun oynadı).
Klaf 30 yaşında məşqçilik karyerasına başlayır və iki il sonra ikinci divizionda çıxış edən “Derbi Kounti” komandasına rəhbərlik edir. Daha iki il sonra komandanı divizion çempionu edir və birinci diviziona yüksəlir. Burada birinci il 4-cü, ikinci il 9-cu yeri tutan komanda 1971/72 mövsümündə çempion adını qazandı. Klub çempionlar liqasında da uğurla çıxış edərək yarımfinala qədər yüksəldi, lakin burada “Yuventus”a məğlub oldu.
Klaf onunla “Midlsbro”da çıxış etmiş qapıçı Piter Teylor ilə duet təşkil edirdi. Teylor istedadlı oyunçuları tapırdı, Klaf isə onlardan usta düzəldirdi. Bundan əlavə, Klaf oyunçularla sərt, bəzən də kobud danışrıdı. O, hətta futbolçuları yumruqlamaqdan da çəkinmirdi. Teylor isə “yaxşı polis” rolunu oynayırdı.
Klaf və Teylorun “Derbi Kounti”dəki karyeraları klub prezidenti Sem Lonqsonla mütəmadi ixtilaf şəraitində keçdi. Nəhayət, 1973-cü ilin oktyabrında onların hər ikisi komandadan ayrıldılar. Nottingemə gələnə qədər isə (Teylor 1976-cı ilin iyulunda gəldi) məşqçilik fəaliyyətlərində xüsusi uğur olmadı.
Klafın gəlişi “meşəçilər”in oyununda dərhal dönüş yaratmadı. Əksinə, komanda bir az da geriləyərək çempionatı 16-cı yerdə başa vurdu. Növbəti ildə nəticələr bir qədər yaxşılaşdı və 8-ci yer tutuldu. Nəhayət, 1976/77-ci il mövsümündə üçüncü yeri tutan komanda birinci diviziona qayıtdı.
Bu uğurun qazanılmasında Con Robertson, Viv Anderson, Con Makqovern, Con O`Hara, Larri Lloyd, Frenk Klark, Marin O`Nil, Kolin Barret kimi oyunçular əsas rol oynadılar. Birinci divizionda ilk mövsüm ərəfəsində komanda Kenni Bernslə gücləndirildi. Daha bir transfer isə İngiltərənin futbol tarixinin ən yaxşı qapıçısı sayılan Piter Şiltonun “Stok Siti”dən alınması oldu.
“Qırmızılar”ın startı gözlənilməz oldu. Komanda ilk turda səfərdə güclü “Everton”a 3:1 hesabı ilə qalib gəldi. Daha sonra evdə “Bristol Siti” və “Derbi Kaunti” məğlub edildi. Amma dördüncü turda səfərdə “Arsenal”a məğlub olanda (0:3) çoxları düşündü ki, uğurlu start təsadüf idi və artıq arxada qaldı. Ancaq belə olmadı. Sonrakı beş oyunda 4 qələbə qazanan və 1 heç-heçə edən “Nottingem Forest” 9-cu turdan etibarən liderliyi ələ aldı və çempionatın sonuna qədər buraxmadı.
Komanda noyabrda iki oyunu uduzduqdan sonra (14-cü turda “Çelsi”yə və 16-cı turda “Lids Yunayted”ə) turnirin sonuna qədər məğlubiyyətsiz irəlilədi. O, yekunda ikinci yeri tutan “Liverpul”u 7 xal qabaqladı. “Meşəçilər” çempionluqdan əlavə Futbol liqası kubokunu da qazandılar. Mart ayında “Liverpul”la ilk oyunda nə əsas, nə əlavə vaxtda qol vurulmadı. Dörd gün sonra keçirilən təkrar oyunda isə “Forest” 1-0 hesabı ilə qələbə qazandı.
Uğurlu mövsüm İngiltərə kubokunun sahibi “İspviç Taun”la superkubok uğrunda matçla yekunlaşdı. Nottingemlilər 5:0 hesabı ilə qalib gəldilər.
Bir komandanın birinci diviziona çıxan kimi dərhal çempion olması az-az rast gəlinən hadisədir. Brayan Klaf isə İngiltərə futbol tarixində iki müxtəlif klubu çempion edən cəmi dörd məşqçidən biri oldu. Amma bu əfsanənin hələ başlanğıcı idi.
Ədalətsiz püşkə görə, “Nottingem Forest” ilk dəfə çıxış edəcəyi Çempionlar kubokunun ilk turunda başqa bir ingilis klubu, “Liverpul”la qarşılaşacaqdı. Bu qarşılaşmanın favoriti liverpullular sayılırdı. Çünki onların beynəlxalq təcrübəsi çox idi, son iki ildə isə Çempionlar kuboku turnirinin qalibi idilər.
Digər tərəfdən, “Forest” 1978/79-cu il çempionatında zəif start götürdü, ilk dörd oyunda heç-heçə etdi, yalnız beşinci turda “Arsenal”a qalib gəldi. Komanda beş turdan sonra 6 xal toplayaraq 6-cı yeri tuturdu. “Liverpul” isə maksimum nəticə ilə turnir cədvəlinə başçılıq edirdi. Komanda qarşısına keçəni əzirdi – “İspviç Taun” (3:0), “Mançester Siti” (4:1), “Tottenhem Hotspur” (7:0), “Birmingem Siti” (3:0) darmadağın edildilər.
Hətta “meşəçilər” özləri də optimist deyildilər. Harri Bertls öz məyusluğunu təxminən belə ifadə etmişdi: heç olmasa, İtaliyaya, İspaniyaya səfər edərdik… Belə oxşayır ki, biz İngiltərədən çıxmadan turnirdən uzaqlaşacağıq”.
Amma Nottingemdə keçirilən ilk oyunda meydan sahibləri hər hissədə bir qol vuraraq 2:0 hesabı ilə qələbə qazandılar. İki həftə sonra “Enfild” stadionunda baş tutan cavab oyununda liverpulluların, xüsusən də, Kenni Dalqlişin bütün səylərinə baxmayaraq hesab açılmadı. Hər iki oyunda Piter Şilton mükəmməl oynadı.
Komandanın sonrakı iki mərhələdə rəqibləri elə də güclü olmadı. Yunanıstanın AEK (2:1 və 5:1), İsveçrənin “Grasshopper” klubları (4:1 və 1:1) asanlıqla keçildi. Bu oyunlar arasında “Nottingem Forest” bir hay-küylü transfer həyata keçirdi. Hücumçu Trevor Frensis “Birmingem Siti”dən 1 miyon funt-sterlinqə alındı. Bu İngiltərənin futbol tarixində bir futbolçu üçün yeddi rəqəmli məbləğin ödənildiyi ilk hal idi.
Çempionlar kubokunun yarımfinalında Almaniya çempionu “Köln” qırmızılara ciddi problem yaşatdı. Yağış səbəbindən bərbad vəziyyətdə olan “Siti Qraund” stadionundakı oyunda ilk 20 dəqiqədən sonra hesab 0:2 qonaqların xeyrinə idi. “Qırmızılar” 3 qol vurub irəli çıxsalar da qələbəni qoruya bilmədilər və oyun 3:3 hesabı ilə bitdi. Bu matçda Nottingem müdafiəçiləri və Şilton uğursuz oynadılar. Görüşün qəhrəmanı isə qonaqların qapıçısı Toni Şumaxer oldu.
Əvəzində Kölndə keçirilən cavab matçında Nottingem müdafiəsi səhvsiz oynadı. 65-ci dəqiqədə künc zərbəsindən sonra Yan Boyer yeganə qolun müəllifi oldu. Almanların hesabı bərabərləşdirmək və səfərdə vurduqların qolların hesabına qalib gəlmək cəhdləri faydasız oldu. “Nottingem Forest” qələbə qazanaraq turnirin finalına çıxdı.
1979-cu il mayın 30-da Münhen olimpiya stadionunda keçirilən final oyununda rəqib İsveçin “Malmö” klubu idi. İsveçlilər bütün oyun boyu müdafiəyə çəkilərək qol buraxmamağa çalışırdılar. Amma bir dəfə bunu bacarmadılar. Birinci hissənin son dəqiqəsində sol cinahla irəliləyən Robertson iki müdafiəçinin əhatəsindən topu qapının uzaq dirəyinə qaldırdı. Trevor Frensis çətinliklə topa çataraq baş zərbəsi ilə hesabı açdı.
İkinci hissədə “Malmö” müdafiəsi daha bir səhv buraxdı, amma Robertsonun zərbəsi qapı dirəyindən döndü. Hakimin final fiti heyrətamiz bir faktı ortaya qoydu: iki il öncə İngiltərə çempionatının ikinci divizionunda çıxış edən “Nottingem Forest” indi Avropanın ən güclü komandasıdır.
Ölkə çempionatında zəif startdan sonra “meşəçilər” öz nəticələrini xeyli yaxşılaşdırdılar və 18-ci turdan sonra ikinci yerə qalxaraq “Liverpul”la aradakı fərqi 2 xala endirdilər. Amma dekabrın 9-da Liverpulda baş tutan əyani qarşılaşmada ev sahibləri 2:0 hesabı ilə qalib gəldilər.
Bu 1 il 20 gündən sonra komandanın milli çempionatda ilk məğlubiyyəti idi. Onlar 42 oyunluq məğlubiyyətsizlik seriyası ilə çempionatın yeni rekordunu müəyyən etdilər. “Nottingem Forest” çempionatı isə ikinci yerdə, “Liverpul”dan 8 xal geridə başa vurdu. Əvəzində yenidən Futbol liqası kuboku qazanıldı. Finalda “Sauthempton” məğlub edildi (3:2).
Növbəti mövsümdə yenə də “Nottingem Forest” və “Liverpul” ikisi Çempionlar kubokunda çıxış edəcəkdilər. Bütün İngiltərə və Avropa bu komandaların bir daha üz-üzə gələcəklərini gözləyirdi. Amma belə olmadı. “Liverpul” yenə də birinci mərhələdə mübarizəni dayandırdı. Komanda bu dəfə Tbilisinin “Dinamo” komandasına məğlub oldu (2:1 və 0:3). “Nottingem Forest” isə ilk iki mərhələni çətinlik çəkmədən keçdi – İsveçin “Öster” (2:0 və 1:1) və Rumıniyanın “Argeş” (2:0 və 2:1) komandaları turnirdən kənarlaşdırıldılar.
1980-ci ilin qışında “qırmızılar” Avropa Superkuboku uğrunda qarşılaşmada Kuboklar kubokunun sahibi “Barselona” ilə görüşdülər. Nottingemdə ev sahibləri qalib gəldilər – 1:0. “Kamp Nou”da isə heç-heçə qeydə alındı – 1:1. Beləliklə, “Nottingem Forest” Superkubokun da sahibi oldu.
Çempionlar kubokunun ¼ finalında rəqib güclü deyildi, Şərqi Almaniyanın “Dinamo” (Berlin) komandası idi. Buna baxmayaraq, Nottingemdəki ilk oyunda gözlənilmədən qonaqlar qalib gəldilər – 0:1. Amma “qırmızılar” Berlindəki elə ilk hissədə üç qol vuraraq birinci oyunun nəticəsinin təsadüf olduğunu sübut etdilər. Ev sahibləri fasilədən sonra yalnız bir qolun əvəzini çıxa bildilər.
Yarımfinaldakı rəqib isə 1970-ci illərin əvvəllərinin əfsanəsi “Ayaks” idi. “Siti Qraund”da keçirilən ilk oyun nottingemlilərin arasıkəsilməz hücumları ilə keçdi və onlar hər hissədə bir qol vuraraq 2:0 hesabı ilə qələbə qazandılar. Səfər görüşündə isə hollandlar minimal məhsuldarlıqla qələbə qazandılar və “Nottingem Forest” turnirin finalına vəsiqə qazandı.
“Santyaqo Bernabeu” stadionunda keçirilən oyunda rəqib Almaniya çempionu “Hamburq” idi. Bu komandada son iki ildə Avropanın ən yaxşı oyunçusu kimi “Qızıl top” mükafatını alan Kevin Kiqan oynayırdı. “Hamburq” ilk yarımfinal oyununda elə “Santyaqo Bernabeu”da “Real”a 0:2 hesabı ilə uduzduqdan sonra evdə madridliləri 5:1 hesabı ilə məğlub etmiş və onlara öz stadionunda final oynamaq imkanı verməmişdi.
Oyunun 20-ci dəqiqəsində Con Robertson sol cinahdan cərimə meydançasının qarşısına irəliləyərək Harri Bertlsə divar ötürməsindən sonra qapıya zərbə endirdi. Top dirəyə dəyərək qapıdan keçdi – 1:0. Az sonra Kiqanın sinə ötürməsindən sonra Milevski cərimə meydançasının önündəki yarımqövsün içindən güclü zərbə endirdi, amma Şilton möhtəşəm reaksiya nümayiş etdirdi.
İkinci hissə “Hamburq”un üstünlüyü ilə keçdi. Komandanın müdafiəçiləri fərqlənməyə daha yaxın oldular. Manfred Kaltsın zərbəsi dirəyə tuş gəldi. Peter Noqlının uzaqdan zərbəsindən sonra doqquzluğa gedən topu Şilton qapı xəttindən çıxardı. Bunun ardınca künc zərbəsindən sonra Şiltonun qaytardığı topa yenə Noqlının zərbəsini bu dəfə müdafiəçilər dəf etdi. Portuqaliyalı hakim Antoniu Qarridunun final fiti “Nottingem Forest”in dalbadal ikinci dəfə Avropa fatehi olduğunu rəsmiləşdirdi.
İngiltərənin daxili turnirlərində isə çıxışlar uğursuz oldu. Hərçənd, komanda çempionata inamla başlamışdı və 4 turdan sonra 4 qələbə ilə cədvələ başçılıq edirdi. Sonrakı 10 turda nəticələr 4 qələbə, 3 heç-heçə, 3 məğlubiyyət oldu və “meşəçilər” 19 xalla ikinci yeri tuturdular. Amma bundan sonrakı 7 tur tam fiasko oldu. Komanda 5 oyunda məğlub oldu və cəmi 2 heç-heçə etdi. Birinci dövrədən sonra “Nottingem Forest” 21 xalla 11-c yeri tuturdu. Yekun nəticə isə 48 xalla 5-ci yer oldu. Çempion isə yenə “Liverpul” idi.
Ölkə kuboku uğrunda turnirdə nottingemlilər 1/16 finalda “Liverpul”a uduzdular – 0:2. Bu məğlubiyyətin əvəzi Futbol liqası turnirinin yarımfinalında çıxıldı – 1:0 və 1:1. Amma “meşəçilər” bu mükafatı dalbadal üçüncü dəfə qazana bilmədilər. Finalda “Vulverhempton Uonderers” daha güclü oldu – 1:0.
“Nottingem Forest” ilk dəfə Çempionlar kubokunu qazananda Cənubi Amerikanın ən güclü klub komandası ilə Qitələrarası kubok uğrunda qarşılaşmağa razılıq vermədi. Reqlamentə görə Avropanı bu qarşılaşmada Çempionlar kubokunun finalçısı “Malmö” təmsil etdi və Paraqvayın “Olimpiya” komandasına 0:1 və 1:2 hesabı ilə məğlub oldu.
İkinci il nottingemlilər özləri qarşılaşmada iştirak etdilər. Bu, Qitələrarası kubokun qalibinin bitərəf meydanda (Tokioda) bir oyunla müəyyənləşdirildiyi ilk oyun idi. Cənubi Amerikanın Libertadores kubokunu qazanmış Uruqvayın “Nasional” klubu “Nottingem Forest”ə 1:0 hesabı ilə qalib gəldi.
“Meşəçilər” Avropa Superkubokunu da qazana bilmədilər. Onlar iki oyundan ibarət qarşılaşmada evdə buraxdıqları qolun hesabına “Valensiya”ya uduzdular – 2:1 və 0:1.
1980-ci il “Nottingem Forest”in əfsanəvi dövrünün son ili oldu. Bundan sonra o, bir daha nə ölkəsində, nə Avropada çempion ola bilmədi. Növbəti Çempionlar kuboku turnirində “qırmızılar” elə ilk turda gözlənilmədən Bolqarıstanın ÇSKA klubuna uduzdular – 0:1, 0:1.
Aparıcı oyunçular bir-bir komandanı tərk etdilər. İlk dəfə Çempionlar kubokunun finalında oynayarkən əsas heyətdə meydana çıxan oyunçulardan 1982-ci ildən sonra komandada cəmi 2 nəfər qalmışdı – Con Robertson və Viv Anderson. Onlardan da birincisi 1983-cü ildə, ikincisi isə 1984-cü ildə komandanı tərk etdi. 1982-ci ildə Brayan Klafın sağ əli Piter Teylor da ondan ayrıldı və vaxtilə birlikdə çalışdırdıqları “Derbi Kaunti”nin baş məşqçisi oldu.
Sonrakı illərdə “Nottingem Forrest” daha iki dəfə dalbadal (1989 və 1990-cı illərdə) Futbol liqasının kubokunu qazandı. Ölkə çempionatlarında ən yüksək nəticəsi isə üç dəfə (1983/84, 1987/88 və 1988/89) bürünc medal qazanması oldu.
Nottingemlilər iki dəfə dalbadal (1983/84 və 1984/85) UEFA kuboku turnirində iştirak etdilər. Birinci dəfə komanda yarımfinala qədər irəlilədi və burada ilk oyunda “Anderlext”ə 2:0 hesabı ilə qalib gəldi. Amma səfər oyununda belçikalılar 3 cavabsız top vuraraq finala çıxdılar. Bu oyunda hakim “meşəçilər”in qapısına şübhəli penalti təyin etdi, üstəlik oyunun sonlarında vurduqları qolu hesaba almadı.
Yalnız 1997-ci ildə məlum oldu ki, ispaniyalı hakim Emilio Muronun bu hərəkətləri səbəbsiz deyilmiş. O, Belçika klubunun prezidentindən 18 min funt-sterlinq ekvivaletində rüşvət alıbmış. Bu fakt məlum olmazdan 10 il əvvəl Muro avtoqəza nəticəsində ölmüşdü. “Anderlext”ə qarşı isə UEFA heç bir tədbir görmədi.
“Forest”in UEFA kubokunda növbəti ildəki çıxışı uğursuz oldu. Komanda elə ilk mərhələdə Belçikanın başqa bir komandasına, “Brügge”yə məğlub olaraq (0:0 və 0:1) mübarizəni dayandırdı. Son iki dəfə bürünc medal aldıqda isə Avrokuboklarda iştirak edə bilmədi, çünki Eyzel faciəsi ilə əlaqədar İngiltərə klubları həmin illərdə Avrokuboklara buraxılmırdılar.
1992/93-cü il mövsümünün başlanğıcı parlaq olmasa da, heç nə fiaskodan xəbər vermirdi. Komanda 4 oyundan sonra 2 qələbə və 2 məğlubiyyətlə 11-ci yeri tutdu. Lakin bundan sonra 13 tur davam edən qələbəsizlik zolağı başladı. Bu zaman “Nottingem Forest” yalnız 5 heç-heçə edə bildi, 8 dəfə isə məğlub olaraq turnir cədvəlində sonuncu yerə yuvarlandı. Komanda çempionatın sonuna qədər çıxış zonasını tərk edə bilmədi.
Sonuncudan əvvəlki, 41-ci turda “qırmızılar” öz meydanlarında “Şeffild Yunayted”i qəbul edirdilər. Artıq premyer liqa adlanan yüksək divizionda qalmağın nəzəri şanslarını saxlamaq üçün bu oyunda qalib gəlmək lazım idi. Amma qonaqlar hər hissədə bir qol vuraraq qalib gəldilər və “Nottingem Forest”in indi birinci divizion adlandırılan aşağı liqaya düşməsi rəsmiləşdi.
Brayan Klaf hələ oyundan əvvəl bildirmişdi ki, komanda premyer liqada qalmazsa, futboldan uzaqlaşacaq. Hakimin final fitindən sonra Klaf meydana çıxaraq azarkeşlərlər vidalaşdı. Azarkeşlər də onu alqışlarla yola saldılar. Tribunada “Brayan Klaf, sən futbol dahisisən” şüarı gözə dəyirdi. İnsanlar sahəyə çıxaraq Klafa toxunmaq, onu qucaqlamaq istəyirdilər. Bu, aşağı liqaya düşən komandanın məşqçisini tribunaların alqışladığı yəqin ki, yeganə hal idi. Bununla da 18 il davam edən “Brayan Klaf və Nottingem Forest” əfsanəsi başa çatdı.
“Meşəçilər” bir il sonra güclülər sırasına qayıtdılar və 1994/95 mövsümündə hətta üçüncü yeri tutaraq UEFA kubokuna vəsiqə qazandılar. Burada isə 1/4 finala qədər irəliləyərək turnirin gələcək qalibi “Bavariya”ya məğlub oldular. Amma bu uğur keçici oldu. Komanda 1997-ci ildə yenidən birinci diviziona düşdü. Bir il sonra yüksəldi və daha bir il sonra yenə düşdü.
Amma bununla bitmədi. Komanda 2004/05 mövsümündə burada axırdan əvvəlki yeri tutaraq ikinci diviziona düşdü. Bu, yeganə haldır ki, Avropa kubokunu qazanmış bir klub öz ölkəsində əhəmiyyətinə görə üçüncü liqaya düşürdü. “Qırmızılar” üç il sonra indi Çempionşip adlanan keçmiş birinci diviziona qayıtdılar. Amma bütün cəhdlərinə baxmayaraq, komanda hələ də premyer liqaya qayıda bilmir. Nəticələr isə yaxşılaşmır. “Nottingem Forest” bu il çempionşipdə çıxış edən 24 komanda arasında 17-ci yeri tutub.
Brayan Klaf isə 2004-cü ilin sentyabrında vəfat etdi və sevimli komandasının ikinci diviziona düşməsini görmədi. Əvəzində ölümündən bir ay əvvəl yəqin ki, ürəyincə olmayan başqa bir hadisə ilə qarşılaşdı: “Arsenal” ölkə çempionatında 43-cü məğlubiyyətsiz oyununu keçirərək Klaf və “Forest”in rekordunu təzələdi (son nəticə 49 oyun oldu).
Uşaqlıq dövrünün təəssüratları daha güclü olur. Bu, başqa sahələrdə olduğu kimi, idmanda da belədir. Uşaq məşhur idmançılara heyranlıqla yanaşır. Yaşa dolandan sonra ortaya çıxan idmançı nə qədər parlaq olsa da, uşaqlıq dövrünün məftunluğu müşahidə olunmur.
“Nottingem Forest”in əfsanəvi dövrü mənim uşaqlığımla, idmanla yenicə maraqlanmağa başladığım vaxtla üst-üstə düşür. Ona görə də bu komandaya həmişə xüsusi ehtiramla yanaşmışam və təkcə İngiltərənin deyil, Avropanın güclüləri sırasına qayıtmasını arzulamışam. Ümid edirəm, bu, bir gün baş verəcək.
