1991… Xorvatiyanın tarixi sahil şəhəri Zadarın 60 kilometr qədər şimalı…Bu gün tərk edilmiş Zaton Obrovaçki vilayətinin Modriçi kəndi… Müharibənin alovu bütün ölkəni sarmışdı və altı yaşlı arıq uşaq ailəsi ilə birlikdə serb qətliamından canını qurtarmaq üçün doğulub boya-başa çatdığı evi tərk edir. Əlində sadəcə futbol topu, olub-keçənləri anlamağa çalışır. Ona adını verən babası bir neçə gün öncə qətlə yetirilmişdi. Qaçqın taleyi yaşayan bir neçə başqa ailə ilə birlikdə onun ailəsi də Zadarda bir oteldə məskunlaşdı.
Bəli, söhbət “Real Madrid”in və dünya futbolunun ulduzlarından biri olan Luka Modriçdən gedir…
Sığındıqları oteldə top əlindən bir an olsun belə yerə düşmürdü. Otelin pəncərələrinin şüşələri top mərmilərindən yox, koridorda top oynayan bu uşağın ucbatından qırılırdı..
Savaş bitdikdən sonra yolu NK Zadar klubuna düşdü Modriçin. Orada “ikinci atam” dediyi məşqçisi Tomislav Basic ilə tanış oldu. Futbolun sirlərini ilk olaraq ondan aldı. Ehtiyac içində çarpışan ailəsi də ona hər an dəstək oldu. Luka futbolla məşğul ola bilsin deyə, kəndlərinə deyil, Zadarda başqa bir otelə yerləşdi ailəsi. Uşaqlıq xəyalı “Hajduk Split”in qapısını döyərkən yanında yenə də məşqçisi vardı. Burada ona “çox çəlimsizdir, bundan futbolçu olmaz” dedilər və qəbul etmədilər. Xəyalları alt-üst olmuşdu, amma yenə də həvəsdən düşmədi Luka. Məşqçisinin dəstəyi ilə 15 yaşında olarkən “Dinamo Zagreb”in qapısını döydü. Burada da fiziki cəhətdən zəif olması səbəbilə ona olumsuz baxdılar. “Görək tab gətirə biləcəkmi?” deyib onu Bosniya liqasına icarəyə verdilər. Ayaq qırmaq xaric hər cür sərtliyin tüğyan etdiyi Bosniya liqasında inkişaf etdirdi özünü. Burada özünü o qədər yaxşı göstərdi ki, geri döndüyündə klubu onunla 10 illik müqavilə imzaladı. İlk işi ailəsinin maddi durumuna yardım etmək oldu, Zadarda gözəl bir ev aldı valideynlərinə.
2008-ci ildə “Tottenham”a üz tutdu. İki il sonra isə “Real Madrid”ə 33 milyon funt-sterlinq qarşılığında transfer olundu. Hər kəs ondan çox şey gözləyirdi. Düzdür, Madriddə ilk sezonu uğurlu alınmadı, “Zidane’ın, Raul’un, Figo’nun geydiyi forma ona bir bədən böyük gəldi” deyirdilər onun haqda. Hətta sezon sonu İngiltərəyə geri qayıdacağı barədə fikirlər də dolaşmağa başladı. Lakin Luka təslim olmamağı çoxdan öyrənmişdi. Yeni sezonun başlaması ilə Barnabeu’da əsl Mordiçlə tanış oldu azarkeşlər. Məsut Özil’in gedişindən sonra meydanda yaradıcılıqdan yoxsulluq çəkən komandaya Modriç rəng qatmağı bacardı. Komandanın əvəzedilməz oyunçusuna çevrildi, qollar atdı, qollar atdırdı… Onun oyun tərzi almanların ‘Nadelspieler’ (iynə oyunçu) dediyi tərzdir.
Həyat yoldaşı və uşağı ilə sakit bir həyat yaşayır Modriç. Uşaqlığında yaşadıqlarından bəhs etməyi sevmir. Amma keçmişdə yaşadıqlarını da unutmur. “Real Madrid”lə müqavilə imzalayan kimi ilk məşqçisi Basiç’ə zəng etdi…
Müharibənin odu-alovu içindən çıxan, min bir ehtiyac və məhrumiyyətlə böyüyən, fəqət heç zaman həyatın ağır imtahanına təslim olmayan Modriç bu gün istər “Real Madrid”in, istərsə də, Xorvatiya millisinin əvəzedilməz oyunçusudur.
