Balıq qarşılığında pivə
2018-ci ilin martında Rusiya Federasiyasının prezidenti Vladimir Putin Andrey Kondraşova müsahibəsində demişdi ki, Almaniya kansleri Angela Merkel vaxtaşırı olaraq, ona Radeberq pivəsi göndərir. Bu pivə 1872-ci ildən Almaniyanın şərq şəhərlərindən biri olan Radeberq şəhərində istehsal olunur və Saksoniya kralı III Fridrix Avqust və “dəmir kansler” Bismarkın sevimli içkisi olub.
Jurnalistlər bu məsələni Merkellə aydınlaşdırmaq istəyən zaman, kansler, bir dəfə Putinin də ona hisə verilmiş balıq göndərdiyini demişdi.
«Reks, salat ye!»
Amerika lideri Donald Tramp öz ekssentrik davranışları ilə məşhurlaşmağa müvəffəq olmuşdur, buna görə də media indi ABŞ prezidentinin günahı ucbatından baş verən məzəli hallar barədə məlumat verir.
Misal üçün, “The Wall Street Journal” qəzeti 2017-ci ilin noyabr ayında Asiya turunda ABŞ prezidentinin ABŞ xarici siyasətinin rəhbəri Reks Tillersonu köhnə salat yeməyə zorladığını yazmışdı.
Çin tərəfi ABŞ nümayəndə heyətini bu yeməyə qonaq etmişdi. Tramp, salatın toxunulmamış qaldığını görüb, ev sahibinin xəcalətli olacağından narahat oldu və Tillersona: “Reks, salat yeyin” dedi. Buna cavab olaraq, o, yalnız güldü.
Hətta mətbu orqanı bu tədbir zamanı Tillerson ilə Tramp arasında gərginliklərin olduğunu da yazırdı, bunun nəticəsi də hamımıza məlumdur.
Menyu birmənalı işarə kimi
ABŞ prezidenti Tramp ilə bağlı daha bir kulinar-siyasi hadisə var. Söhbət ABŞ və KXDR arasında Sinqapurda baş tutan sammitdən gedir, hansı ki, Tramp və Şimali Koreya lideri Kim Çen In arasında baş tutmuşdu.
Yerli nəşr The Strait Times yazırdı ki, sammit öncəsi restoran və barlarda görüşlə bağlı müxtəlif təamlar hazırlanmışdı. Məsələn, menyularda “Sammit” adlı Koreya buzlu çayı, “Tramp-Kim” burgeri, “Raket-adam” adlı tako, həmçinin “Tramp” adlı burbonla mavi kokteyl və qırmızı “Kim” adlı alkoqollu içkilər vardı.
Bu menyular birmənalı olaraq bu görüşdən dünyamızın gələcəyi və sülh üçün nələrin gözləndiyini göstərirdi. Restoranların birində amerikan acı pendiri-çedder və konservləşdirilmiş Koreya pulkoqadan (döş əti) hazırlanmış “Sülh burgeri” təqdim olunmuşdu. Bundan başqa, alkoqollu “Bromans” kokteyli də menyuda yer alan təamlardan idi.
Çərəzə etiraz
Cənubi Koreyanın özü də kulinariya diplomatiya skandalında iştirak edib. Bu ilin aprel ayında Şimali və Cənubi Koreya liderləri Kim Çen In və Mun Çje İn arasında keçirilən sammit üçün xüsusi menyu hazırlanmışdı. Bu, ağ şokoladla boyanmış manqo mussu idi. Mussun üzərində vahid Koreya və Tokto adaları təsvir olunmuşdu. Bu adalar ərazi cəhətdən Cənubi Koreyaya aid olsa da, Yaponiyanın bura ciddi iddiası var və yaponlar buranı özününkü hesab edir. Görüşdən sonra Cənubi Koreyanın Yaponiyadakı səfiri xarici işlər nazirliyinə çağrılaraq, bu hadisəyə görə ona etriaz edilmişdi.
Ədavət konfeti
Yemək və mübahisəli ərazilər üstündə növbəti ixtilaf Xorvatiya ilə Sloveniya arasında baş verib. Belə ki, 2016-cı ilin dekabrında, Yeni il ərəfəsində bayram münasibətilə Sloveniyadakı Xorvatiya səfirliyi bütün dövlət təsisatlarına şokolad qutuları göndərdi. Bu qutuların üzərində “Xorvatiyadan salamlar” yazılmışdı və Xorvatiyanın sərhəddi kimi, iki ölkə arasında mübahisəli ərazi olan Piran körfəzi təsvir olunmuşdu. Bu hadisə iki ölkə arasında böyük skandala səbəb oldu, lakin Sloveniya hökuməti qarşı tərəfə nota göndərmədi, sadəcə qutuları üzərində “Mən Sloveniyanı hiss edirəm” yazılan paketlərə qoyub geri qaytardı.
Kürü xəcaləti
Fransa prezidenti Fransua Olland 2014-cü ilin fevralında ABŞ-a səfəri zamanı qara kürü səbəbi ilə qeyri-adi hadisə ilə qarşılaşmışdı.
Olland və onun amerikalı həmkarı Barak Obamanın başçılığı altında iki ölkənin nümayəndə heyətlərinin üzvlərinin iştirakı ilə təşkil edilmiş rəsmi yemək menyusunu tərtib edərkən, Illinois əyalətindən osetrin kürüsü yeməklərin siyahısına daxil edildi.
Bu zaman tədbirin təşkilatçıları bir şeyi nəzərdən qaçırmışdılar. Belə ki, bu çərəz Fransada ABŞ-da olduğu kimi qəbul olunmurdu. Fransada sosialistlərə yönəlik “sol kürü” deyimi vardı. Olland da sosialist idi. Bu hadisədən sonra onun reputasiyası ciddi surətdə aşağı düşmüşdü.
Həqarətli çəkmə
Başqa bir kulinariya skandalı İsrail baş nazirinin şəxsi aşpazı tərəfindən törədilmişdi. Belə ki, Yaponiyanın baş naziri Sindzo Abenin İsrailə səfəri zamanı, yapon baş nazir çəkmə içərisində desertə qonaq edilmişdi ki, bu da yaponlar arasında ciddi narazılığa səbəb olmuşdu.
Yaponiyada uzun müddət çalışmış bir israilli diplomat qeyd edirdi ki, bu, “axmaq və qərarsız” bir addımdır. Bundan başqa, o, deyirdi ki, “təsəvvür edin, yaponlar biz yəhudiləri donuz ətinə qonaq edir.” Ümumiyyətlə, yaponlarda ayaqqabı ilə evdə gəzmək, hətta işdə ayaqqabı ilə oturmaq yolverilməzdir.
