Kuba
Kuba – sizə nostalji hisslər verəcək və onlarla il keçmişə apara biləcək bir yerdir. Kubaya “Azadlıq adası” deyirlər, lakin müasir turistlərin nöqteyi-nəzərincə burada azadlığa aid heç nə olmasa da, burada olmaq maraqlıdır.
Birincisi ona görə maraqlıdır ki, yarıdağılmış koloniya tipli evlər və retro-avtomоbillər Havana şəhərinin küçələrinə xüsusi rəng qatır; ikincisi, burada bir çox ərzaq məhsullarını yalnız talonla almaq mümkündür; üçüncüsü isə, adada iki valyuta mövcuddur: biri yerlilər, digəri turistlər üçün. Və əgər bir turist, tutaq ki, avronu pesoya dəyişdirmək istəsə, bu zaman bir çox problem yaşaya bilər.
Yerlilərə və turistlərə göstərilən xidmətlər arasında fərq var. Məsələn, elə avtobuslar var ki, ora minmək üçün turistlərə bilet satılmır və qəpiklə işləyən yerli taksilər yalnız kubalılara xidmət edir.
Otellər və ya şəxsi evlərdə (casas particulares) qalmaq üçün də mütləq lisenziya lazımdır.Əks təqdirdə sahibkarlar cərimələnə və hətta həbs edilə bilərlər.
Burada olmağın ən əsas rahatsız edici cəhəti – yüksək keyfiyyətli və ucuz internetin olmamasıdır. Lakin siz qəpik-quruş ödəməklə yerli romu dada bilərsiz.
Özbəkistan
Orta Asiya, xüsusilə Özbəkistan keçmişə səyahət etmək üçün növbəti şansdır. Buraya getmək üçün biletlər ucuz, yerli əhali isə qonaqpərvərdir. Buxara, Səmərqənd və Xivənin memarlıq inciləri sanki Şəhrizad nağıllarının illüstrasiyalarına bənzəyir.
Reqistanın füruzəyi rəngdə olan məscidləri və mədrəsələri, qədim qala və minarələri, əsrlərlə yaşı olan hamamları, gözəl mətbəxi hər bir turist üçün valehedici ola bilər.
Özbəkistanda şəhərdaxili və şəhərlər arası işləyən taksilərdə hələ də 1980-90-cı illərin hit musiqiləri səslənən kaset maqnitofonlar var, bazarlarda avtomat qazlı su, kokteyl aparatları mövcuddur.
Quna-Yala, Panama
Quna-Yala və ya San-Blas arxipelaqı Karib dənizində yerləşir. Ərazi cəhətdən Panamaya aiddir. Yerli əhali olan hindilər – qunalar (kunalar) özlərinə məxsus dillərdə danışır və ispanca çox da yaxşı bilmirlər.
Arxipelaqın ən məşhur adası El-Povernirdir. Burada, tropik cənnətdə istirahət üçün bütün hər şey var. Keçmişə qayıtmaq üçün digər adalara da səyahət etmək yaxşı olar.
Daxmaların çardağı samanla örtülüdür. Burada cəmi bir telefon var. Əgər birinə zəng gəlsə, o adamı tapıb çağıranadək zəng edən adam gözləməlidir.
Adaya Panama-Sitidən iki aviakompaniya uçuşlar həyata keçirir. Lakin çox nadir hallarda biletdə göstərilən qaydalara riayət olunur. Buranın hava limanı bir daxmadan ibarətdir. Ona görə də burada, ola bilsin, saatlarla susuz qalıb gözləməyiniz xeyli səbr tələb edəcək.
Lakin siz Karib dənizi sahilində kamaklarda bir dollar ödəməklə yata, kunaların hazırladığı miniatür paltarlar ala bilərsiz.
Vyetnam
Vyetnam — turistlər üçün koloritli və sevimli yerdir. Burada sizin üçün bankomat və internet problemi olmayacaq.
Vyetnama səyahət etmək, inkişaf etmiş turizm infrastrukturu baxımından çox maraqlıdır. Burada keçmişin işartılarını hiss edərək, sanki keçmişə səyahət etmiş olacaqsız.
Burada hər yerdə demokratik inqilabın lideri Ho Şi Minin portretlərini görə bilərsiz.
Ən cəlbedici şey isə qırmızı pioner qalstuku geymiş şagirdlərin velosipedlərlə məktəbə getməsi və ənənəvi üçbucaq şlyapa geymiş zərif xanımların tez-tez gözə dəyməsidir.
Myanma
Myanma – keçmişə səyahət etmək üçün ən ideal yerlərdən biridir. Burada ideal vəziyyətdə olan pul küpürlərini görmək olar, bankomat və internet isə, demək olar ki, yoxdur. Əvvəlcədən otel bron etmək mümkün deyil.
İstənilən restoran və kafedə termos və fincan və bir də su dolu ləyənlər görmək olar. Qonaq özü özünə termosdan çay süzür və fincanı ləyəndə yaxalayır. Bu, turistlər üçün qeyri-gigiyenik gələ bilər, lakin illər öncə buna oxşar şeyləri Sovet İttifaqında da görmək mümkün idi. Kafelərdə qonaqlar üçün plastik uşaq stulları tez-tez gözə dəyir.
Əgər böyük şəhərlər olan Yanqon və Mandalayda müasir sivilizasiyaya rast gəlmək mümkündürsə, əyalətərdə həyat sanki keçmişdədir.
Başında səbət gəzdirən qadınlar, məzəli şlyapalar geyən tibb bacıları, retroavtomobillər və yük maşınları, donuzları daşımaq üçün qoşqular, bazarın içində müalicə işi aparan diş həkimləri, heyrətamiz arxitektura Myanmanı daha da görməli bir yer edir.
Mənbə: Vokrugsveta
