Söhbət 1993-cü il 19 fevralda Ağdərədə gedən qanlı döyüşlərdə mühasirəyə düşmüş döyüşçüləri xilas edərkən qəhrəmancasına həlak olmuş Azərbaycanın Milli Qəhrəmanı Yusif Mirzəyevdən gedir…
Yusif Mirzəyev 23 may 1958-ci ildə Babək rayonunun Böyükdüz kəndində anadan olub. 1975-ci ildə İ.Səfərli adına 1 saylı məktəbi bitirib. 1988-ci illərdə Xalq Hərəkatına qoşulur. 1990-cı il 20 Yanvar faciəsi zamanı xalq etirazlarına qoşulduğu üçün Bakı şəhər komendantı tərəfindən həbs edilir. Həbsdə işgəncələrə məruz qaldığından böyrəyi zədələnir.
Daha sonra torpaqlarımızın müdafiəsi məqsədilə bir övlad atası olan Yusif cəbhəyə yollanır. Goranboy və Ağdərə uğrunda gedən döyüşlərdə iştirak edir. 14 nəfərlik dəstəsi ilə bir çox ağır döyüşlərdə qəhrəmanlıq göstərir. Ağdərə uğrunda gedən döyüşlər zamanı ordan çıxmaq əmri verilsə də, sonadək döyüşmək qərarı verir.
Böyrəklərindəki ağrı əziyyət verdiyindən bir müddət müalicə almağa məcbur olur. Şəmistan Əlizamanlı ilə bir palatada müalicə alır. Bir gün onları müalicə edən həkim Şahin Musaoğlu bir mahnı yazır. Mahnını çox bəyənən Yusif, Şəmistan Əlizamanlıdan bu mahnını nə vaxtsa ifa etməyi xahiş edir. Şəmistan isə bu mahnını mütləq oxuyacağına və ona həsr edəcəyinə söz verir.
Yusif müalicəsini yarımçıq saxlayır və yenidən cəbhəyə yollanır. Bakıda ona müxtəlif vəzifələr təklif olunsa da, o, bununla razılaşmır.
Nəhayət, 19 fevral 1993-cü il…Yusif Mirzəyev Ağdərədə gedən qanlı döyüşlərdə mühasirəyə düşmüş döyüşçüləri xilas edərkən qəhrəmancasına həlak olur. Naxçıvan Şəhidlər Xiyabanında dəfn edilir. Ölümündən sonra “Azərbaycanın Milli Qəhrəmanı” adına layiq görülür.
Şəmistan Əlizamanlı “İgid əsgər” mahnısını söz verdiyi kimi ona həsr edir və oxuyur.
