Vladimir İliç Lenin ilə Adolf Hitlerin şahmat oynarkən təsvir olunduğu bir rəsm əsəri 1 oktyabrda İngiltərənin Ludlou (Ludlow ) şəhərində keçirilən bir hərracda 40 min funt-sterlinqə satışa çıxarılıb.
“The Daily Telegraph” qəzetinin iddiasına görə, rəsm 1909-cu ildə Vyanada Hitlerin rəsm müəlliməsi Emma Lovenştramm (Emma Lowenstramm) tərəfindən çəkilib. Rəsmin arxasında da Hitler və Leninin imzaları əks olunub.
Həmin zaman Hitler Vyanada rəssamlıq edir, həmçinin quruluşçu-rəssam kimi çalışırmış. Lenin isə 1905-ci il inqilabının yatırılmasından sonra bura qaçmışdı. Rəsm çəkilən zaman Hitlerin 20, Leninin isə 39 yaşı vardı. Həmçinin o da deyilir ki, rəsmin çəkildiyi ev, Vyanada yaşayan bir yəhudi ailəsinin evi idi.
Bəzi mütəxəsislər isə bu rəsmin saxta olduğunu, buna sübut olaraq isə Leninin həmin vaxt Fransada yaşadığını qeyd edirlər. Lakin deyilənə görə, rəsm, onun kağızı, üstündəki imzalar məhkəmə-tibbi ekspertizadan keçirilmiş və bu barədə 300 səhifəlik sənəd hazırlanmışdır. Ekspertizanın yekunları, guya rəsmin saxta olmadığını irəli sürür.
