Tarixdə gələcəkdə baş verəcək hadisələri qabaqcadan xəbər verənlər haqqında çox danışılıb. Nostradamus, Vanqa kimi öncəgörücüləri peyğəmbər, hətta falçı adlandıranlar da oldu, cadugər, şeytan, yalançı adlandıranlar da… Yaxın keçmişdə bu cür öncəgörmələr məşhur cizgi serialı “Simpsonlar”la qarşımıza çıxdı. Həqiqət, ya yalandır, deyə bilmərik, amma bu kimi şeylər daim insan oğlunun diqqətini cəlb edib.
Bu gün biz bunlardan yox, gələcəkdə baş verəcək hadisələr haqqında bir çox sensassion mesajlar verən tviter fenomenləri haqqında, konkret olaraq isə 2014-2016-cı illərdə Türkiyə gündəmini silkələyən “Fuatavni” haqqında danışacağıq.
Mövzuya keçməmişdən öncə qeyd edək ki, belə tviter fenomenləri çoxdur. Lakin bir şey də var ki, tviterdə paylaşımları köhnə tarixə ayarlamağın mümkün olduğunu nəzərə alsaq, bunun nə dərəcədə sensassion olması sual doğrur. “Fuatvni” isə fərqli biri idi…
“Fuatavni” Ədalət və İnkişaf Partiyasından olduğu iddia edilən və hökumət haqqında məlumat sızdıran tviter fenomenidir. Onun ilk tviti 18 fevral 2014-cü ildə, sonuncu tviti isə 20 iyul 2016-cı ildə olub. Hesab iddiaları hökumət daxilindəki daxili və xarici danışıqlara, 17 dekabr korrupsiya və rüşvət istintaqına, seçkilərdəki bəzi qanun pozuntularına, hökumətlə ictimaiyyət arasında baş verən hadisələrə və gizli əməliyyatlara əsaslanır.
“Akşam” qəzeti “Fuatavni”nin “Taraf” qəzetinin köşə yazarı Emre Uslu olduğunu iddia edib. Lakin Emre Uslu bu iddianı təkzib edib.
2016-cı ildə Türkiyədə hərbi çevriliş cəhdindən sonra həyata keçirilən əməliyyatda “Fuatavni” olduğu iddia edilən Baş nazirlik Məlumat Toplama Mərkəzinin Kəşfiyyat rəisi Akif Mustafa Koçyiğit 9 kompüter mühəndisi ilə birlikdə nəzarətə götürülüb. Dindirmələrdə Koçyiğit xaricdə 8-10 nəfərlik bir qrupun “Fuatavni” hesabından istifadə etdiyini və məlumatı onlara çatdırdığını söylədi. İstanbul Respublika Baş Prokurorluğu tərəfindən hazırlanan iddianamədə “Fuatavni” hesabının qurucusunun Səid Səfa olduğu iddia edilib. Sonrakı günlərdə Səid Səfaya ömürlük həbs cəzası istənildi. Hökumətə yaxın mənbələr kimi tanınan bəzi media orqanlarının verdiyi xəbərə görə, “Türkhane” xəbər saytını idarə edən qrupun “Fuatavni” qrupu olaraq istintaq altında olduğu qeyd edilib. “Today’s Zaman” qəzetinin köşə yazarı Aydoğan Vatandaşın bu hesabı istifadə edənlər arasında olduğuna dair iddialar da dolaşırdı.
“Fuatavni” 15 iyul çevriliş cəhdinin Rəcəb Tayyib Ərdoğanın öz planı olduğunu vurğulayırdı. Amma Ərdoğan bunu təkzib etmişdi. 19 iyul 2016-cı ildə o, Ərdoğanın konstitusiya dəyişikliyi referendumuna ölüm cəzasının qaytarılması bəndini əlavə edəcəyini demişdi. Lakin referenduma ölüm cəzası ilə bağlı heç bir maddə əlavə edilməmişdi.
Bununla yanaşı, tviter fenomeninin bir çox iddiaları doğru çıxıb.
Məsələn, fenomen 3 iyun 2015-ci ildə Kayseridə 2013-cü ildə Hərbi Lisey imtahanlarında pozuntular olduğu iddiasına görə həbslərin olacağı barədə tvit atdı. 3 iyun tarixində isə adı çəkilən təhsil müəssisəsində qanun pozuntusu ilə əlaqədar əməliyyat keçirildi.
6 iyun 2015-ci il tarixində atdığı növbəti tvitdə PKK-nın gənclər qanadına qarşı əməliyyat keçiriləcəyini yazdı. Bunun ardınca İstanbul Polis İdarəsinin Terrorla Mübarizə Şöbəsi tərəfindən PKK-nın gənclər qanadı olan YDG-H üzvlərinə qarşı əməliyyat keçirildi.
24 iyul 2015-ci ildə Gülən Hərəkatına yaxın təhsil ocaqlarına qarşı əməliyyat keçiriləcəyi ilə bağlı tvitinin ardınca 29 iyul tarixində bu əməliyyat gerçəkləşdi.
26 avqust 2015-ci ildə İŞİD-ə gedən TIR-larla bağlı reportaj edən Can Dündarın həbs olunacağı barədə tvit atdı və 27 noyabr tarixində Can Dündar həbs olundu.
Bunlardan başqa, “Fuatavni”nin bir sıra holdinqlərə, media qruplarına qarşı əməliyyatlar keçiriləcəyi ilə bağlı iddialar paylaşmasının ardından “İpek Holdinq”ə, “Kaynak Holdinq”ə, “Cümhuriyyet” qəzetinə, “Zaman” qəzetinə qarşı əməliyyatlar həyata keçirildi.
O, 19 aprel 2016-cı ildə baş nazir Davutoğlunun vəzifəsindən uzaqlaşdırılacağı ilə bağlı tvit atdı, 5 may tarixində Davutoğlu AKP genel başkanlığı üçün namizəd olmayacağını açıqladı.
19 iyul 2016-cı ildə siyasi partiya rəhbərlərindən birinə qarşı sui-qəsd olacağını yazdı, 25 avqust tarixində Kılıçdaroğluna qarşı sui-qəsdi cəhdi edildi.
“Fuatavni” tvitlərində özünəməxsus ifadələrdən istifadə edirdi. O, Rəcəb Tayyib Ərdoğana “BB”, “Tiran”, “Baş Oyunçu”, “Yezid”, “Faşist”, “Narsist” kimi sözlərlə müraciət edirdi. Bədiüzzaman Səid Nursinin ” Qorxma, titrə” sözünü tez-tez işlədirdi. Prezident sarayını isə “İsrafsaray” adlandırırdı.
Sonda, bu şəxsin və ya qrupun kimliyi hələ də məchul olaraq qalır. Bununla belə, “Fuatavni” bir müddət Türkiyə gündəmini əməlli-başlı zəbt etməyi bacarmışdı.
