“10 əmrin yenidən doğuşu hərəkatı” (Uqanda)
İdeologiya: Dünyanın sonu gəldikdə, yalnız 10 əmri bilən şəxslər xilas ola biləcək.
Cinayət: kütləvi qətl
1989-cu ildə 37 yaşlı Uqanda sakini Kredoniya Mverinde özünü Müqəddəs Məryəm ananın elçisi elan etdi və bu haqda böyük torpaq sahibi Cozef Kibveteryə məlumat verdi. Onu buna inandırdıqdan sonra, hər ikisi təriqət qurdular. Bu təriqətin 2000-ci ildə artıq bir neçə min nəfər üzvü vardı.
Təriqət daxilində nizam-intizam çox ciddi idi. Üzvlər liderlərə mübahisəsiz tabe olmalı idilər. Onlara danışmaq, qaydaları pozmaq, yalandan şahidlik etmək qəti qadağan edilirdi. Üzvlər öz mal-mülklərini və pullarını təriqətə verməli idilər.
17 mart 2000-ci ildə dünyanın sonunun gəlişini gözləyən 530 nəfər təriqət üzvü Kanunqa kəndində yerləşən kilsəyə gəlir və hamısı içəri daxil olduqdan sonra qapılar kilidlənir. Kilsə yandırılır.
395 nəfərin yanğınadək öldürülmüş cəsədi tapılır. Qurbanların ümumi sayı isə 925 nəfər idi. Kredoniya Mverinde və Cozef Kibvetere isə qaça bilirlər və o vaxtdan bəri beynəlxalq axtarışdadırlar.
“Günəş məbədi ordeni” (İsveçrə)
İdeologiya: Dünyanın sonu gəldikdə yalnız gizli bilgilərə sahib olanlar (təriqət üzvləri) və ruhunu Siriusa göndərənlər xilas ola biləcəklər.
Cinayət: qətl, intihara təhrik etmə
Rozenkreyser fəlsəfəsindən və britaniyalı okkultist Alister Kroulinin təlimlərindən təsirlənərək 1984-cü ildə həkim Lyuk Jüre və sahibkar Jozef Di Mambro bu gizli cəmiyyəti yaratdılar.
Lyuk Jüre
Onlar on ilə yaxın müddətdə təriqətin strukturlaşması və ideologiyası üzərində çalışdılar. Onlar deyirdilər ki, tezliklə qiyamət gələcək və planetimiz məhv olacaq. Yalnız ruhu bədəndən atəş vasitəsilə çıxaracaq və ruhunu Siriusa göndərəcək şəxslər xilas ola biləcəklər.
1994-cü ilin oktyabrında İsveçrənin Şeyri adlı kəndində 23 nəfər, Salvan adlı qəsəbədə isə 25 nəfər təriqət üzvünün cəsədi tapılır. 3 nəfərin cəsədinə isə Alp dağlarında dağ-xizək məkanında yerləşən evdə rast gəlinir. Eyni zamanda, Kanadada Lyuk Jüreyə məxsus evdə yanğın baş verir və burada bir neçə nəfərin cəsədləri aşkar olunur. 1996-cı ilin dekabrında Fransa Alplarında 16 nəfərin meyiti aşkarlanır, 1997-ci ilin martında isə Kanadada 5 nəfər özünü yandırmış adamın cəsədi tapılır.
1994-1997-ci illər ərzində İsveçrə, Kanada və Fransada tapılmış cəsədlər təriqətin adeptlərinə məxsus idi. Cəsədlərin üzərində ritual geyimləri və məkanlarda ordenə məxsus simvolika da aşkar olunmuşdu.
Ümumilikdə qurbanların sayı 100 nəfərdən çox idi. Onların təxminən yarısı, həmçinin Lyuk Jüre və Di Mambro, özlərini yandırmışdı, qalanları isə öldürülmüşdü.
“Tanrının uşaqları” (ABŞ)
İdeoogiya: “Sevgi qanunu” — tanrının uşağı olmaq üçün bir-birilərini sevmək lazım idi.
Cinayət: azyaşlılara qarşı zorlama, fahişəliyə təhrik etmə
Təriqət 49 yaşlı protestant vaiz Devid Berq tərəfindən yaradılıb. O, özünü Musa-Davud peyğəmbər və ya sadəcə Mo adlandırırdı. Təlimin əsas qayəsi: “sevgi – həyat və həqiqi inanc, cinsəllik – ali yaradılış və allahın möcüzəsi” idi. Bu ideyalar hippiləri daha çox çəkdiyindən, təriqətin sıralarına ilk və daha çox hippilər qoşulmuşdu. Mo öz adeptlərinə “Monun məktublarını” (sayı 3 mindən çox idi) oxuyur və müzakirələr aparırdı.
Təriqət daxilində öz ailə vəziyyətindən asılı olmayaraq gənclər, yeniyetmələr, uşaqlar, valideynlər və övladları cinsi əlaqəyə girirdilər. Berqin göstərişi ilə qadınlar fahişəlik edir və varlı kişilərlə əlaqədə olduqdan sonra onları təriqətə cəlb edirdilər.
1978-ci ildə təriqətin artıq dünya üzrə (ABŞ, Fransa, Portuqaliya və s.) 100-dən çox koloniyası vardı. Lakin tezliklə təriqət və onun əməlləri hökumətin və KİV-nin nəzərini cəlb etdi və onlara qarşı araşdırmalara başlanıldı. Təriqət rəhbərləri pedofiliyada, uşaq pornoqrafiyasının hazırlanmasında və yayılmasında və fahişəliyin təşkilində günahlandırıldılar. Mo beynəlxalq axtarışa verildi.
Xədimlər (Rusiya)
İdeologiya: Bədəni əhlilləşdirmək yolu ilə ruhu xilas etmək.
Cinayət: Şikəstliyə səbəb olma.
Xədimlik XVIII əsrin ikinci yarısında Orlov quberniyasında yarandı. Hərəkatın banisi kəndli Kondratiy Selivanov idi.
Xədimlər, adlarından göründüyü kimi, nikaha heç vaxt girmir, nəsil artırmağı qəbul etmirdilər. Bunun üçün onlar xədim olmağı, cinsiyyət orqanlarının qismən və ya tamamilə kəsilməsini əsas görürdülər. Hətta qadınlar da xədim olunurdu.
Təriqət belə amansız üsullara üstünlük verdiyinə görə qadağan edildi. Təriqət üzvlərinin bəzilərini Sibirə sürgün etdilər, bəziləri həbs olundu, bəziləri isə müharibəyə göndərildi. Buna baxmayaraq, təriqət XIX əsrin ortalarına qədər ömür sürdü, hətta üzvlərinin sayında xeyli artım müşahidə edildi. Moskva, Peterburq, Kostroma və s yerlərdə icmaları meydana gəldi. XX əsrin əvvəllərində icma üzvlərinin əksəriyyəti mühacirət etdi. Rusiyada qalan üzvlər öz fəaliyyətlərini davam etdirsələr də, daha çox asketik həyata üstünlük verdilər, xədim etmə, ailə və cinsəllikdən imtina etdilər.
Kalikula-şaktizm (Hindistan)
İdeologiya: Ölüm rəmzi olan Kali adlı ilahəyə tapınma.
Cinayət: qurban etmə.
11 oktyabr 2013-cü ildə Britaniya qəzeti Daily Mail Hindistanda baş vermiş bir hadisə haqqında yazı yayımladı: Uttar-Pradeş ştatının sakini Rackumar oğlunu çimizdirib, Kali ilahəsi məbədinə aparır. Orada dini ayini yerinə yetirdikdən sonra evə gəlir və oğlunu Kali heykəli qarşısında qurban kəsir. Qonşuların köməyi ilə o, polis tərəfindən həbs edilir.
XX əsrədək, əsasən, insan, hazırda isə keçi, kəl və ev quşları qurban edilir.
