Tamplierlərin mənşəyi: yəhudi ataların nəsillərindən idilər?...
Tədqiq və Tətöbbə

Tamplierlərin mənşəyi: yəhudi ataların nəsillərindən idilər?

Yəqin ki, Tamplierlər, başqa adla desək, “Məbəd Cəngavərləri” haqda hər birimiz az da olsa nələrsə eşitmişik və ya oxumuşuq.

Qısa arayış:

Tamplierlər (fr.templiers — “məbədçilər”), Məbəd cəngavərləri və ya Məsihin və Süleyman məbədinin yoxsul cəngavərləri ordeni (lat.Pauperes commilitones Christi Templique Salomonici) Birinci Səlib yürüşü zamanı ələ keçirilmiş Qüdsü ətrafdakı müsəlman dövlətlərindən qorumaq və bura ziyarətə gələn xristian zəvvarları mühafizə etmək məqsədilə Huqo de Peynin başçılıq etdiyi bir qrup cəngavər tərəfindən 1119-cu ildə (bir versiyaya görə isə 1118-ci ildə) yaradılıb. Fransa kralı IV Filipin 1307-ci il sentyabrın 22-də verdiyi göstərişə əsasən, oktyabrın 13-ü, cümə günü ordenin Fransa ərazisindəki bütün üzvləri həbs olunaraq istintaqa cəlb edilib. Tamplierlərə vurulan son zərbə, 23-cü və sonuncu magistr olan Jak de Molenun tonqalda yandırılması olub.

Bəs əslində kim idi onlar? Nə üçün bu torpaqlara gəlmişdilər?

Əslində belə bir fikir mövcuddur ki, 9 nəfər cəngavər Sion təriqətinin tapşırığı əsasında Süleyman məbədinin qalıqları altında gizli qalmış müqəddəs əşyaları tapmaq və Avropaya gətirmək üçün görəvləndirilmişdilər. Bu əşyaların nədən ibarət olması barədə çeşidli iddialar mövcuddur. Onların müqəddəs kitabın hissələrinin, eləcə də, müqəddəs qədəhin (bunun da hələ konkret olaraq nə olduğu məsələsi mübahisə predmetidir) olması haqda söyləntilər var.

Tamplierlərin müasir araşdırmaçılarından olan Tim-Uolles Mörfi (Tim Wallace-Murphy) və Kristofer Nayt (Christopher Knight) qeyd edirlər ki, tamplierlər əslində bizim eranın 70-ci ilində Roma işğalı zamanı müqəddəs torpaqlardan qaçmış və sonradan Avropanın monarx sülalələrinin yaranma prosesində iştirak etmiş yəhudilər idi. Bu yəhudilər Kabbala və essen yazılarını romalılar talamasın deyə, müxtəlif bölgələrdə gizlətmişdilər. Avropaya gələn bu “ağsaqqallar” bir sıra əsilzadə nəsillərinə mənsub xanımlarla ailə həyatı qurmuş və onlardan 24-ü sonradan “Rex Deus” və ya “Star” olaraq bilinən sülalələrin “patriarxları” olacaqdılar.

Bunlardan fransız generalı Qodfrey de Bullionu (Godfrey de Boullion) göstərmək olar. Onun əmisi oğlu, Qüds kralı II Bolduin Əl-Əqsa məscidinin qalıqları altından müqəddəs qalıqların tapılması işində Qodfreyə yardımçı olmuşdur. Bu qazıntı işlərinin qalıqları 1800-cü illərdə Britaniya araşdırmaçıları tərəfindən aşkarlanıb və hazırda Şotlandiyanın məşhur tamplier arxivisti Robert Braydonun ailəsi tərəfindən qorunur.

Tamplierlərin himayədarı II Bolduin xəstəlik nəticəsində öldükdən sonra sənədlərdən bir neçəsi kopyalanmaq üçün Avropaya götürüldü. “Cənnət Yerusəlim” adlandırılan bu kopyalar hazırda Gent universitetinin kitabxanasında saxlanılır.

1128-ci ildə Trua konseyində papa III Honoriusun iştirakı ilə düzənlənən xüsusi bir mərasimdən sonra iki cəngavər – Hüqo de Peyn və Andre de Monbard tərəfindən bu dörd nüsxə Şotlandiyaya (Kilvinninq) aparıldı, hansı ki, indi burada masonluğun “ana lojası” yerləşir.

Xəzinə uzun müddət burada qaldıqdan sonra Roslinə Sinkler qəsrinə köçürüldü. Sinkler ailəsi də müqəddəs torpaqlardan gələn yəhudi “ağsaqqaları” nəslindən (“Rex Deus” və ya “Star”) idi. Həmin dörd sandıq Roslində qəflətən başlayan yanğın səbəbilə buradan çıxarıldı. Yaxınlıqda yeni Roslin şapeli inşa edildi. Güman ki, tez bir zamanda bu şapelin inşasının əsas səbəbi, elə bu dörd sandığın qorunması məqsədilə ola bilərdi.

Yeri gəlmişkən, Kristofer Nayt, Roslin şapelinin Herod məbədinin kopyası olaraq tikildiyini qeyd edir. Həm də şapelin divarlarından biri bilərəkdən yarımçıq şəkildə inşa edilib, Herod məbədinin uçurulmuş divarını simvolizə etmək üçün.

İsmayıl Süleymanov