Qarabağ müharibəsi deyiləndə ilk olaraq futbol adamlarımızdan ağla gələn Novruz Əzimovdur. SSRİ çempionatlarında “Neftçi”inin sonuncu qolunun müəllifi olan (1988-ci ildə Kiyevdə yerli “Dinamo”nun qapısına) Əzimov 1992-ci ildə yaşıl meydanı döyüş meydanına dəyişib. Xocalı faciəsindən sonra mart ayında könüllü olaraq cəbhəyə yollanan futbolçu Arif Paşayevin rəhbərlik etdiyi 811-ci Laçın alayının tərkibində döyüşlərdə iştirak edib. İki ay cəbhədə olduqdan sonra mayın 3-də Bakıya məzuniyyətə gələn Novruz bəy 5 gün sonra – mayın 8-də “Neftçi”nin heyətində ilk Azərbaycan çempionatında Sumqayıt “Xəzər”inə qarşı meydana çıxır. Amma həmin gün Şuşanın işğal olunduğunu eşitdikdən sonra yenidən doğulduğu rayona – Laçına cəbhəyə yollanır və yenidən döyüşlərdə iştirak edir:
“Suarası kəndinə döyüşə getdik. Ermənilər kəndə tökülmüşdü. Həmi vaxtı da şayiə yayılmışdı ki, guya onların hamısı zirehli paltar, filan geyinir, ancaq göz yerləri açıq qalır. Gərək oradan vurasan. Atışma oldu, sonra ermənilər çəkildi, geri qayıtdıq. Daha sonra Cağazur kəndində olduq. Həmin yer hündürdə idi. Orda 31-ci post vardı, mayın 13-14-ü ermənilər tutmuşdu. 6-7 nəfərlə Cağazura yollandıq. BMP ilə getdik. Posta çatanda düşüb, səpələndik. Açığı, bizi ora getməyə qoymurdular. Elə bəxtə-xuda getdik. Yuxarıdan bir erməni papağı ilə yellədi ki, “gəlin, gəlin”. Bir az biz atdıq, bir az onlar atdı. Amma ora çıxanda gördük ki, yoxdular. O dərənin içində hara itdilər, bilmədik. Belə atışmalar çox olub”.
1992-ci ildə ilk Azərbaycan çempionatında “Neftçi” ölkə çempionu olsa da, Əzimov lazımi sayda oyunda iştirak etmədiyindən reqlamentə əsasən ona medal düşmürdü. Amma futbolçuya jest edən AFFA Novruz bəyi də mükafatlandırır. 1993-cü ilin iyulunda Gəncə Dəmir Yol Nəqliyyatında Polis İdarəsində əməliyyat müvəkkili işləməyə başlayır. Elə karyerasını da burada eyni vaxtda “Kəpəz”də oynayaraq davam etdirir. 1997-ci ildə isə elə bu komandanın heyətində futbolla vidalaşır. Müxtəlif illərdə “Kəpəz”, “Bakı”, “Olimpik” (indiki “Şüvəlan”) kimi klublarda baş məşqçi və ya köməkçi məşqçi kimi fəaliyyət göstərib. Hazırda isə “Neftçi”nin məşqçilər qrupunda yer alıb.
Qeyd: Yazıda Əzimovun bir neçə il əvvəl milli.az saytında Şamo Quliyevə verdiyi müsahibədən də istifadə edilib.