Kişi futbol komandasını çempion edən qadın
SportİSM

Kişi futbol komandasını çempion edən qadın

Çjan Yuan Din (ing. Chan Yuen Ting) kişilərdən ibarət futbol komandasını bir ölkənin ən üst liqasında çempion edən ilk qadın baş məşqçi kimi tarixə düşüb.

2016-cı ildə “İstern” klubu (ing. “Eastern”) gənc mütəxəssisin rəhbərliyi altında tarixində ilk dəfə Honkonq Premyer Liqasında zəfər yaşayıb.

Xanım Din 2015-ci ilin dekabrında “İstern”in “sükanı arxası”na keçməklə də bir ilkə imza atıb. Belə ki, buna qədər Honkonq çempionatında heç bir klubun baş məşqçi postunu qadın çalışdırıcı tutmamışdı.

Həmin sezon Çjan Yuan Dinin baş məşqçiliyi altında 15 matça “İstern” bu görüşlərdən yalnız birində məğlub olub. Onun komandası 2015/16 mövsümündə daha 2 ölkədaxili titul qazanıb – Çağırış Kuboku və Super Kubok. Bu uğurlardan sonra Honkonqda “ilin məşqçisi” seçilib. BBC-nin hər il tərtib etdiyi “100 Qadın” siyahısına daxil edilib.

Növbəti mövsüm ilk dəfə Honkonq klubu Asiya Çempionlar Liqasında təmsil olunub. Yenə bir ilk yaşanıb. “İstern”i “Quançjou” ilə matça çıxaran Din beynəlxalq qitə turnirində kişi komandasının baş məşqçisi olan birinci qadın idi.

Vaxtilə Devid Bekhemə heyranlığı ilə futbola maraq salan Çjan Yuan Din hazırda Çin Super Liqasında mübarizə aparan “Tsyanzu”nun qadın komandasını çalışdırır.

© Elmar Rzalı