Eto sülh elçisi olacaq
SportİSM

Eto sülh elçisi olacaq

“Futbol ölüm-dirim məsələsi deyil. Ondan da vacibdir”. Əfsanəvi Bill Şenklinin bu sözləri yenidən “işə düşüb”. Lakin bu dəfə ölümün qarşısını almalıdır. Belə ki, kamerunlu futbolçu Samuel Eto vətənində Anqlofon probleminin yaşandığı şimal-qərb və cənub-qərb bölgələrində sülh elçisi olacaq. 

Kamerunun təhsil naziri Nalova Lyonqa ulduz forvardun ingilis dilli əhalinin yaşadığı Anqolofon əraziləri ziyarət edəcəyini bildirib. Eto yerli əhali ilə görüş çərçivəsində valideynləri uşaqlarının təhsilini davam etdirməsi mövzusunda bilgiləndirəcək. Dövlət rəsmisi 2016-cı ilin noyabrından başlayan problem səbəbilə bağlanma nöqtəsinə gələn məktəblərin gələcəkdə normallaşması üçün Etonun populyarlığından istifadə etməyi düşündüklərini söyləyib. İdmanın həyatın ayrılmaz hissəsi olduğunu deyən Eto təcrübələrini gənclərlə bölüşəcək. O həmçinin yeni idman və təhsil layihəsi irəli sürərək gənclərin xəyallarını gerçəkləşdirəcəklərini də sözlərinə əlavə edib. 

Rəsmi dövlət dili ingilis dili və fransız dili olan Kamerunda hökümətin ingiliscə bilməyən müəllimlərin və hakimlərin Anqlofon bölgəsindəki məktəblərlə məhkəmələrə təyin edilməsindən sonra bu problem ortaya çıxıb. Həmin müəllimləri boykotu ilə əlaqədar olaraq məktəblərdə davamiyyət aşağı düşüb. Separatçıların təhdidiylə isə xeyli məktəb bağlanılıb. 

BMT-nin rəsmi məlumatlarına görə, problem dövründə adıçəkilən ərazidə ən azı 40 məktəb yandırılıb. 

Separatçılar ötən ilin oktyabrın 1-də Sisuku Ayuk Tabenin başçılığı ilə Anqlofon bölgənin şimal-qərbində Bamendada “Ambazonya” adlı qondarma respublika qurublar. Tabe bu ilin yanvarında Nigeriyada həbs olunaraq Kameruna təvil verilib. Separatçılarla təhlükəsizlik qüvvələri arasında baş verən atışmalarda isə yüzlərlə insan öldürülüb.