Cəhənnəmdən çıxmış futbolçu
SportİSM

Cəhənnəmdən çıxmış futbolçu

Braziliya millisinin və “Mançester Yunayted”in yüksəlişdə olan ulduzu Antoni doğulduğu yer, uşaqlığı və hədəfləri barədə açıqlama verib:
“Mən cəhənnəmdə doğulmuşam. Bu zarafat deyil. Məsələdən xəbərdar olmayan avropalı dostlarım üçün söyləyim ki, San-Pauluda böyüdüyüm məhəllə “İnferninyo” adlanır. Mənası “kiçik cəhənnəm” deməkdir. Əgər həqiqətən məni bir insan kimi tanımaq istəyirsinizsə, o zaman haradan olduğumu bilməlisiniz. Köklərim cəhənnəmdən gəlir.
Rəzil bir yerdə dünyaya göz açaraq böyümüşəm. Qapımızdan 5-10 m aralıda narkotik alverçiləri var-gəl edirdi. Silah görməyə o qədər öyrəşmişdik ki, artıq heç qorxulu təsir bağışlamırdı. Polislərin evimizə neçə dəfə basqın etdiyinin sayını unutmuşam. Gördüklərim və yaşadıqlarım inanılmazdır.
9 yaşında məktəbə gedərkən yerdə uzanmış adam gördüm. Hərəkət etmirdi, ölmüşdü. Favela sizi belə şeylərə qarşı məcburən hissiyyatsızlaşdırır. Çarəm yox idi, məktəbə getməliydim. Ona görə də gözümü yumub meyitin üstündən tullandım.
Bunu sərt və qorxunc görünmək üçün demirəm. Əksinə bunlar mənim reallığımdır. Mübarizəmin qarşılığında cənnətdən hədiyyə aldım. Futbol topu mənim xilaskarımdır. Fitrən futbola aşiqəm.
Bütün hərəkət və driblinqləri əfsanələrdən öyrənmişəm – Ronaldinyo, Neymar və Kriştianu Ronaldodan. Əvvəllər gizlincə qonşunun internetinə qoşulub, “YouTube”dan onların videolarına baxırdım.
Atam hər səhər saat 5-də işə gedib axşam 8-də qayıdardı. Atama tezliklə meydanda onun üçün can qoyacağımı söyləmişdim. Mətbuat həmişə xəyallar barədə soruşur. Dünya kuboku, “Ballon d’Or” və s. Bunlar mənim arzularım deyil, hədəflərimdir. Tək istəyim ailəmi oradan çıxarmaq idi.
“San-Paulu”da peşəkar debütümdən sonra da gecəqonduda qalırdıq. 18 yaşımda hələ də atamla eyni çarpayıda yatırdım. Başqa seçimimiz yox idi.
Üç il ərzində gecəqondulardan “Ayaks”a, “Mançester Yunayted”ə getdim. Necə belə tez oldu? Çünki futbol meydançasında mənim üçün qorxu anlayışı yoxdur. Böyüyərkən cəsədlərin üzərindən adlamağa məcbur qalanda futbolda heç nədən çəkinmirsiniz.
Hər axşam süfrəsində çörək olan avropalılar futbolun oyun olduğunu unudurlar. Futbol mükəmməldir, ancaq sadəcə oyundur. Dünyanın kiçik cəhənnəmlərində doğulan biz üçün yeganə ciddi şey həyatdır.
Harada olmağımdan, başıma nə gəlməyimdən asılı olmayaraq mənə hər şeyi öyrədən yeri təmsil etdiyimi söyləyirəm. Evim və ailəm olmadan heç bir şeyin önəmi yoxdur. Hər oyundan əvvəl butslarıma kiçik bir xatırlatma yazıram – “FAVELA”.
© Elmar Rzalı