Bir model sizə gələcəyinizdən xəbər verə bilərmi?
Ordan-burdan

Bir model sizə gələcəyinizdən xəbər verə bilərmi?

Bu suala milyonlarla türk “bəli” cavabını verir. Söhbət son vaxtların ən məşhur mobil tətbiqlərindən biri olan “Faladdin” və onun qurucusu Sertaç Taşdelendən gedir.

“Faladdin” – süni intellektə əsaslanan mobil fal tətbiqidir. 2017-ci ildə Sertaç Taşdelen və Kaya Diker tərəfindən Sinqapur mərkəzli olaraq quruldu. Bu gün milyonlarla insanın sevə-sevə yüklədiyi mobil tətbiqə çevrilib.

Bəs belə bir tətbiqi yaratmaq ideyası Sertaç Taşdelenə necə gəldi?

Sertaç Taşdelen 37 yaşındadır. Bilkent Universitetinin biznes fakültəsinin məzunudur. İş həyatına 22 yaşında ikən Dubayda, bir məşhur beynəlxalq şirkətdə (Ernst & Young Business Advisory) başlayır. Daha sonra model kimi fəaliyyət göstərir. Hər an öz biznesini yaratmaq fikri ilə yaşayır. Lakin “necə etməli?” fikri onu rahat buraxmır.

2011-ci il. Bir gün dostları ilə qəhvə içərkən, qəhvə falına baxdırmaq firkinə düşür. Lakin anası yanında deyildi. Bu arada, onun anası məşhur Binnaz abla, fala baxmağı ilə Türkiyədə məşhur idi. O, qəhvə fincanının şəklini çəkib “messencer”də anasına göndərir və anası da cavabları ona yazır. Bu anda “niyə bundan pul qazanmayım ki?” ideyası beynini dəlməyə başlayır. Beləliklə, Türkiyədə ilk onlayn fal saytını – www.binnazabla.com saytını qurur. Bu sayt az sonra milyonlarla insanın “üz tutduğu” bir “məkana” çevrilir.

Bu gün “Faladdin” tətbiqi 3 milyondan çox abunəçi ilə rekord qırmağa davam edir. Lakin bu mobil tətbiq vasitəsilə telefon danışıqlarının izlənilməsi dedi-qoduları da dolaşmaqdadır.

İsmayıl Süleymanov