Yaşadığımız kompüter, texnologiya əsrində ibtidai quruluşda yaşayan hər hansı insan qrupunun, qəbilənin yaşadığı o qədər inandırıcı olmasa da, hazırda belə bir qəbilə Hindistan sahilləri yaxınlığında – Benqal körfəzində yerləşən Şimali Sentinel adasında yaşayır. Adanın sahəsi 72 kvadrat metrdən böyük deyil. Əhalinin sayını isə dəqiqləşdirmək mümkün deyil. Çünki sentinellər “yadlar” ilə əlaqəyə girməkdən çəkinirlər. Lakin onların sayının təxminən 250 nəfər civarında olduqları güman edilir. Bəzi tədqiqatçılar isə bu rəqəmin şərti olduğunu deyir və qeyd edirlər ki, onların sayı 50 nəfərdir, bəziləri isə rəqəmin 400 nəfər olduğunu bildirir.
1974-cü ildə adaya çəkiliş qrupu gəlir. Onlar yerli sakinlərlə əlaqə yaratmaq və onlar haqqında sənədli film çəkmək qərarına gəlirlər. Kinematoqraflar sahilə hədiyyələr – kokos, donuz əti, qab-qacaq və kuklalar düzürlər. Lakin sentinellər heç də qonaqpərvər davranmırlar və çəkiliş qrupunu ox atəşinə tuturlar. Nəticədə operator yaralanır. Çəkiliş qrupu birtəhər ərazidən uzaqlaşır və kənardan adalıların hərəkətlərini müşahidə edirlər. Sakinlər hədiyyələrlə qəribə davranırlar: donuz ətini və kuklaları torpağa basdırırlar, qab-qacaq və kokosları isə özləri ilə götürürlər.
2001-ci ildə ada sakinlərinin sayını hesablamaq qərara alınır. Bu məqsədlə, yenidən ora səfər təşkil edilir. Kənardan müşahidələr nəticəsində 21 kişi və 18 qadın sayılır, lakin bu, yenə də sakinlər barədə tam dolğun informasiya deyildi.
2006-cı ildə iki hindli balıqçı ehtiyatsızlıq edərək, adaya çox yaxınlaşır və bu zaman ox atəşi nəticəsində hər ikisi həlak olur. Hətta onlar meyitlərin hind polisi tərəfindən götürülməsinə də icazə vermirlər.Əraziyə helikopter cəlb edilir və sentinellər onu da ox atəşinə tuturlar.
Sentinellər yığıcılıq, balıqçılıq və ovçuluqla məşğuldurlar. Lakin onların əkinçiliklə məşğul olub-olmamları məsələsi açıq qalır. Onlar heç od da əldə edə bilməyiblər, oddan ildırım çaxmaları nəticəsində yararlanırlar. Kömürü gil qablarda saxlayırlar. Onların danışıq dilləri barədə heç bir məlumat yoxdur. Həmçinin onların dillərinin hansı dil qrupuna aid olması da bilinmir.
Sentinellərin oxları mükəmməldir; adamı 100 metrdən “tapa” bilir.
Sentinellər haqqında XIII əsr italyan səyyahı Marko Polo məlumat verir. O, yazır ki, sentinellər gördüyü ən qəddar və qanlı tayfalardır. Bəlkə də buna görə onlar əsrlərdir ki, öz müstəqilliklərini qoruya biliblər. İnzibati cəhətdən ada Hindistana aid olsa da, hökumət bu adaya qarşı hər hansı ərazi iddiası sürmür.
Mənbə: http://i-fakt.ru