Mistika ilə dolu ada – Lənətlənmiş Qayola
Ordan-burdan

Mistika ilə dolu ada – Lənətlənmiş Qayola

Paylaşmaq

Qayola adası İtaliyanın cənub – qərbində – Kampaniya regionunda olan Neapol şəhərinə aid ərazidə – Tirren dənizinin bir hissəsi olan Neapol körfəzində yerləşən kiçik bir adadır. Bu ada lənətlənmiş ada kimi tanınır. Əslində Qayola körpü ilə birləşmiş iki balaca adadan ibarətdir. Adalardan birində böyük villa var. Uzun illərdir ki, adada heç kim yaşamır. Hesab olunur ki, o lənətlənib və bu səbəbdən adada çoxlu ölüm halları baş verib. 1920-ci ildə adanın ilk sahibi olan isveçrəli Hans Braun burada müəmmalı şəkildə ölüb: onun cəsədi xalçaya bükülmüş şəkildə tapılıb. Bir müddət sonra isə onun həyat yoldaşı naməlum şəraitdə boğulub. Adanın yeni sahibi Otto Qrubnak anidən infakt nəticəsində ölüb. Ondan sonra adanı satın almış baron Karl Paul Lanqhaym bir müddət sonra müflis olub. Növbəti sahib Moris Sandoz isə özünə qəsd edib. Özündən əvvəlki sahiblərinin başına gəlmiş olaylara rəğmən Canni Agnelli adanı satın alıb. Bu addımı atdıqdan sonra isə onun qohumları bir-birinin ardınca ölməyə başlayıb. Ardınca isə oğlu qaçırılıb. Oğrular ondan oğlunun azadlığı üçün külli miqdarda pul tələb ediblər. Adanın son sahibi Canpaskal Qrappone isə cinayətdə ittiham olunub. Onun öldürdüyü deyilən iki nəfər isə adanın qarşı sahilindəki qonşularıdır. Nəinki bu adanı alanlar, hətta adanı almaq istəyən insanlar da ölüm, bədbəxtlik və səfalətlə qarşılaşıblar. Buna görə də Qayola adası pis şöhrət qazanıb və daha heç kəs bu adanı almaq istəməyib. Bu ada indi xüsusi qorunan bir sahə olaraq, Kampaniya region hökumətinin mülkiyyətindədir. Mistik tarixi ərazilər kimi lənətlənmiş Qayola da çox sayda turistin diqqətini özünə cəlb edir. Buraya gələnlər nəinki ada ətrafında gəzə bilər, hətta sahibsiz villanın içərisinə girə və buraya baxa bilərlər.

 

Tərxan Paşazadə