Qısa həyatı boyunca (1911-1938) Robert Conson, dünyada ona şöhrət qazandıracaq bir musiqi mirası qoyub getdi. Hətta Erik Klepton (Eric Clapton) və Keys Riçards (Keith Richards) kimi görkəmli şəxsiyyətlər də onu indiyədək yaşamış ən yaxşı bluz musiqiçisi adlandırmışlar.
1911-ci ilin mayında Missisipinin Hazlehurst qəsəbəsində dünyaya gəldi. Ailədə onuncu uşaq idi. Uşaqlıqdan musiqiyə həvəsi böyük idi. Lakin öyrənə bilmədiyi şey, gitara çalmaq idi.
Deyilənə görə, bir gün qəsəbə kənarında gecə gəzişərkən Şeytanın gitara çaldığını görür və sonra Şeytan buna da gitarada ifa etməyi öyrədir. Birdən-birə onun belə bir istedadının “yaranması” insanları dəhşətə gətirir. O, ilk mahnısını – “Şeytan və Mən”i bəstələyir.
Onun bu istedadı ona çox pul, şöhrət qazandırmasa da, gününü küçələrdə, restoranlarda mahnı ifa etməklə və bir də bir neçə səs yazısı hazırlamaqla keçirdi.
1938-ci ilin avqustu…Missisipidə Grinvudda konsert verirdi Robert…Bu zaman ona bir şüşə viski ikram edildi…və bu viskidən zəhərləndi. Bunu edən kim idi? Naməlum olaraq qalır. Bəlkə hansısa qadının qısqanc əri…ya qadının özü…yaxud başqa bir qısqanc xanım..
Lakin bəziləri onun zəhərlənmədiyini, sifilisdən dünyasını dəyişdiyi fikrini irəli sürür. Digər bir müəmma onun dəfn yerinin məlum olmamasıdır. Nə bir qəbir, nə bir baş daşı qoyuldu…
Missisipidə Morqan şəhəri yaxınlığındakı Mount Zion Missioner Baptist Kilsəsi onun məzarlıqda işarətsiz bir qəbirdə dəfn edildiyinə inanır. 1990-cı ildə kilsə onun xatirəsinə bir abidə ucaltdı. Bundan başqa, 1990-cı ildə Missisipidə Peyn Kapellası onun qalıqlarının yeri olduğu düşünülən yerdə qəbir daşı qoydu.
Robert Conson gitara üçün ruhunu Şeytanamı satdı? O öldürüldümü? Öldürüldüsə, kim öldürdü? Niyə dəfn yeri bilinmir? Bu suallar hələ də açıq qalır. Bircə bilinən odur ki, o, bluz musiqisi tarixinin ən məşhurlarından biridir…