Kimdir müqəssir: Bartomeu, yoxsa Messi?
SportİSM

Kimdir müqəssir: Bartomeu, yoxsa Messi?

“Leo Messi karyerasını “Barselona”da bitirmək istəyir. Onun müqaviləsi 2021-ci ildə başa çatır. Messi ilə müntəzəm olaraq danışırıq və burada yeni məşqçi ilə birlikdə yeni layihəyə başlayacağımızı bilir. Hazırda hamımız məyusuq. Bununla bərabər, yeni proyekt bizi həyəcanlandırır və gələcək barədə düşünmək məcburiyyətindəyik” – prezident Jozep Mariya Bartomeu bu açıqlamanı avqustun 18-də klub televiziyasına verib.

Üzərindən bir həftə keçməmiş Messi “Barselona”ya burofaks göndərdi və müqaviləsindəki bənddən istifadə edərək ayrılmaq qərarına gəldiyi barədə klubu məlumatlandırdı. “Barselona” tarixinin ən yaxşı futbolçusu ağrılı məğlubiyyətdən (2:8) sonra yolun sonuna gəldiyini düşünürdü. Başda əksər mənbələrin şübhələri var idi və Messinin qərarı Bartomeunun sonunu gətirəcək “zərbə” kimi qiymətləndirilirdi. “Bavariya” ilə matçdan sonra prezident istefa vermək niyyətində olmadığını açıqlamış və klubun ehtiyacı olan islahatları həyata keçirmək üçün səlahiyyət müddətini tamamlayacağını bildirmişdi. Hətta Bartomeu Messinin Ronald Kumanın rəhbərliyi altında başlayacaq yeni layihənin sütunu olacağını da demişdi.

Leonun qərarı bu planlara mənfi təsir edə bilər. Amma “Barsa”ya yaxın mənbələr son baş verən hadisələr fonunda artıq prosesə başqa prizmadan baxmağa başlayıblar. Jurnalist Dermot Korriqan klub daxilindəki vəziyyətə hakim bir neçə şəxslə söhbətləşib və fikirləri bir araya toplayıb. Onlardan biri qeyd edir: “Siz Bartomeunu tanımırsınız. Əminəm ki, o, Messinin getməyini istəyir. Klubun maliyyə vəziyyəti bərbaddır və Bartomeu məsələni Leonu satmaqla həll etmək niyyətindədir. Messinin transferindən 200 milyon avro qazansalar, maaşına görə isə 100 milyon qabağa düşsələr, növbəti maliyyə hesabatını tənzimləyə biləcəklər. Hadisələrin birbaşa Bartomeunun təhriki ilə baş verdiyinə dair ehtimalı gözardı etməyin. İşin içində Sandro Rozel (“Barsa”nın keçmiş prezidenti) də ola bilər. Bartomeu və Rozel yaxın dostdurlar, onlar bir komandadırlar”.

“Barselona”nın prezidenti postuna favorit namizədlərdən birinə yaxın başqa mənbə də bu fikri dəstəkləyir: “Messini satmaq Bartomeunun dövründə ortaya çıxan borcları bağlamağa xidmət edəcək. Eyni zamanda, bu, nəzarətdən çıxan maaş yükünü azaltmağa yardım edəcək. Bir daşla iki quş vurmağı düşünürlər”.

Kənardan belə fikirlər bir az şişirdilmiş, hətta əsassız səslənə bilər. Amma “Barselona”nın maddi vəziyyəti, həqiqətən də, pisdir. Bartomeu qürurla “Barselona”nın 1 milyard avro gəlir həddini aşan ilk idman klubu olacağını elan etmişdi. Həmin açıqlamanın üzərindən heç bir il keçməyib. Koronavirus pandemiyası problemləri üzə çıxardıb. Kluba faydası dəyməyən oyunçulara görə ümumilikdə təxminən 1 milyard avro transfer haqqının ödənilməsi və idman tarixinin ən yüksək maaş yükünün (500 milyon avrodan çoxdur) “Barsa”da olması artıq sirr deyil.

Bir digər mənbə vəziyyəti belə təsvir edir: “Barsa” idarə heyəti yalnız transferlərə görə ödəniş limitlərini aşmaqla kifayətlənməyib. Oyunçuların maaşlarını da hesaba qatmaq lazımdır. Bu xərclər klubu hazırkı təhlükəli maliyyə vəziyyətinə gətirib çıxardıb. Problemi həll etmək məqsədilə Messini “Barsa”dan göndərməyə çalışırlar. Kumanın baş məşqçi postuna təyinatı, Leonu küsdürmək… – bunlar hamısı planlarını həyata keçirmək üçün atılmış addımlardır. Düzdür, bütün bunları ondan qurtulmaq üçün qəsdən etdiklərini isbatlaya bilmərəm, amma bir şey dəqiqdir ki, Messini getməsi idarə heyətini və prezidenti xilas edəcək. Dediyim variant onlar üçün ən münasibidir, çünki bu yolla borcları öz ciblərindən ödəməyəcəklər”.

Normal şərtlərdə Bartomeu “Barselona” prezidenti olacağını ağlına belə gətirməzdi. Neymarın transferi ilə bağlı başlayan məhkəmə prosesinin davamında Sandro Rozel hamını təəccübləndirdi və 2014-cü ilin yanvar ayında istefa qərarını açıqladı. O günə qədər çox az insan Bartomeunun bu pozisiyaya sahib çıxacağına ehtimal verərdi.

Bartomeu 1963-cü ilin fevral ayında Barselonada dünyaya gəlib. O, 11 yaşından şəhərin eyniadlı klubunun üzvüdür. Basketbolu daha çox sevir. Hətta “Barselona”nın aşağı yaş qruplarında bu idman növü ilə məşğul olub. Pivot funksiyasını yerinə yetirən Bartomeunun yolu sonradan əzəli rəqib “Espanyol”dan keçib. Ardınca isə şansını daha aşağı səviyyəli, “Molyet”, “Santa Koloma” və “Banka Katalana” kimi klublarda sınayıb. Həmin dövlərdə “Barselona”nın basketbol komandalarını yaxından izləyən jurnalistlərdən biri qeyd edir: “Bartomeu oyunu ilə diqqət çəkməyi bacarmadı”. Basketbolda alınmayacağını anlayan Bartomeu ailədaxili mühəndislik biznesinə maraq salır. Məhz bu yol sonda onun, sərnişin körüklərinin istehsalı başda olmaqla, hava limanları ilə bağlı müxtəlif xidmətlər təklif edən ADELTE şirkətinin baş icraçı direktoru olmasına gətirib çıxarır.

Bartomeu məhz basketbol vasitəsilə “Barselona”ya institusional səviyyədə qayıtmağı bacarır. Digər faktor isə katalon siyasi və iqtisadi elitasının əksər üzvlərini yetişdirən ESADE Biznes Məktəbində tanış olduğu, onun kimi, orada təhsil alan Sandro Rozellə illər ərzində formalaşdırdığı dostluq idi. Hər ikisi 2003-cü ildə keçirilən klubdaxili seçkilərdə Joan Laportanın kampaniyasının bir parçası idilər. Sonradan Bartomeu Laportanın dönəmində klubda basketbol və həndbol bölmələrinin direktoru postunu tuturdu. Lakin yeni formalaşan idarə heyəti “kövrək” idi və tez-tez önəmli fiqurlar arasında fikir ayrılıqları yaşanırdı. Ən çox baş verənlərə reaksiya bildirən isə Ferran Soriano (“Mançester Siti”nin hazırkı baş icraçı direktoru) idi.

Bartomeu Laportaya qarşı olan cəbhədən idi, yəni Rozelə yaxınlığı ilə seçilirdi. 2005-ci ilin mart ayında Bartomeu basketbol komandasına yeni baş məşqçi təyin edir, lakin seçimi uyğun hesab etməyən Laporta açıq şəkildə ona qarşı çıxır. Hadisələrin davamında Jozep vəzifəsindən uzaqlaşdırır. O dönəmdə klubu yaxından izləyən müşahidəçilərdən biri vurğulayır: “Laporta mətbuat konfransında Bartomeunun verdiyi qərarı ləğv etdiyini açıqlayarkən onu alçaltmışdı. Laporta Bartomeunu ciddiyə almırdı. O, sadəcə, Rozelin izindən gedən davamçı idi”.

Bartomeu bir neçə ay sonra Laporta ilə aralarındakı problemlər səbəbindən Rozel və digər üç üzvlə birlikdə idarə heyətindən istefa verir. Sandro 2010-cu ildə prezident seçkilərinin qalibi olduqdan sonra Bartomeu geri qayıdır və vitse-prezident olur. Yeni rejim dərhal “düşmənlər”inə qarşı hərəkətə başlayır. Bu mənada, klub əfsanəsi, “Barsa”nın oyun fəlsəfəsinin memarı hesab olunan Yohan Kroyfun fəxri prezident vəzifəsindən uzaqlaşdırılması və prezidentliyi dövrü heç də birmənalı qarşılanmayan, sevilməyən isimlərdən Nunyesin yenidən klub tədbirlərinə dəvət olunması kimi mübahisəli addımları qeyd edə bilərik. Hətta yeni idarə heyəti klubun maliyyə itkilərini əsas gətirərək sələflərini məhkəməyə də vermişdi. Sonda hakim iddiaları əsassız hesab etmiş və 2017-ci ildə iş qapanmışdı.

“Barsa”nın daxili siyasətinə maraq göstərən üzvlərdən biri cəbhələr arasındakı fərqlərə diqqət çəkir: “Barselona”nın 100 mindən çox üzvü var. Daxildə müxtəlif fikirlərin, fərqli ideyaların olması heç də pis deyil. Müəyyən maraqların qorunması üçün klubdan istifadə problemdir. Nunyesin yolu ilə gedənlər mühafizəkar idilər, təşkilati prinsipləri daha çox önəmsəyirdilər, Laportaçılar isə daha inqilabçı, qəlibləri sındıran, yenilikçi və risksevər idilər. Sandro Rozel prezident seçildikdən sonra Laportizm, Kroyfizm, Quardiolizm qoxan hər şey məhv edilməli idi. Onlar bunun üçün 10 il çalışdılar. Yekunda vəziyyət nəzarətdən çıxdı və az qala, bütün klubu dağıdacaqdılar”.

Rozelin prezidentlikdən imtina etdiyi tarixə qədər Bartomeu klub daxilində elə də yüksək profilə sahib deyildi. Həmin gün keçirilən idarə heyətinin fövqəladə iclasında Jozepin müvəqqəti olaraq klubun başına keçməsi və yaxın zamanda prezident seçkilərinin keçirilməsi qərara alındı.

Mənbə əlavə edir: “Bartomeu Rozelin yaxın dostudur. Onun gedişindən sonra, əslində, məyus idi. O vəziyyətdə postu qəbul etməli oldu. Bəlkə də, istəmirdi, amma eyni zamanda, bu addımı ilə eqoya malik olduğunu da nümayiş etdirmişdi. Başqalarının işdən imtina edib-etmədiklərini bilmirəm. Bartomeu Rozellə dostluğu, bənzər ideyalara sahib olması və ambisiyası sayəsində posta sahib çıxdı”.

Bartomeu prezident kimi ilk iş günündə icraçı direktor Raul Sanllehi ilə birlikdə mətbuat önünə çıxdı. Əsas mövzu “Santos”dan Neymarın transferi idi. Onlar anlaşmanın qanunlar çərçivəsində olduğunu bildirirdilər. Sanllehi maliyyə məsələləri ilə bağlı sualları cavablandırır, “Barsa”nın Neymar və ailəsinə verdiyi bütün ödənişləri açıqlamadığına dair mətbuatda çıxan xəbərləri etibarsızlaşdırmağa və gözdən salmağa çalışırdı. Kataloniya prezidenti Artur Masla eyni məktəbdə təhsil almış Bartomeu isə daha çox emosional suallara cavab verir, azarkeşləri rahatlaşdırmaq üçün düzgün “düymə”lərə basmağa çalışırdı: “Biz yalan danışmırıq. Futbol oyunları qapalı qapılar arxasında yox, yaşıl meydanlarda qazanılır. Biz Alfredo Di Stefanonu bağlı qapılar arxasında itirmişik, amma Neymar məsələsi fərqlidir”.

Bartomeu sual-cavab əsnasında məhkəmə prosesinə Madriddən rəhbərlik edən “qara əl”dən danışmağı da unutmamışdı. Təxmin etdiyiniz kimi, bunu deyərkən, “Barsa” azarkeşlərinin sevimli “qara personaj”ı – “Real”ın prezidenti Florentino Peresi nəzərdə tuturdu.

Sonrakı aylarda da Bartomeu rahat və təkəbbürlü şəkildə Neymar transferində baş verənlərə görə “Barselona”nın idarə heyəti, Rozel və özünün məsuliyyət daşımadığını vurğulamağa davam edirdi. Məhkəməyə ifadə vermək üçün çağrılmasına, haqqında 27 aylıq həbs və 3,8 milyon avro dəyərində cərimə tələbi olmasına baxmayaraq, təkrarlamağa davam edirdi: “Barsa” səhv bir iş görməyib. Sadəcə, Neymarın “Barsa”ya, katalon klubuna keçidini bəyənməyən bəzi qüvvələr var”. Yekunda prokurorlarla razılıq əldə edilir, klub baş verənlərə görə hüquqi məsuliyyətini qəbul etsə də, əlaqəli şəxslər cəzasız qalır.

Bartomeu, onu və dostlarını pis situasiyalara salan Neymar işindən xilas ola bilmişdi. Amma Neymar yaşıl meydanlarda pis situasiyalara düşən “Barsa”nın xilaskarı ola bilməmişdi. “Katalonlar” 2013-14 mövsümündə böyük turnirlərdə titulsuz qalmış (təkcə İspaniya Superkubokunu qazanırlar) və baş məşqçi Tata Martino ilə yollar ayrılmışdı. Luis Enrike gələn kimi işlərin yağ kimi getməyə başladığını da deyə bilmərik. FIFA azyaşlı legioner futbolçuların transferləri zamanı baş verən qayda pozuntularına görə “Barselona”ya ikiillik qadağa tətbiq etmişdi. 2015-ci ilin yanvar ayında Moyesin “Real Sosyedad”ı ilə oyunda qeydə alınan 0:1 hesablı məğlubiyyətdən sonra Luis Enrike və Messi arasındakı problemlər ictimaiyyət önündə bariz şəkildə özünü büruzə vermişdi. Komandada vəziyyət heç də ürəkaçan deyildi.

Situasiyaya əl atmağa çalışan Bartomeu idman direktoru Andoni Subisarretanı işindən uzaqlaşdırdı və prezident seçkilərinin tarixini dəyişərək yaya təyin etdi. Komandanın bu qərara reaksiyası maraqlı idi. Anidən sürət yığdılar və mövsümü major notlarla tamamladılar. Messi-Suares-Neymar “trident”ini sonrakı periodda dayandırmaq mümkünsüz idi. Nəticədə “Barsa” “trebl” edərək La Liqa, İspaniya Kuboku və Çempionlar Liqasını muzeyinə apardı. Rəsmi seçki kampaniyasının sloqanı başqa olsa da, Bartomeu hər iki kəlmədən bir “Trident”imiz var, “trebl”imiz var” deyərək klub üzvlərindən səs gözləyirdi. Nəticədə 54.63% səslə əsas rəqibi Laportanı (33.03%) asanlıqla geridə qoydu və yenidən prezident seçildi. Aqusti Benedito 7.16%, Toni Freşa isə 3.70% səs toplamışdılar.

Prosesləri yaxından izləyən mənbə qeyd edir: “Həqiqətən də, güclü alternativ yox idi. Laporta seçkilərə yaxşı hazırlaşmamışdı. Özünüz təsəvvür edin, onun kozırı Erik Abidal idi. Yekunda Bartomeu rahatlıqla qələbə qazandı və bu proses onu qanadlandırdı, güclü fiqura çevirdi”.

“Barselona” həmişə fanatların ön planda olduğu modelinə görə qürur duyub. Bu struktur sayəsində 110 min üzv klubun sahibinə və əsas qərarvericisinə çevrilirlər. Onların hamısı prezident seçkilərində səs vermək hüququna sahibdilər. Yəni nəzəriyyədə onlar klubun siyasətini və götürdüyü istiqaməti müəyyənləşdirə bilərlər. Bu, qürurlu katalonların ərəb investorların, rus oliqarxların və amerikan kapitalistlərin əlinə keçən Avropa nəhənglərinə qarşı mübarizə aparmasına yardımçı olur. Onlar hətta əzəli rəqibləri “Real”la müqayisədə də özlərini daha şanslı sayırlar. Florentino Peres Madrid klubunda demokratik təməlləri yıxmağa çalışır. 2017-ci ildə keçirilən son prezident seçkilərində heç kim ona meydan oxumamışdı.

“Barsa”nın üzvləri hər 6 ildən bir prezidentlərini seçirlər, amma bu, seçkilərdən sonrakı periodda onların söz sahibi olduğu anlamına gəlmir. Klubun 80 və 90-cı illərə, Nunyes dönəmlərinə söykənən, zirvədəki şəxsin ətrafında qurulmuş, mərkəzləşmiş iqtidar ənənələri var. Hətta son illərdə belə, qalib namizədin komandasının üzvü olan və direktor təyin edilmiş şəxslərin önəmli qərarlar zamanı söz sahibi olmadıqlarına şahidlik etmişik. Fikri soruşulan bir digər şəxsə görə, bu mərkəzləşmiş qərarvermə mexanizmi “Barselona”nın əleyhinədir:

“Yekunda prezidentin qərar qəbul etməsi və Avropanın digər böyük klublarından fərqli olaraq, “Barselona”da professional strukturun olmaması problemdir. Bu, PSJ və “Mançester Siti”yə qarşı mübarizə aparan “Barselona” və “Real” kimi azarkeş modelli klubların unikal təbiətidir. Amma eyni zamanda, klubu bu şəkildə idarə etmək çox çətindir”.

Zamanla, xüsusilə də 2015-ci ildə yenidən prezident seçildikdən sonra Bartomeu “Barsa”nın bütün güclü postlarını ələ keçirdi. Məsələn, 2016-cı ilin noyabrında Suzana Monhe klubun iqtisadi məsələlər üzrə vitse-prezidenti postundan getdikdən sonra Jozep onun vəzifəsini öz adına əlavə etdi. 2019-cu ildə idman məsələləri üzrə vitse-prezident Jordi Mestre idarə heyətini tərk etdi. Bartomeu onun öhdəliklərini də götürdü.

İdarə heyətinin işinə yaxından bələd olan mənbə deyir: “Prezident klub daxilində çox güclüdür. Bütün direktorların kollektiv məsuliyyəti olduğundan, kollektiv idarəçilik prinsipləri işləməlidi. Amma “Barsa”da prezident çox böyük səlahiyyətlərə sahibdir. O, demək olar ki, transferlərə təkbaşına qərar verən şəxsdir. Hansı oyunçuları alacağı ilə bağlı idarə heyəti ilə məsləhətləşmir”.

Laportanın 6 illik dönəmində klubun bir idman direktoru olub: Çiki Beqiristayn. Rozel Subisarretanı gətirmişdi. O, Bartomeu tərəfindən qovuldu. Daha sonra Robert Fernandes, Pep Sequra, Abidal və indi isə Ramon Planes işin başındadır.

Son illərdə “Barsa”nın önəmli transferləri ilə bağlı birbaşa məlumata sahib şəxs qeyd edir: “Beş il ərzində beş fərqli insanın idarə etdiyi transfer siyasəti nə olacaq? Özü də söhbət “Barsa” səviyyəsində bir klubdan gedir. Onsuz da, Robert var idi. Ardınca Pep Sequranı gətirdi, onların öz aralarında mübahisə etməsinə imkan yaratdı və yekunda birini qovdu. Bir müddət keçdi, digərini də göndərdi. Ona tam olaraq güvənmirdilər, çünki bir şeyi deyir, əvəzində başqa şeyi edirdi”.

Son illərdə “Barsa”da maliyyə hesabatını balanslaşdırmaq üçün oyunçuların gediş-gəlişindən istifadə etmək adi hala çevrilb. “Fırlanan qapı” prinsipi “maliyyə feyr-pleyi” baxımından üstünlükdür. Komandanı tərk edən oyunçulara görə ödənişlər əvvəlcədən qəbul olunur, transfer edilən futbolçular üçün ödənilməli olan məbləğ isə müqavilə müddətini əhatə edir. Yəni Koutinyo (160 milyon), Dembele (138 milyon) kimi böyük transferlərə görə klub hələ də ödəniş edir, Neymarın keçidindən əldə olunan 222 milyon avro isə artıq xərclənib. Bu sayədə Bartomeu ictimaiyyət qarşısında böyük qərarlar qəbul edən adam kimi görünməkdən zövq alır. Qrizmann 2018-ci ildə “Barselona”nın təklifini rədd edərək ictimaiyyət önündə onu və klubu pis vəziyyətdə qoymuşdu. Buna baxmayaraq, prezident israr etdi və sonda 120 milyon avro qarşılığında transferi reallaşdırdı. 2019-cu ilin yanvar ayında Amsterdama yollanaraq Frenkini “Siti”nin əlindən alan və 75 milyon avro qarşılığında “Barsa”ya keçidini həll edən də Bartomeudan başqası deyildi. Onda Quardiola da gənc yarımmüdafiəçi ilə danışmışdı.

Bir digər mənbə Jozepin klubdaxili bütün proseslərə müdaxilə etdiyini bildirir: “Bartomeu təyyarəyə mindi və Frenki ilə danışmaq üçün Niderlanda getdi. Qrizmannın transferindəki vasitəçi belə, onun hüquqi firması idi. Deməli, Bartomeu hər şeyin içindədir”.

Klub üzvləri baş verənlərin pərdəarxası məqamlarından məlumatsızdırlar. Növbəti prezident seçkilərində iştirak edəcəyi gözlənilən namizədlərdən birinin kampaniyasına qoşulan şəxslərdən birini bu çox narahat edir: “Bu idarə heyətinin ən böyük problemlərindən biri şəffaflığın olmamasıdır. Üzvlər klubun sahibləri olmasına baxmayaraq, heç kim onlara real situasiyanı izah etmir. Biz real maliyyə vəziyyətindən, borcların tam səviyyəsindən məlumatsızıq. Hər şey deduksiyadan, dəqiqliklə heç nəyi bilmədən olanları anlamağa çalışmaqdan ibarətdir”.

Digərləri isə pərdəarxasından mümkün müdaxilələrdə maraqlıdırlar. “Nike” şirkətinin keçmiş əməkdaşı Sandro Rozel Braziliyadakı işləri ilə əlaqədar çirkli pulların yuyulmasında ittiham olunurdu. Nəticədə 20 ay həbs həyatı yaşadı. O, 2019-cu ilin aprelində bəraət aldı. Əvvəlki dönəmdən fərqli olaraq, “kulis”də nisbətən aşağı dərəcəli profilə sahib olsa da, 2020-ci ilin iyun ayında verdiyi açıqlamada “Barsa”dakı təsir gücünü qoruyub saxlamaq istədiyini bildirmişdi.

Klubun daxili işlərinə yaxından bələd olan mənbə əlavə edir: “Unutmayın, bu idarə heyəti Rozelin idarə heyəti idi. Bartomeu və hazırkı idarə heyətinin 80%-i onun yaxın dostlarıdır. Əksəriyyətə görə, Rozel hansısa şəkildə klubun transfer biznesinə müdaxilələr edir”.

Bartomeu müntəzəm olaraq katalon mediasına müsahibələr verir. Onu TV3-ün efirində görə, RAC1 vasitəsilə dinləyə bilərsiniz. Yerli idman nəşrləri – “Mundo Deportivo” və “Sport”u da unutmur. Amma bu, fanatların və ya klub üzvlərinin “Barsa”da baş verənlər barədə yaxşı məlumatlandırıldığı anlamına gəlməməlidir.

2000-ci illərin əvvəllərində “Barselona”nın basketbol komandasını işıqlandırarkən Bartomeu ilə ilk dəfə tanış olan jurnalistlərdən biri qeyd edir: “Bartomeu öz çevrəsində mediaya qarşı dostyana münasibət bəsləyən biri kimi tanınır. Klub prezidenti kimi, hamısına olmasa da, bəzi media qurumlarına çox yaxındır. Həmişə yaxşı üzünü göstərir. Bartomeu insanların onu sevməyini istəyir. Heç kimə “yox” demir, amma eyni zamanda, onun dediklərinə heç vaxt tam olaraq etibar etmək də olmur. İnsanların, az qala, hər dediklərini dəstəkləyir və buna görə də eyni məntiqi xətt üzrə hərəkət etdiyini demək mümkün deyil. Özünə uyğun olanda müsahibə verir. Lazım bilməyəndə isə bir kənara çəkilir və uzun müddət səssiz qalır. O, yaxşı natiq deyil, ünsiyyət qurmağı bacarmır. Ümumiyyətlə, mediaya danışarkən etibarsız imic formalaşdırır”.

Qərarvermə prosesində və kommunikasiyada səmimiyyətin olmaması son illərdə klub daxilində yüksək postları tutan şəxsləri belə bəzən çaşbaş salır. Mənbə əlavə edir: “Bartomeu diqqət mərkəzində olmağı sevməsə də, axmaq deyil. Mehriban, rahat və mədəni biridir. Amma bir şey dəqiqdir: o, səmimi insan deyil və bir çox şeyi gizlədir. Nə düşündüyünü, nə edəcəyini bilmək çox çətindir. Bartomeu “qapalı qutu”dur”.

Bartomeu getdikcə “Barselona”nın transfer xərcləri ilə bağlı məsələlərə daha çox müdaxilə edirdi. Bununla yanaşı, o, heyətdəki ulduzlarla müqavilə yeniləmək üçün aparılan danışıqlara şəxsən birbaşa qarışmağa başlamışdı. Bəziləri bunu klub rəhbərinin güclü liderlik qabiliyyətinin təzahürü kimi görürdü. Digərlərinə görə isə oyunçular bu yolla klub daxilindəki digər önəmli fiqurları və strukturları heçə sayaraq, daha çox pul, daha yaxşı maddi şərtlər üçün birbaşa prezident təzyiq edə bilirdilər.

Serxio Buskets 2016-cı ilin böyük hissəsini, Bartomeu vədinə əməl etməyəcəyi və onun maaşını əhəmiyyətli dərəcədə qaldırmayacağı təqdirdə, keçmiş məşqçisi Pep Quardiolanın çalışdırdığı “Mançester Siti”yə keçəcəyinə eyham vuraraq keçirmişdi. Yarımmüdafiəçi 2016-cı ilin fevral ayında verdiyi açıqlamada demişdi: “Ümid edirəm ki, prezident sözünə əməl edəcək”. Danışıqlar 7 ay davam etdi və sonda Buskets ilinə 14 milyon avro qazanmasına imkan yaradacaq müqaviləyə imza atdı. Bunun nəticəsi olaraq, digər oyunçular da artım tələb etməyə başladılar.

Karyerasının son dönəmlərinə qədəm qoyan Andres İnyesta ilə danışıqlar 2017-ci ilə qədər uzandı. Hətta bu məsələ nəzakətli biri kimi tanınan yarımmüdafiəçinin, Bartomeunun “ömürlük müqavilə”nin şərtlərini razılaşdırdıqlarına dair bəyanatını qəti surətdə təkzib etməsinə gətirib çıxardı. Oktyabr ayında kapitan yeni müqaviləyə imza atsa da, fikir ayrılıqlarının təsirini paltardəyişmə otağında hiss etmək mümkün idi. Sonda İnyesta 2018-ci ilin iyun ayında “Barselona”dan ayrılaraq Yaponiyanın “Vissel Kobe” klubunun yolunu tutdu.

“Barsa” oyunçuları öz aralarında Bartomeunu uşaqlar üçün nəzərdə tutulmuş yapon manqa seriyası “Doraemon”un personajının şərəfinə “Nobita” (eynək taxan 10 yaşlı uşaqdı) deyə çağırırlar. Bu məsələ ictimaiyyətə məlum olduqdan sonra futbolçuların prezidentə qarşı bəslədikləri hörmətin səviyyəsi də az-çox bəlli idi. Bartomeu bunu zarafat kimi qəbul etmiş və klub televiziyasına açıqlamasında qeyd etmişdi: “Zənnimcə, fiziki baxımdan ona bənzəyirəm”.

Situasiya haqqında kifayət qədər məlumatlı mənbə açıqlamasında qeyd edir: “Bu, doğrudu, paltardəyişmə otağındakılar Bartomeuya elə də hörmətlə yanaşmırlar. Prezident bunu haqq edir. Oyunçuların onu Nobita adlandırmaqları məyusluq doğurur, amma oyunçular ona etibar edə bilmirlər deyə, Bartomeu hörmətini itirib. Adətən, vədlərini yerinə yetirmir. Danışır, lakin reallıqda verdiyi sözlərə əməl etmir”.

Düşünmədən oyunçulara sərfəli müqavilələr vermək sonda “Barsa”nın əsas fiqurlarını komandadan uzaqlaşdırmaqda çətinlik yaşaması və yaşlanmış heyəti yeniləmək cəhdlərinin boşa çıxması ilə nəticələndi. Dani Alves 2016-cı ildə “Yuventus”a keçdikdən sonra Bartomeu müsahibələrindən birində qeyd etmişdi: “Braziliyalı şəxsi səbəblərdən “Barsa”nı tərk etdi. Bu barədə yalnız o, onun həyat yoldaşı və mən məlumatlıyıq”. Alves cavabında sosial media vasitəsilə prezidenti “yalançı” adlandırmışdı. Ötən yay klub uğursuz şəkildə İvan Rakitiçlə yollarını ayırmağa cəhd etmişdi. Məlum olmuşdu ki, daha öncə xorvatiyalıya yeni müqavilə təklif ediləcəyinə dair söz verilmiş və bu vədə əməl edilməmişdi. Fevral ayında “Nou Kamp”da “Eybar”la oynanılan matçdan öncə Bartomeu azarkeşlər tərəfindən fitə basılmışdı. Jurnalistlər bu barədə Rakitiçin fikrini öyrənməyə çalışanda cavab belə olmuşdu: “Hər kəsin fikirlərini dilə gətirmək haqqı var”.

“Barselona”nın keçmiş və hazırkı heyət üzvlərinə yaxınlığı ilə tanınan başqa bir mənbə qeyd edir: “Qəribədir, əslində, Bartomeu bu oyunçulara hər şeyi verib. Prezident onlara həmişə yaxşı ödəniş edib, Pike, Buskets, Jordi Alba kimi oyunçulara böyük müqavilələr verib. Xavi və İnyestanın ayrılma bonusları olduqca yüksək idi. Bununla belə, oyunçular ona dözə bilmirlər. Futbolçular öz paylarına düşən qınağı haqq edirlər: onlar özlərini xüsusi insanlar hesab edirlər, çox eqoistdirlər… Amma Bartomeu situasiyanı nə qədər pis idarə edib? O, onlara istədikləri hər şeyi verib. Bura güc də aiddir, pul da. Və indi Messinin bunların qarşılığını necə verdiyini görürük. Xavi də istisna deyil (yanvarda Bartomeu baş məşqçi postunu ona həvalə etmək istəsə də, “yox” cavabı vermişdi)”.

İdman dünyasının ən böyük maaşlarını ödəmək “Barsa”nın maliyyəsi üçün təzyiq idi. Bartomeu klubun gəlirlərinin artmağa davam etdiyi müddətcə narahatlığa ehtiyac olmadığını deyirdi. Amma koronavirus bütün peşəkar idman klublarının maliyyəsində “deşik” açdı. Pandemiyanın xoşagəlməz təsirləri “Barselona”nın idarə heyəti və paltardəyişmə otağı arasındakı münasibətlərə daha bir zərbə vurdu. Aralarında Messi və Pikenin də olduğu önəmli oyunçular Bartomeunun müvəqqəti maaş kəsintiləri ilə bağlı istəklərinin komanda daxilində elə də yaxşı qarşılanmadığı barədə ictimaiyyəti məlumatlandırmaq üçün “Instagram” hesablarından istifadə etdilər. Eyni zamanda, oyunçular klub əməkdaşlarının maaşlarının ödənməsi ilə bağlı təşəbbüs sahibinin idarə heyəti yox, onlar olduqlarını bu yolla ictimaiyyətə çatdırdılar.

Son on il ərzində Messinin müqaviləsinin yenilənməsi prosesi həmişə stressli keçib. Oyunçunun meneceri/atası Xorxe Messi və idarə heyəti arasındakı gərginlik aşkardır. Bartomeu həmişə ictimaiyyət önündə qeyd edib ki, Messi karyerasını “Kamp Nou”da bitirəcək və hər zaman sonda Leo yeni müqaviləyə imza atıb. Son müqavilədə – 2017-ci ilə aiddir, vergiləri çıxmaqla illik 50 milyon avro dəyərindədir – hətta oyunçunun mövsüm sonlarında birtərəfli qaydada sazişi pozaraq klubdan ayrılmasına imkan verən gizli bənd də daxil edilmişdi. Artıq bu bənd heç kimə sirr deyil.

Müəyyən mənada “Barselona”nın 2019-20 mövsümü ilə 2014-15 mövsümü arasında paralellər aparmaq olar. Beş il əvvəl Bartomeu qışda qəti addım ataraq idman direktoru Subisarretanı postundan uzaqlaşdırmış və prezident seçkilərini yay aylarına təyin etmişdi. Bunun ardınca komanda qaza basmış və gurultu ilə “trebl”ə doğru yol almışdı. Komandanın oyunundakı yüksəlişi və “xoşbəxt sonluğ”u prezidentin yanvar ayındakı “katarsis” həmləsi ilə əlaqələndirmək elə də çətin olmamalıdır.

Bu ilin yanvar ayında, İspaniya Superkubokunda “Atletiko” ilə görüşdə qeydə alınan məğlubiyyətdən sonra Bartomeu daha bir böyük qərar qəbul etdi: baş məşqçi Valverde istefaya göndərildi. Ancaq bu, büdrəyən komandanın problemlərinə çarə olmadı. Əvəzində, Valverdenin gedişindən sonra kapitan Messi və idman direktoru Abidal arasında məşqçinin istefasına görə kimin məsuliyyət daşıdığı ilə bağlı mübahisələr başladı. Və yeni məşqçi Kike Setyen komandanın oyununda irəliləyişə nail ola bilmədi. İspaniya Kubokunda “Atletik” “Barselona”nı mübarizədən kənarlaşdırdı, “blauqrana” La Liqanı əzəli rəqibi “Real”ın gerisində, ikinci pillədə tamamladı və Çempionlar Liqasında “Bavariya” qarşısında alçaldıcı “zərbə” aldı.

2015-ci illə müqayisədə bir digər böyük fərq ondan ibarətdir ki, klub daxilindəki bəzi direktorların təzyiqinə və gərəkli olduğunu düşünmələrinə baxmayaraq, Bartomeu 2021-ci ilin yayına planlaşdırılan prezident seçkilərinin vaxtını dəyişdirmədi. Klubun koronavirus pandemiyası səbəbindən bütün gəlirlərin kəsilməsinə verdiyi reaksiya idarə heyətinin üzvləri arasında gərginliyə səbəb olmuşdu. Onlar verilən qərarlar barədə məlumatlandırılmadıqlarını düşünürdülər.

Hadisələrin davamında aprel ayında aralarında Bartomeunun 2015-ci ildə kluba gətirdiyi və növbəti prezident seçkilərində namizəd olmaq, onların xəttini davam etdirmək üçün yetişdirilmiş Emili Rusonun da olduğu 6 idarə heyəti üzvünün istefası ilə “bomba partladı”. Klubdan ayrılan direktorların əksəriyyəti maliyyə məsələlərinə görə cavabdeh şəxslər idi.

“Təlatüm”ü tətikləyən şey “Barsaqeyt” qalmaqalı idi. Söhbət idarə heyətinin klubun sosial media istifadəsini yaxşılaşdırmaq məqsədilə kənardan bir şirkətlə əməkdaşlığa başlamasından gedir. Mətbuata sızan məlumatlara görə, “I3 Ventures” adlanan şirkət hazırkı klub iyerarxiyasının düşmənləri hesab olunan Quardiola, Karles Puyol, Xavi, o cümlədən oyunçular – Pike, Messi, prezidentliyə namizəd olacağı gözlənilən şəxslər – Benedito və Viktor Fontun reputasiyasına zərbə vurmaq üçün troll sosial media hesablarından istifadə edirmiş.

Bu, klub adına kifayət qədər pis hal idi. Amma idarə heyətinin üzvlərinin “Barselona”dan ayrılmasının əsas səbəbi “I3 Ventures” ilə olan müqavilənin qəsdən klub daxilindəki bəzi komitələr tərəfindən nəzarətdən gizlədilməsi idi. “Barsa” tərəfi daxildən maliyyələşdirilən, “PwC” tərəfindən aparılan araşdırma nəticəsində qanuna zidd bir şey aşkarlanmadığını iddia etsə də, Kataloniya polisinin may ayının əvvəllərində “Nou Kamp”a yollandığı və klub vəsaitlərindən sui-istifadə ilə əlaqədar potensisal cinayət istintaqında sübut kimi istifadə edilməsi məqsədilə bəzi sənədləri ofisdən götürdüyü bildirilir. Klubun uyğunluq məmuru (xarici tənzimləmələr, qanuni öhdəliklər, həmçinin daxili siyasət və qaydalara riayət edilməsini təmin edən şəxs) Noelya Romeronun işindən ayrılması da müəmma olaraq qalır. “Barsaqeyt” qalmaqalının məhkəməyə kimi gedə biləcəyini söyləyən mənbə əlavə edir: “Prezident Romeroya təzyiq edirdi”.

Bu hadisə qərarların Bartomeu və idarə heyətində onun etibar etdiyi bir neçə şəxs tərəfindən qəbul edildiyi və məlumatların qalan hər kəsdən gizlədildiyi bir klubdakı, bir təşkilatdakı bölünmələri növbəti dəfə üzə çıxardı. Onlar artıq Madriddəki Florentino Peres və ya kənardakı Laporta ilə yox, öz iş yoldaşları ilə mübarizə aparırlar. Mənbələrdən biri vəziyyəti belə təsvir edir: “Barsaqeyt” xırda məsələ deyil. Müqavilələri imzalamalı olan insanları aldadıblar. Düşməni və ya başqa klubu yox, öz həmkarlarını aldadıblar. Bu, xaosdu və bu qədər faciəvi hadisə olmasaydı, çəkinmədən “komik” də adlandırardım”.

Bartomeu ən yaxın müttəfiqlərindən və köhnə dostlarından bir neçəsinin vəzifəsini qaldırdı. Bu, onun idarə heyətinin 6 üzvünün gedişinə verdiyi reaksiya idi. İnstitusional vitse-prezident postunda Rusonu Pau Vilanova Vila-Abadal əvəzlədi. O, 2015-ci ildəki seçki kampaniyası çərçivəsində “El Pais”ə verdiyi açıqlamada, on il əvvəl özü və ailəsi faciəvi hadisə ilə qarşılaşanda Bartomeunun verdiyi dəstəyi xatırladaraq qeyd etmişdi: “Həmişə yanımızda olmasını istədiyimiz dostlar olur. Bartomeu elə biridir”.

İdarə heyətinin digər liderləri sırasında əmlak mütəxəssisi, iqtisadi məsələlər üzrə son vitse-prezident, 800 milyon avro dəyərində olan, stadionun yenidən qurulmasına dair “Espai Barca” layihəsinə nəzarət edən Jordi Moç da var. Xavyer Bordas – İspaniyanın məşhur gecə klublarından bəzilərinin rəhbəridir – əsas komandanın futbol məsələlərinə cavabdeh şəxsdir.

“Barsaqeyt” qalmaqalı həm də idarə heyəti və klub tarixinin böyük isimləri arasındakı münasibətlərin necə sarsıldığını göstərdi. Bartomeu yenidən qurulması nəzərdə tutulan “Nou Kamp” stadionuna Yohan Kroyfun adının verilməsinə dair ideyanı açıq şəkildə rədd etmişdi. Klub xərcləri qarşılamaq üçün stadionun ad hüquqlarını satmağı planlaşdırır. Uzun müddət idi ki, Yohanın oğlu Jordi Kroyfun “Barsa”ya qayıdacağı və ailə ənənələrini davam etdirəcəyi gözlənilirdi. Amma o, karyerasını Kataloniyadan çox uzaqda davam etdirmək qərarına gəldi. Ekvador millisindən ayrılan Jordi hazırda Çin klubu “Şençen”in baş məşqçisidir.

Laporta-Quardiola dönəmi ilə əlaqəsi olan heç kimin idarə heyətini bu böhrandan çıxarmaq üçün geri dönmək və yardım etmək niyyəti yoxdur. Qətərdə fəaliyyətini davam etdirən Xavi bir gün məşqçi kimi “Barselona”ya qayıtmağı planlaşdırdığını gizlətməsə də, yanvarda Valverdeni əvəzləmək imkanını geri çevirmiş, aşkar şəkildə təklifi rədd etmişdi. Bartomeunun prezidentliyi dövründə klubda çalışmağa razılıq verən Puyol, yaxın dostu Subisarretanın qovulmasından sonra istefa vermişdi. Messi klubdan ayrılacağını açıqlayanda ona ilk dəstək verən şəxslərdən biri də Karles idi. Erik Abidal və Patrik Klayvert bu idarə heyətinin təkliflərini qəbul etmişdilər. Amma onların heç biri “La Masiya”dan çıxan və klubun tarixinə adlarını yazdıran adamlar deyildilər. “Barsa”nın yaxın tarixinin ən hörmətli fiqurlarından birinin fikirlərini öyrənmək istəyəndə cavabı belə oldu: “Müraciətiniz üçün təşəkkür edirəm. Amma məncə, indi sadəcə olub-bitənləri müşahidə etmək zamanıdır”.

İdarə heyətinin klubun ən populyar fiqurlarını niyə qəsdən yadlaşdırdığı maraqlıdır. Mənbələrdən biri suala belə cavab verdi: “Onların stratejik planının olduğunu düşünmürəm. Birincisi, əvvəldən şəxsi düşmənçilik var idi. Sırf bu səbəbdən onlar bir neçə səhv qərar qəbul ediblər. Ardınca ideoloji baxımdan “Barsa”nın yalnız bir fikirdən – Kroyf, Quardiola ideyaları – ibarət olmadığını göstərməyə çalışdılar. Bununla da kifayətlənmədilər. Məsələn, klub daxilində Karles Reşaka Kroyfdan daha çox səlahiyyət verdilər və mübahisələrin təməlini atdılar. Amma bunlar müəyyən fikirlər toplusu deyildilər. Sadəcə, proseslərin gedişində qərarlar qəbul etdilər və nəticəsi onlar üçün belə oldu”.

Ronald Kuman Bartomeunun 6 il yarımlıq fəaliyyəti dövründə onunla çalışacaq beşinci məşqçidir. Onun bu posta təyin olunmasının əsas səbəbi məşqçilik CV-sindən çox, 1992-ci ildə Avropa Kubokunun finalında vurduğu qələbə qoludur. Paltardəyişmə otağının yaşlanan ulduzlarını komandadan “təmizləmək”lə 2:8-lik “Bavariya” məğlubiyyətinə reaksiya vermək niyyətində olan Bartomeunun bu fikrini həyata keçirmək üçün xarakterə və statusa sahib birinə ehtiyac var idi. Kuman kriteriyalara uyğun gəlirdi. Telefonla vasitəsilə Suaresə, klub tarixinin üçüncü ən məhsuldar futbolçusuna artıq xidmətində maraqlı olmadığını deməsini və indiyə kimi baş verənləri nəzərə alsaq, onun ideyaya sadiq olduğunu deyə bilərik. Bartomeunun strategiyası barədə “birinci əl”dən məlumat sahibi olan bir mənbə bunun Messinn sıxışdırılması və klubun maliyyə vəziyyətinn düzəldilməsi zərurəti ilə əlaqəli olduğu qənaətindədir.

Mənbə əlavə edir: “Kuman çox ağıllı adamdır, amma o, yaxşı bilir ki, klubu idarə edən və onunla müqavilə imalayan şəxs məhz prezidentdir. Messi və Suaresin yaxın dostluğu heç kimə sirr deyil. Və telefonda ona klubdan ayrılmasını demək gedişata təsir etdi”.

“Barselona” daxilindəkiləri, o cümlədən kənardakıları bir şey maraqlandırırdı: “dəhşətli şou”ya qəfil son verən tarixi biabırçılığa (2:8) veriləcək doğru reaksiya – və ya yeganə reaksiya – klub prezidentinin istefasıdır, ya yox? “Klubun dəyişikliklərə ehtiyacı var və mən bunu deyərkən məşqçi və ya oyunçuları nəzərdə tutmuram” – final fitindən sonra bu sözləri dilə gətirən Pike, şübhəsiz ki, bunu nəzərdə tuturdu.

Həmin gecə Lissabonda İspaniya telekanallarından birinin efirində Bartomeuya yeni prezidentin müəyyənləşdirilməsi üçün təcili seçki təyin edib-etməyəcəyinə dair sual ünvanlandı. O, cavabında azarkeşlərin məyusluğunu başa düşdüyünü, amma belə qərarların emosional anlarda verilmədiyini bildirdi. Bir neçə gün sonra isə prezident belə bir fikir işlətdi: “Barsa” institusional səviyyədə yox, futbolla bağlı böhran keçirir”. Və heyətdəki problemləri həll etmək üçün səlahiyyət müddətini tamamlayacağını bildirdi. Seçkilər ən erkən 2021-ci ilin mart ayında keçiriləcək. Bu, hazırkı idarə heyətinin növbəti yaya kimi klubda qalacağı anlamına gəlir.

Bartomeunun niyə bu qədər dərinə getdiyi bir çox insana maraqlı ola bilər. “Barselona”nın prezidenti olmaq onun şəxsi və ailə həyatına ciddi zərbə vurdu, klub azarkeşləri və neytral şəxslər arasındakı reputasiyasını əbədi şəkildə məhv etdi. Messinin ayrılmaq istəyini elan etməsi növbəti “tənqid dalğası”nı başlatdı. Gecə saatlarında “Nou Kamp” stadionunun önünə toplaşan azarkeşlər “Bartomeu, indi istefa ver” şüarını səsləndirirdilər.

Keçmiş və gələcək prezidenliyə namizədlər Jordi Farre və Viktor Font bütün idarə heyətini istefaya məcbur edəcək addım olan “etimadsızlıq səsverməsi üçün” səs toplamağa çalışırlar. Bu prosesə cəlb olunan mənbələrdən biri qeyd edir: “Bartomeunu istefaya göndərmək və klubu yeni rəhbərliyə təslim etmək üçün yeganə yol budur”. Bununla belə, digər müşahidəçilər pandemiya dövründə növbəti 14 gün ərzində tələb olunan 16 min 500 üzvün rəsmi sənədləri imzalamasının fiziki baxımdan çətin olduğunu düşünürlər.

Bartomeu “İndi istefa vermək asan, ancaq məsuliyyətsiz addım olardı” deyərkən, bəlkə də, yaxşı niyyətlə danışdığına özünü inandıra bilmişdi. İstefa reallaşsa, 110 minə yaxın klub üzvünün yeni prezidenti müəyyənləşdirməsi üçün 3 aylıq keçid dönəminə ehtiyac yaranacaq. Həmin müddətdə müvəqqəti rəhbərlik klubu idarə edəcək, oyunların təşkilini və maaşların ödənilməsini həyata keçirəcəklər. Amma onların məşqçini istefaya göndərmək və ya yenisini gətirmək, o cümlədən oyunçu satmaq və almaq kimi böyük qərarlar qəbul etmək gücü olmayacaq. Klubu qeyri-müəyyənliyə itələməyin, xüsusilə də, iqtisadi böhran və pandemiya dövründə ciddi nəticələri ola bilər.

“Barselona”nın illik ümumi yığıncağına kimi klubda qalmaq, idarə heyətinə 2019-20 mövsümü üzrə maliyyə hesabatının yekunlarını qəbul etdirməyə və 2020-21 mövsümü üzrə rəqəmlərin məqbul görülməsi üçün lazımi transfer əməliyyatlarını həyata keçirməyə şərait yaradacaq. Nizamnaməyə görə, gedən idarə heyəti 2010-cu ildə rejim dəyişdiyi gündən bəri ortaya çıxan borclara görə şəxsən cavabdeh ola bilər. Şübhəsiz ki, “Barselona”nın idarə heyətinin 14 üzvünün ağlında bu məsələ də var. Mənbə qeyd edir: “Messinin gedişi Bartomeunun rəqəmlərlə oynamasına imkan yaradacaq və həm özü, həm də idarə heyətinin üzvləri itkiləri öz ciblərindən qarşılamaq təhlükəsi ilə üz-üzə qalmayacaqlar”.

Baş verənlərə baxmayaraq, idarə heyəti işinə qaldığı yerdən davam edir. Hələ koronavirus məsələsindən əvvəl bu yay heyətə qoşulacaq yeni oyunçulara – Trinkao, Pedri, Mateus – görə 50 milyon avroya yaxın xərcləyəcəkləri razılaşdırılmışdı. Sonra iyul ayında Arturun “Yuventus”a, Miralem Pyaniçin isə “Barsa”ya keçidinə dair, sadəcə maliyyə hesabatını balanslaşdırmaq məqsədilə planlaşdırılmış, amma sabah üçün problemlər yaradacaq, qəribə mübadilə ortaya çıxdı. Şayiələrə inansaq, rəhbərlik “İnter”in hücumçusu Lautaro Martinesə görə 80 milyon avro ödəmək istəyir.

“Nou Kamp” stadionu, o cümlədən ətrafının yenilənməsi ilə bağlı, “Goldman Sachs” bankının maliyyələşdirməyə razılıq verdiyi və dəyəri 600 milyon avronun üzərində qiymətləndirilən layihə də aktuallığını qoruyur. Payızda keçirilməsi planlaşdırılan illik ümumi yığıncaqda bu məsələ təsdiqlənməlidir. Hadisələrin davamında proyektin davam edib-etməyəcəyinə yeni idarə heyəti qərar verə bilər, amma hazırkı rejim getməmişdən əvvəl mümkün qədər dərin izlər buraxmaqda qərarlıdır. Mənbələrdən birinin fikrinə görə, idarə heyətinin gələcək adına daha böyük maliyyə problemlərinə yol açmamış istefaya getməsi vacibdir:

“Bartomeu dərhal istefa verməli və seçkilər keçirilməlidir ki, onlar klubu daha böyük maliyyə problemləri ilə üz-üzə qoyacaq qərarlar qəbul edə bilməsinlər. Messinin gedişinə şərait yaratmaq qəbuledilməzdir. Artıq onun bu cür qərarlar qəbul etmək üçün hüquqi əsası olmamalıdır. Bartomeunun klubun gələcəyini girova qoymasına icazə vermək olmaz. Yeni prezident, kim olursa olsun, klubu xilas edəcək qərarlar vermək üçün ən qısa zamanda postun başına keçməlidir”.

Mənbə kimi fikrini bildirən klub ətrafındakı şəxslərin əksəriyyətinə görə, Messini “Barselona”da saxlamaq üçün artıq gecdir. Argentinalı artıq qərarını dəqiqləşdirib: o, klubdan ayrılacaq. Leo “Mançester Siti”də Quardiolaya qoşulsa, bu, Bartomeu və ya Rozelin rəqibinin “Barselona”nı “Etihad”a dəyişdiyi ilk situasiya olmayacaq. Mançesterdə o, keçmiş həmkarları barədə onunla həmfikir olan bir neçə tanış sima tərəfindən xoş qarşılanacaq.

Messinin qalması müqabilində Bartomeunun öz istefasını təklif etdiyinə dair xəbərlər yayılıb. Amma prosesləri yaxından izləyənlərə görə, bu, gərəksiz siyasi gedişdir. Mənbə əlavə edir: “Bu, siyasətdir. Messi yekun qərarını verib deyə, Bartomeu belə danışır. Artıq geridönüş yoxdur. Bartomeu istefa versə belə, Messi qalmayacaq. Leonun gedişi qaçılmazdır. Bu idarə heyəti indi getməlidir və yeni gələnlər “Barselona” azarkeşlərini həyəcanlandıracaq layihə hazırlamalıdırlar”.

Messinin gedişi – “Barselona” azarkeşlərin üçün ağrılı olacaq bu proses, futbol mütəxəssislərinə görə, düzgün qərardır. Leo həm də Bartomeu və idarə heyətinin üzvlərinin qısamüddətli maliyyə problemlərini həll etmələrinə yardımçı ola bilər. “Mançester Siti” olsun və ya başqa bir klub, “Barselona”nın qarşı tərəfdən yüksək transfer haqqı tələb edəcəyi gözlənilir. Amma dəqiq olan bir şey var: iqtisadi problemlər o qədər ciddidir ki, idarə heyəti klub tarixinin ən böyük oyunçusunu satmağı belə gözə alıb. 33 yaşında olsa da, meydanda və meydandan kənarda əvəzedilməz olan bir futbolçunu ayrılmağa məcbur edən uzunmüddətli problemlər bir nöqtədən sonra həll olunmalıdır. Lakin “Barsa”nın hazırkı idarə heyətinin üzvləri klubdakı günlərinin sayılı olduqlarını yaxşı bilirlər.

“Barselona”nın idarə heyəti növbəti dəfə uzunmüddətli planlama olmadan, hədəfsiz şəkildə, sadəcə, indi önəm daşıyan, təcili problemi həll etmək üçün çabalayır. Bu, Bartomeunun prezidentlik dövrününün ideal xülasəsidir: heç vaxt bu vəzifədə olacağını gözləməyən biri klub prezidenti oldu, ilk gündən bəri daha çox önünə çıxan “yanğın”larla mübarizə apardı və müvəqqəti həll üsulları yol boyunca daha da dərin və onun özünün xilasını mümkünsüz edən problemlər yaratdı.

Qeyd: Yazı Dermot Korriqana məxsusdur

© Rüfət Məcid