“Juve”-yə vida məktubu
SportİSM

“Juve”-yə vida məktubu

Paylaşmaq

İtalyan yarımmüdafiəçi Klaudio Markizionun 25 illik “Yuventus” karyerası başa çatdı. “Qoca sinyora” 32 yaşlı futbolçunun müqaviləsini yeniləmədi. Təcrübəli oyunçu “ağ-qara” forma ilə 7 dəfə İtaliya A Seriyasında, 1 dəfə isə B Seriyasında çempionluq sevinci yaşayıb. 4 dəfə ölkə kubokunu başı üzərinə qaldıran Markizio 3 dəfə Super Kuboka yiyələnib. Ümumilikdə, Klaudio “Yuve” forması ilə meydana çıxdığı 389 oyunda 37 qol vurub.

Klaudio Markizio sevimli klubuna vida məktubu yazıb:

Ömrümün son 25 ilini “Yuventus”un heyətində nailiyyətlər qazanaraq kim ola biləcəyim barədə düşünmüşəm və artıq baş vermiş bu hadisənin nə vaxtsa ola biləcəyi bircə dəfə də ağlıma gəlməyib. Bir futbolçu və insan kimi gələcəkdə atacağım addımlardan asılı olmayaraq, ürəyimin hər zaman yalnız iki rəngə bağlı olduğunu və bundan sonra da belə qalacağını gizlətmək düzgün deyil və mənasızdır. “Yuventus” formasını ilk dəfə 7 yaşımda geyinmişəm və həmin gündən sonra bircə saniyə də ondan ayrı qalmamışam. Mən bu fəlsəfə ilə böyümüşəm, əvvəlcə onu əxz eləməyə, sonra isə həm meydanda, həm də onun hüdudlarından kənarda həmin fəlsəfənin səfiri olmağa çalışmışam. Necə deyərlər, “qələbə vacib deyil, qələbə hesaba alınan yeganə nəsnədir”. Azarkeşlərin (bəli, bəlkə də qeyri-mümkün görünür, amma mən indi onlardan biriyəm) çox sevdiyi, prezidentimiz Campyero Bonipertinin dediyi bu cümlənin mahiyyətində bizim həyat tərzimizin dərin mənası yatır.

“Qələbə vacib deyil, qələbə hesaba alınan yeganə nəsnədir”
Arzularla yaşayan çoxsaylı uşaqlardan birisənsə, anlayırsan ki, “Yuventus”da oynaya bilmək üçün “ən yaxşı” olmalısan. Hər zaman.

“Qələbə vacib deyil, qələbə hesaba alınan yeganə nəsnədir”
Yaşa dolduqdan sonra, arzuların, demək olar ki, reallığa çevriləndə onların başına dırmaşmasına imkan vermirsən. Əbədi idollarının kölgəsində əzmlə çalışırsan, özünü hər gün o futbolkaya fəda edirsən, çünki bir vaxtlar üzərimdə gəzdirdiyim o zolaqlar fəxarətə, həzzə və məsuliyyətə bərabərdir.

“Qələbə vacib deyil, qələbə hesaba alınan yeganə nəsnədir” 
Nəhayət, o idollar sənin komanda yoldaşların olanda, onlarla birgə meydana çıxmaq fikrindən əsməcə tutan ayaqlarından daha güclü olmalısan. Del Pyero, Nedved, Buffon, Trezeqe, Kamoranezi və başqaları. Çünki hamı anlayır ki, o futbolkanın şərəfini qorumaq üçün öz töhfəni verməlisən. Bu, təkcə biz futbolçulara deyil, həm də hər bir azarkeşə aiddir. “Yuventus” ona görə qələbə qazanır ki, meydanda da, meydandan kənarda da onlar ən yaxşıdır!

“Qələbə vacib deyil, qələbə hesaba alınan yeganə nəsnədir”
Ən sadiq, səmimi və dünyanın ən yaxşı azarkeşlərini heç vaxt üzməmək üçün əlindən gələni edirsən.

“Qələbə vacib deyil, qələbə hesaba alınan yeganə nəsnədir” – anlayanda ki, 25 il ərzində həyatının bir hissəsi olub və birdən-birə keçmişə çevrilib, yəni qələbələri davam etdirməyin yalnız bir yolu var və mən onu bilirəm. Çünki istənilən halda, heç nə itirməyəcəm, hər zaman bu mənim bir parçam olacaq, mən də onun bir hissəsi kimi qalacağam. Harada olmağımdan asılı olmayaraq.

Əbədi məhəbbətlə, Klaudio.

Firuz Abdulla